ក្រុមប្រឹក្សាបរធនបាល SDF ពិនិត្យលទ្ធផលលើទម្រង់ហិរញ្ញប្បទាន ដើម្បីធានាចីរភាពការអភិវឌ្ឍជំនាញ

ក្រុមប្រឹក្សាបរធនបាល នៃមូលនិធិអភិវឌ្ឍន៍ជំនាញ (SDF) រៀបចំកិច្ចប្រជុំពិនិត្យលទ្ធផលការសិក្សាស្រាវជ្រាវ ពីទម្រង់ ហិរញ្ញប្បទាន រយៈពេលមធ្យម និងវែង ដើម្បីធានាចីរភាពការអភិវឌ្ឍជំនាញសម្រាប់កម្ពុជា និងការកែសម្រួលរចនាសម្ព័ន្ធអង្គភាព ប្រតិបត្តិ SDF ។

ឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាល នៃមូលនិធិអភិវឌ្ឍន៍ជំនាញ (SDF) ដឹកនាំកិច្ចប្រជុំក្រុមប្រឹក្សាបរធនបាល ដោយមានការអញ្ជើញចូលរួមពីឯកឧត្តម និងឧកញ៉ា ជា អនុប្រធាន សមាជិកក្រុមប្រឹក្សាបរធនបាល និងអង្គភាពប្រតិបត្តិ SDF ដើម្បីត្រួតពិនិត្យលើលទ្ធផល ការសិក្សាស្រាវជ្រាវទម្រង់ ហិរញ្ញប្បទាន និងការកែសម្រួលរចនាសម្ព័ន្ធអង្គភាពប្រតិបត្តិ SDF ដើម្បីបន្តបេសកកម្មអភិវឌ្ឍជំនាញនៅកម្ពុជាឱ្យកាន់តែមាន ប្រសិទ្ធភាព។

អង្គប្រជុំបានពិនិត្យលើបទបង្ហាញ ស្តីពីលទ្ធផលការសិក្សាលើទម្រង់ហិរញ្ញប្បទានរយៈពេលមធ្យម និងវែង ដើម្បីធានាចីរភាព ក្នុងការអភិវឌ្ឍជំនាញសម្រាប់កម្ពុជា ដែលបានសិក្សាយ៉ាងហ្មត់ចត់ ពីក្រុមជំនាញស្រាវជ្រាវឯករាជ្យ ដែលផ្អែកលើបទពិសោធន៍ក្នុង តំបន់អាស៊ាន និងអន្តរជាតិ ដើម្បីស្វែងរកគំរូហិរញ្ញប្បទានដែលមានលក្ខណនវានុវត្តន៍, ប្រសិទ្ធភាព, វិសាលភាព និងមានការទទួល ខុសត្រូវរួមរបស់ភាគីពាក់ព័ន្ធ នៅក្នុងប្រព័ន្ធអេកូឡូស៊ីជំនាញ ដើម្បីគាំទ្រការអភិវឌ្ឍមូលធនមនុស្ស ទាំងបរិមាណ និងគុណភាព ដោយឆ្លើយតបនឹងតម្រូវការឧស្សាហកម្ម ទាំងក្នុងពេលបច្ចុប្បន្ន និងអនាគត និងចូលរួមសម្រេចបាននូវចក្ខុវិស័យប្រែក្លាយកម្ពុជា ឱ្យ ទៅជាប្រទេសចំណូលខ្ពស់នៅឆ្នាំ២០៥០។ បន្ថែមលើនេះ ក្រុមប្រឹក្សាបរធនបាលក៏បាន ពិនិត្យ និងផ្តល់ជាអនុសាសន៍ លើសំណើ ការកែសម្រួលរចនាសម្ព័ន្ធ SDF ក្នុងគោលបំណងសម្រួចយន្តការការងារឱ្យកាន់តែរហ័សរហួន និងមានប្រសិទ្ធភាពខ្ពស់ ឆ្លើយតបទៅ នឹងតម្រូវការជាក់ស្តែងរបស់វិស័យឯកជន។

ជាលទ្ធផល, អង្គប្រជុំបានឯកភាពជារួមថា ការអភិវឌ្ឍជំនាញប្រកបដោយចីរភាពក្នុងរយៈពេលមធ្យម និងវែងនៅកម្ពុជា ចាំបាច់ត្រូវពឹងផ្អែកលើទម្រង់ហិរញ្ញប្បទានដែលមានស្ថិរភាព, អាចព្យាករណ៍បាន ជាពិសេសត្រូវមានស្មារតីចូលរួមពីគ្រប់ភាគីពាក់ព័ន្ធ រួមមាន រាជរដ្ឋាភិបាល វិស័យឯកជន និងបុគ្គល។ ផ្អែកលើសេចក្តីសម្រេចនេះ, អង្គភាពប្រតិបត្តិ SDF នឹងធ្វើការសម្រួចលទ្ធផល នៃកិច្ចពិភាក្សា ស្របតាមអនុសាសន៍ និងទិសដៅដែលបានផ្តល់ដោយក្រុមប្រឹក្សាភិបាល ហើយរៀបចំជាផែនទីបង្ហាញផ្លូវ ស្តីពីទម្រង់ ហិរញ្ញប្បទានប្រកបដោយចីរភាព ដើម្បីគាំទ្រការអភិវឌ្ឍជំនាញ និងកម្លាំងពលកម្មនៅកម្ពុជា៕ អត្ថបទ៖ សុន រ៉ាឌី