រដ្ឋបាល​ឃុំស្វាយខ្សាច់ភ្នំ​ ប្តេជ្ញាផ្ដល់សេវា ​និងកសាងអភិវឌ្ឍន៍​នៅមូលដ្ឋានខ្លួនឱ្យកាន់តែរីកចម្រើន​

ក្រុម​ប្រឹក្សារួមទាំងមន្ត្រីនៃរដ្ឋបាល​ឃុំស្វាយខ្សាច់ភ្នំ​ បន្តប្តេជ្ញាចិត្តបំរើសេវា​និងកសាងអភិវឌ្ឍន៍​នៅមូលដ្ឋានខ្លួនឲ្យកាន់តែរីកចម្រើន​ និងល្អប្រសើរបន្ថែមទៀត។

លោក​ អ៊ាន គឹមសាន​ មេឃុំស្វាយខ្សាច់ភ្នំ​ ស្រុកស្រីសន្ធរ​ បានបញ្ជាក់ប្រាប់​ ក្នុងអាណត្តិលោកកាន់តំណែងជាមេឃុំ​នៅក្នុងមូលដ្ឋានឃុំស្វាយខ្សាច់ភ្នំ​ នៃស្រុកស្រីសន្ធរ​ បានកសាងហេដ្ឋរចនាស័ម្ពន្ធនានាជាច្រើន​ ដូចផ្លូវថ្នល់​ ប្រព័ន្ធ​លូ​ និងស្តារឡើងវិញនូវប្រព័ន្ធធារាស្ត្រដើម្បីស្រោចស្របផលដំណាំរបស់ប្រជាកសិករធ្វើរបរដាំបន្លែ។ លោកមេឃុំរូបនេះបន្តថា​ ស្របពេលជាមួយនឹងការអភិវឌ្ឍន៍នៅតាមមូលដ្ឋានេះ​ជាគោលការណ៍អភិវឌ្ឍន៍នៅមូលដ្ឋានឃុំស្វាយខ្សាច់ភ្នំ គឺ​មានប្រភពបានមកពីថវិកាមូលនិធិឃុំសង្កាត់ដែលផ្តល់ដោយរាជរដ្ឋាភិបាលកម្ពុជា​ និងមួយផ្នែកទៀតបានមកពីការចូលរួមពីសប្បុរសជននានា សម្រាប់ការអភិវឌ្ឍន៍លើគម្រោងស្ថាបនាជាហេដ្ឋារចនាសម្ព័ន្ធរូបវ័ន្ត និងអរូបវ័ន្តតាមភូមិ។​

ទន្ទឹមនឹងនេះដែរ​ ប្រជាពលរដ្ឋ​ដែលមកទទួលសេវា​នៅសាលាឃុំស្វាយខ្សាច់ភ្នំ​ បានបង្ហាញការគាំទ្រ​ចំពោះការយកចិត្តទុកដាក់របស់អាជ្ញាធរឃុំ​ និងមន្ត្រីនៅសាលាឃុំ​ ដែលខិតខំប្រឹងប្រែងបំរេីសេវាដោយភាពទទួលខុសត្រូវ​និងមានទំនុកចិត្ត​លឿនរហ័ស​ ដោយឥរិយាបថល្អប្រសើរទៀត។

​លោក​ អ៊ាន គឹមសាន​ មេឃុំស្វាយខ្សាច់ភ្នំ​ ស្រុកស្រីសន្ធរ​ ក៍បានថ្លែងអំណរគុណដល់ថ្នាក់ដឹកនាំពីថ្នាក់ខេត្តរហូតដល់ថ្នាក់ស្រុក និងជាពិសេសនោះ​ក្រោមការដឹកនាំរបស់​សម្តេចមហាបវរធិបតី​ ហ៊ុន​ ម៉ាណែត​ ជានាយករដ្ឋមន្ត្រី​នៃព្រះរាជាណាចក្រកម្ពុជា​ ដែលតែងតែគិតគូរពីសុខទុក្ខ​ប្រជាពលរដ្ឋ​លើការកាត់បន្ថយភាពក្រីក្រ​ និងធ្វើយ៉ាងណាសម្រួលដល់ការលំបាកតាមគ្រួសារឲ្យកាន់តែប្រសើរឡើងបន្ថែមទៀត៕ ដោយ ៖ ថុង សីហា