ក្រសួងការងារទទួលអំណោយពីសមាគមធុរកិច្ចកូរ៉េនៅកម្ពុជា សម្រាប់ចែកជូនជនភៀសសឹក និងកងទ័ពជួរមុខ

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញចូល​រួម​ក្នុង ”ព្រឹត្តិការណ៍សប្បុរសធម៌ សម្រាប់ជួយដល់ជនរងគ្រោះ​កម្ពុជា​នៅ​តាមព្រំដែន​” របស់សមាគមធុរកិច្ចកូរ៉េនៅកម្ពុជា សម្រាប់ផ្តល់ជាអំណោយជូនដល់ជនភៀសសឹក និងវីរកងទ័ពជួរមុខ កាលពីព្រឹកថ្ងៃទី១១ ខែមីនា ឆ្នាំ២០២៦។

នាឱកាសនោះ ឯកឧត្តមរដ្ឋមន្រ្តី បានមានប្រសាសន៍ថា បើទោះបីជាបទឈប់បាញ់ រវាងកម្ពុជា និងថៃ បានចូលជាធរមានយ៉ាងណាក៏ដោយ ក៏នៅមានជនភៀសសឹករាប់ម៉ឺននាក់ ដែលរួមមានទាំងស្រ្តី និងកុមារផងដែរ នៅពុំទាន់អាចវិលទៅលំនៅឋានវិញនៅឡើយ។ ហេតុនេះ ការឧបត្ថម្ភជាថវិកា ជាសម្ភារ និងគ្រឿងឧបភោគបរិភោគជូនដល់ជនរងគ្រោះពីជម្លោះព្រំដែន ជាពិសេសការបរិច្ចាគឈាមនាពេលនេះរបស់សមាគម គឺមិនទាន់យឺតពេលនោះទេ គឺចំពេលតែម្តង ដែលនេះបានបង្ហាញយ៉ាងច្បាស់ពីមនោសញ្ចេតនា ក្តីស្រឡាញ់យ៉ាងជ្រាលជ្រៅ និងការយកចិត្តទុកដាក់ដល់បងប្អូនដែលកំពុងបន្តរងទុក្ខលំបាកពីការឈ្លានពានរបស់យោធាថៃ។ លើសពីនេះ ទឹកចិត្តសប្បុរសនេះ ក៏ជាសាក្សីថ្មីមួយទៀតបញ្ជាក់ថា ការរាប់អានគ្នានៃប្រជាជាតិទាំងពីរពិតជាមានតម្លៃជ្រាលជ្រៅមិនអាចកាត់ថ្លែបានផងដែរ។

ឯកឧត្តមរដ្ឋមន្រ្តី ជឿជាក់ថា បងប្អូនជនភៀសសឹក និងវីរកងទ័ព ពិតជាសប្បាយរីករាយចំពោះអំណោយសប្បុរសនេះ ហើយក្នុងនាមរាជរដ្ឋាភិបាល និងក្រសួងការងារនិងបណ្តុះបណ្តាលវិជ្ជាជីវៈ ក៏ដូចជាក្នុងនាមជាពលរដ្ឋខ្មែរមួយរូប ឯកឧត្តមបានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏ប្រពៃ និងក្តីស្រឡាញ់ដោយស្មោះរបស់សមាជិកសមាគមធុរកិច្ចកូរ៉េនៅកម្ពុជា ព្រមទាំងសប្បុរសជន ដែលបន្តចូលរួមក្នុងសកម្មភាពសប្បុរសធម៌ជួយដល់ជនរងគ្រោះនៅសមរភូមិមុខ ដែលបញ្ជាក់ឱ្យឃើញថា ក្រៅពី “ស្មារតីខ្មែរជួយខ្មែរ” កម្ពុជាក៏មាន ស្មារតីបងប្អូនកូរ៉េជួយបងប្អូនខ្មែរផងដែរ ដែល “ឈរនៅជាមួយកម្ពុជា”។

លោក អ៊ីម អ៊ូថេក (Lim Woo-taek) អនុប្រធានសមាគមធុរកិច្ចកូរ៉េនៅកម្ពុជា បានលើកឡើងថា សមាគមមិនអាចមើលរំលងទុក្ខលំបាកបងប្អូនជនភៀសសឹកបាននោះទេ ទើបរៀបចំសកម្មភាពសប្បុរសធម៌នេះសម្រាប់ផ្តល់ជាអំណោយចាំបាច់មួយចំនួនជួយសម្រាលទុក្ខលំបាកក្នុងជីវភាពប្រចាំថ្ងៃ។ លោកសង្ឃឹមយ៉ាងមុតមាំថា ដួងចិត្តសប្បុរសដែលប្រមូលផ្តុំនេះ នឹងក្លាយជាសារបញ្ជូនទៅកាន់ជនភៀសសឹកថា “បងប្អូនមិនឯកាទេ ប្រជាជនកូរ៉េនៅទីនេះនឹងគាំទ្រ និងឈរនៅជាមួយអ្នកទាំងអស់គ្នា”។ ការចែករំលែកនេះ នឹងក្លាយជាគ្រឿងលើកទឹកចិត្តដល់បងប្អូនដែលកំពុងរងទុក្ខឱ្យក្រោកឈរឡើងវិញ ហើយលោកសង្ឃឹមថាសកម្មភាពនេះនឹងក្លាយជាស្ពាននៃមិត្តភាព និងភាពជឿជាក់រវាងប្រជាជន និងប្រទេសទាំងពីរបន្ថែមទៀតផងដែរ៕ អត្ថបទ៖ ឈិត បូរ៉ាវី