​​ដំណាំម្អមផ្ដល់ចំណូលបន្ថែមបានយ៉ាងល្អប្រសើរ ដល់កសិករក្នុងក្រុងសៀមរាប

ការដាំដំណាំម្អម បានក្លាយជាប្រភពចំណូលបន្ថែមដ៏សំខាន់សម្រាប់កសិករ និងផ្ដល់ចំណូលបន្ថែមបានយ៉ាងល្អប្រសើរ ដល់កសិករនៅក្នុងសង្កាត់ជ្រាវ ក្រុងសៀមរាប ខណៈដែលបច្ចុប្បន្នដំណាំប្រភេទនេះមានទីផ្សារល្អ និងមានតម្រូវការខ្ពស់ជាប្រចាំពីសំណាក់អាជីវករ។

កសិករដាំដំណាំម្អមរស់នៅក្នុងភូមិវាល សង្កាត់ជ្រាវ ក្រុងសៀមរាប អ្នកស្រី ជិន សារុំ បានឱ្យដឹងថា ម្អមគឺជាប្រភេទដំណាំវិលជុំដែលងាយស្រួលដាំដុះ និងអាចប្រមូលផលបានគ្រប់រដូវកាល ហើយរបរនេះអាចផ្ដល់ប្រាក់ចំណូលបន្ថែមជូនគ្រួសារចន្លោះពី ៣០ម៉ឺន ទៅ៥០ម៉ឺនរៀលក្នុងមួយខែ ព្រោះតម្លៃលើទីផ្សារក្នុងឆ្នាំនេះ មានសភាពសមរម្យផងដែរ។អ្នកស្រីបានឱ្យដឹងទៀតថា ការជ្រើសរើសដាំម្អម ព្រោះអ្នកស្រីមើលឃើញពីបច្ចុប្បន្នដំណាំនេះ កំពុងមានតម្រូវការខ្ពស់សម្រាប់យកទៅធ្វើជាគ្រឿងផ្សំក្នុងមុខម្ហូបខ្មែរ និងងាយស្រួលថែទាំ មិនសូវរើសដី និងមិនត្រូវការបច្ចេកទេសស្មុគស្មាញដូចដំណាំដទៃ។ ក្រៅពីការដាំម្អម អ្នកស្រីក៏អាចដាំបន្ថែមលើដំណាំរួមផ្សំផ្សេងទៀតដូចជា ស្ពៃ, ត្រកួន, ខ្ទឹម និងជីគ្រប់ប្រភេទ ដើម្បីផ្គត់ផ្គង់ទីផ្សារក្នុងក្រុងសៀមរាបផងដែរ។

អ្នកស្រីលើកឡើងថា ក្នុងមួយថ្ងៃៗ អ្នកស្រីទទួលបានការកុម្ម៉ង់ពីអាជីវករតាមផ្សារនានា ចាប់ពី ១០០បាច់ ទៅ៤០០បាច់ អាស្រ័យទៅតាមតម្រូវការជាក់ស្ដែង។ ប៉ុន្ដែអ្នកស្រីលើកឡើងថា ការដាំម្អមនេះតែក្នុងរដូវប្រាំងប៉ុណ្ណោះ ព្រោះតំបន់គាត់រស់នៅប្រឈមនឹងការលិចទឹកក្នុងរដូវវស្សា ។

សូមបញ្ជាក់ថា សង្កាត់ជ្រាវ ក្រុងសៀមរាប មួយផ្នែកជាប់បឹងទន្លេសាប ហើយកសិករភាគច្រើនដាំណាំដំណាំ និងធ្វើស្រែប្រាំងនិងស្រែវស្សា ។ អ្នកស្រីជិនសារុំ បានផ្ដាំផ្ញើ និងលើកទឹកចិត្តដល់បងប្អូនប្រជាពលរដ្ឋដែលមានដីទំនេរនៅជុំវិញផ្ទះ គួរងាកមកដាំដំណាំរួមផ្សំផ្សេងៗ ជាជាងការទុកដីឱ្យទំនេរចោល ព្រោះការធ្វើបែបនេះ មិនត្រឹមតែជួយកាត់បន្ថយការចំណាយប្រចាំថ្ងៃក្នុងគ្រួសារប៉ុណ្ណោះទេ ប៉ុន្តែថែមទាំងអាចបង្កើតជាប្រភពចំណូលបន្ថែម កាត់បន្ថយការនាំចូលបន្លែពីក្រៅ និងធានាបាននូវបន្លែសុវត្ថិភាពសម្រាប់បរិភោគទៀតផង៕

អត្ថបទ ៖ ឈិត សាវី