ក្រសួងការងារនឹងបើកកិច្ចប្រជុំជាមួយភាគីនិយោជក និងសហជីព អំពីផលប៉ះពាល់តម្លៃប្រេងជាសាកល និងដោះស្រាយ​បញ្ហាប្រឈមចំពោះកម្មករនិយោជិត នៅរសៀលថ្ងៃសុក្រនេះ

ភ្នំពេញ៖ ស្របតាមការណែនាំរបស់ប្រមុខរាជរដ្ឋាភិបាលកម្ពុជា នៅរសៀលថ្ងៃទី២០ ខែមីនានេះ ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំកិច្ចប្រជុំជាមួយតំណាងភាគីនិយោជក និងភាគីសហជីព តំណាងកម្មករនិយោជិត ដើម្បីពិនិត្យពិភាក្សាស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់កម្មករនិយោជិតក្នុងអំឡុងពេលវិបត្តិប្រេង។ នេះបើតាមលោក ស៊ុន មេសា អ្នកនាំពាក្យ ក្រសួងការងារ និងបណ្តុះបណ្តាលវិជ្ជាជីវៈ បញ្ជាក់ប្រាប់ BTV នៅព្រឹកថ្ងៃទ២០ ខែមីនា ឆ្នាំ២០២៦នេះ។

សូមបញ្ជាក់ថា ការគ្រោងបើកកិច្ចប្រជុំពិភាក្សាត្រីភាគីខាងលើនេះ ធ្វើឡើងបន្ទាប់ពី សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានសរសេរសារបញ្ជាក់កាលពីយប់ថ្ងៃទី១៩ ខែមីនា ឆ្នាំ២០២៦កន្លងទៅថា ដើម្បីពិនិត្យដោះស្រាយផលវិបាកដែលកើតចេញពីការកើនឡើងតម្លៃប្រេងឥន្ធនៈជាសកលនាពេលថ្មីៗនេះ សម្តេចបានណែនាំឱ្យ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រៀបចំកិច្ចប្រជុំជាមួយតំណាងភាគីនិយោជក និងភាគីសហជីព ដែលតំណាងបងប្អូនកម្មករនិយោជិត ដើម្បីពិនិត្យពិភាក្សាស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិតយើង នៅក្នុងរយៈពេលអន្តរកាលនេះឱ្យបានឆាប់បំផុត។

សម្ដេចធិបតី សង្ឃឹមថា ភាគីនិយោជក និងភាគីសហជីព តំណាងកម្មករនិយោជិត នឹងអាចរកបាននូវចំណុចប្រសព្វសមរម្យមួយ ដែលអាចជួយសម្រាលបន្ទុកថ្លៃធ្វើដំណើររបស់កម្មករនិយោជិតផង និងអាចរក្សាបាននូវភាពប្រកួតប្រជែងនៃឧស្សាហកម្មរបស់កម្ពុជាផងដែរ៕ អត្ថបទ៖ ឈិត បូរ៉ាវី