ក្រសួងផែនការ បានអនុវត្តលើការងារជំរឿន និងអង្កេតជាច្រើននៅឆ្នាំ២០២៥ កន្លងទៅ

ក្រសួងផែនការ ក្នុងរយៈពេលពេញមួយឆ្នាំ ២០២៥ បាន​សម្រេច​លើ​ការងារ​ជា​ច្រើន​ពាក់​ព័ន្ធ​នឹង​ការ​ប្រមូល​ទិន្នន័យការងារជំរឿន ក៏ដូចជាការងារអង្កេត ដែលជាការងារ​សំខាន់​ក្នុង​ប្រមូល​ទិន្នន័យ​ជូន​រាជ​រដ្ឋាភិបាលកម្ពុជា ក្នុងការប្រើប្រាស់លើគោលដៅនានា។ ទិន្នន័យ​ទាំង​នោះ​ក៏​ផ្ដល់​ជា​ភាព​សំខាន់​បណ្ដា​អង្គការជាតិ អន្តរជាតិអាចយកទៅប្រើប្រាស់ផងដែរ។

ក្រសួងផែនការ នៅថ្ងៃទី ២៣ ខែកុម្ភៈ ឆ្នាំ ២០២៦ នេះ បាន​រៀប​ចំ​សន្និបាត​បូក​សរុប​ការងារ​ប្រចាំ​ឆ្នាំ២០២៥ និងលើកទិសដៅការងារសម្រាប់ឆ្នាំ ២០២៦។ ឆ្នាំ ២០២៥ជាឆ្នាំមមញឹកមួយ សម្រាប់​ក្រសួងផែនការ ពិសេសលើការងារ ជំរឿននិងការងារអង្កេត។ តាម​របាយ​ការណ៍​បញ្ជា​ក់​ថា ​នៅក្នុងឆ្នាំ ២០២៥កន្លងទៅនេះ ក្រសួងផែនការបានអនុវត្តការងារអង្កេតកសិកម្មកម្ពុជា និង​អង្កេត​សហ​គ្រាសកសិកម្មខ្នាតធំឆ្នាំ២០២៥ នៅរាជធានី ខេត្ត បានអនុវត្តការ​ងារ​អង្កេត​ភព​ផែនដី​នៅ​ព្រះរាជាណាចក្រកម្ពុជាឆ្នាំ២០២៥ នៅខេត្តកំពង់ចាម និងខេត្តត្បូងឃ្មុំ បានអនុវត្ត​ការងារអ​ង្កេតន​វា​នុវត្តន៍ឆ្នាំ២០២៥ នៅទូទាំង២៥រាជធានី ខេត្ត។ លើសពីនេះ ក្រសួងផែន​ការ​ក៏​បាន​និង​កំពុង​អនុវត្ត​ការងារអង្កេតសេដ្ឋកិច្ច សង្គមកិច្ចកម្ពុជាឆ្នាំ២០២៥ កំពុងអនុវត្តការងារ​អង្កេត​កម្លាំង​ពលកម្ម​កម្ពុជា​ឆ្នាំ២០២៥ នៅទូទាំង២៥រាជធានី ខេត្ត កំពុងវិភាគរបាយ​ការណ៍​លទ្ធផល​ទិន្នន័យ​ស្ថិតិ​សេដ្ឋកិច្ច បរិស្ថាននៃកម្ពុជាឆ្នាំ២០២៤ និងបានអនុវត្តការគូសផែនទីនិងចុះបញ្ជីគ្រួសារ ការ​រៀបចំសេចក្តីណែនាំនិងឯកសារផ្សេង និងការសម្ភាសន៍ សាកល្បងបញ្ជីសំណួរ សម្រាប់​ការ​ងារ​អង្កេត​ប្រជា​សាស្ត្រ និងសុខភាពនៅកម្ពុជាឆ្នាំ២០២៥-២០២៦ ដំណាក់ កាលទី១។ ក្រុមការងារ​ជំនាញ​នៃក្រសួងផែនការ ក៏បានចុះប្រមូលទិ​ន្នន័យ​ស្ថិតិ​ថ្នាក់​ក្រោម​ជាតិ​នៅ​រាជ​ធានី​ភ្នំពេញ​សម្រាប់​ឆ្នាំ​២០២៥ និងរៀបចំតារាងសំណួរ ទិន្នន័យស្ថិតិថ្នាក់ក្រោមជាតិសម្រាប់ឆ្នាំ២០២៦ ដើម្បី​ចុះស្រង់ទិន្នន័យតាមបណ្តាមន្ទីរ អង្គភាពតាមវិស័យ និងបាន​ចុះ​សម្ភាសន៍​និង​ស្រង់​ទិន្នន័យ​អង្កេតថ្លៃអ្នកផលិតនិងសេវាកម្ម ដើម្បីចងក្រងជាសន្ទស្សន៍ឆ្នាំ២០២៤-២០២៥។

ឆ្នាំ២០២៥​ដដែលនោះ ក្រសួងផែនការ ក៏បានផ្សព្វផ្សាយ​លទ្ធផល​ជំរឿ​ន​កសិកម្ម​នៅ​ព្រះរា​ជា​ណា​​ចក្រ​​កម្ពុជា​ឆ្នាំ២០២៣ ផ្សព្វផ្សាយលទ្ធផលរបាយការណ៍អង្កេតសេដ្ឋកិច្ច សង្គមកិច្ច​កម្ពុជា​ឆ្នាំ​២០២៥ ផ្សព្វផ្សាយលទ្ធផលរបាយការណ៍អង្កេតកសិកម្មកម្ពុជាឆ្នាំ២០២៤។

ក្នុង​ពិធីបើកសន្និបាតនៅថ្ងៃនេះដែរ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បាន​លើក​ឡើង​ថា​ក្រសួង​ផែនការ មានតួនាទីសំខាន់ ជាសេនាធិការរបស់រាជរដ្ឋាភិបាល ក្នុងការដឹកនាំ សម្រប សម្រួល​ការរៀបចំ ផែនការយុទ្ធសាស្ត្រអភិវឌ្ឍន៍ជាតិ, កម្មវិធីវិនិយោគសាធារណៈ ៣ឆ្នាំរំកិល, ការ​ងារ អត្តសញ្ញាណកម្មគ្រួសារក្រីក្រ និងគ្រួសារងាយរងហានិភ័យ, ការ​ងារ​លើក​កម្ពស់​អាហា​រូប​ត្ថម្ភ​, ការងារ រៀបចំ និងគ្រប់គ្រងប្រព័ន្ធទិន្នន័យជាតិ និងការងារផលិត​និង​ផ្សព្វ​ផ្សាយ​ស្ថិតិ​ជាតិ​លើ​វិស័យ​ចម្បង​ៗ រួមមានៈ ស្ថិតិប្រជាសាស្ត្រ, សុខភាព, សេដ្ឋកិច្ច, សង្គមកិច្ច, និងកសិកម្ម សម្រាប់​ក្រសួង ស្ថាប័ននានា និងតួអង្គពាក់ព័ន្ធប្រើប្រាស់ក្នុងការរៀបចំផែនការអភិវឌ្ឍន៍ និងការ​តាម​ដាន​ត្រួត​ពិនិត្យ និងវាយតម្លៃ តាមវិស័យរបស់ខ្លួន, និងការងារប្រជាជននិងអភិវឌ្ឍន៍ ដើម្បី​រួម​ចំណែក​ក្នុង​ការ​ធ្វើឱ្យសម្រេចបាន យុទ្ធសាស្ត្របញ្ចកោណ ដំណាក់កាលទី១, របៀបវារៈឆ្នាំ២០៣០ សម្រាប់​ការ​អភិវឌ្ឍប្រកបដោយចីរភាព, និងកម្មវិធី​សកម្មភាព​នៃ​សន្និសីទ​អន្តរជាតិ​ស្តីពី​ប្រជាជន និង​អភិវឌ្ឍន៍​៕ អត្ថបទ៖ គឹមហុក