ព័ត៌មាន

សម្តេចតេជោ អំពាវនាវឲ្យមានការប្រុងប្រយ័ត្ន ខណៈពួកក្បត់ជាតិតែងតែបង្កើតផេកហ្វេកបុកក្លែងក្លាយដាក់ឈ្មោះសម្តេច ដើម្បីបោកប្រាស់ពលរដ្ឋ

សម្តេចតេជោ ហ៊ុន សែន ប្រមុខរដ្ឋស្តីទីបានអំពាវនាវឲ្យបងប្អូនប្រជាពលរដ្ឋខ្មែរទាំងក្នុង និងក្រៅប្រទេសមានការប្រុងប្រយ័ត្នខ្ពស់ ដោយសារតែក្នុងរយៈពេលចុងក្រោយនេះពួកក្បត់ជាតិ ដែលភាគច្រើនកំពុងរស់នៅក្រៅប្រទេសនោះ បានបង្កើតផេកហ្វេសបុកក្លែងក្លាយជាច្រើន ដោយបានដាក់ឈ្មោះ និងរូបសម្តេចដើម្បីបោកប្រាស់ពលរដ្ឋ ក្នុងគោលបំណងគេងចំណេញនយោបាយ និងផលប្រយោជន៍ផ្ទាល់ខ្លួនជាដើមនោះ។

តាមរយៈផេកហ្វេសបុកផ្ទាល់របស់សម្តេច កាលពីយប់ថ្ងៃទី២០ ខែមីនា ឆ្នាំ២០២៦នេះ សម្តេច តេជោបានប្រើពាក្យធ្ងន់ៗទៅកាន់ពួកក្បត់ជាតិទាំងនោះថា «តើពួកក្បត់ជាតិនេះបើមិនបានភូតកុហក់វាងាប់ឬអី? បានជាពួកវាបន្តបោកប្រាស់ប្រជាជនបែបនេះ»។ សម្តេចតេជោ បានបន្ថែមទៀតថាកន្លងមកពួកក្បត់ជាតិបានបង្កើតផេកហ្វេកបុកក្លែងក្លាយមួយដែលមានរូបថត និងឈ្មោះ របស់សម្តេច និងតែងតែបានបង្ហោះព័ត៌មានមិនពិត ប្រឌិត និងបំភ្លៃបំភ្លើសព័ត៌មានគ្រប់បែបយ៉ាងដើម្បីបំភាន់ភូតកុហកបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។

តាមរយៈផេកហ្វេសបុកផ្ទាល់នេះដែរ សម្តេចតេជោ ហ៊ុន សែន បានក្រើនរំលឹក ដល់បងប្អូនប្រជាពលរដ្ឋទាំងក្នុង និងក្រៅប្រទេសថា សូមបងប្អូនអ្នកប្រើប្រាស់ហ្វេសបុកគប្បីប្រុងប្រយ័ត្នខ្ពស់កុំចាញ់បោកពួកក្បត់ជាតិទាំងនេះឲ្យសោះ ខណៈហ្វេសបុកសម្តេចគឺមានតែមួយប៉ុណ្ណោះ ខណៈមានអ្នកតាមដានជាង១៥លាននាក់ ដូចដែលសម្តេចបានបង្ហោះភ្ជាប់ជាមួយនាពេលនេះ៕