សិល្បករ សិល្បការិនី ហាត់សមរបាំចម្រុះ ដើម្បីត្រៀមចូលរួមសម្តែង ក្នុងព្រឹតិ្តការណ៍បុណ្យទន្លេ លើកទី១០

នាព្រឹកថ្ងៃទី២៣ ខែមីនា ឆ្នាំ២០២៦នេះ សិល្បករ សិល្បការិនី នៃនាយកដ្ឋានសិល្បៈទស្សនីយភាព បានហាត់សមរបាំចម្រុះ ដើម្បីត្រៀមចូលរួមសម្តែង ក្នុងព្រឹតិ្តការណ៍បុណ្យទន្លេ លើកទី១០ នៅខេត្តក្រចេះ ដែលចាប់ផ្តើមពីថ្ងៃទី២៧ រហូតដល់ថ្ងៃទី២៩ ខែមីនា ឆ្នាំ២០២៦ខាងមុខនេះ។

លោក ឈាង ឆដាភ័ក្ត្រ ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ ថ្លែងប្រាប់BTV ព័ត៌មាន នាព្រឹកថ្ងៃទី២៣ ខែមីនានេះថា សិល្បករ សិល្បការិនី កំពុងហាត់សមរបាំចម្រុះ ដើម្បីត្រៀមចូលរួមសកម្មភាពបុណ្យទន្លេលើកទី១០ នៅខេត្តក្រចេះ ដែលចាប់ផ្តើមនៅចុងខែមីនានេះ។ សម្រាប់បុណ្យទន្លេនេះ នាយកដ្ឋានមានសិល្បៈចំនួន០២ទម្រង់ ដើម្បីចូលរួមសម្តែង ទី១.របាំចម្រុះ(លើកបង្ហាញអំពីគុណប្រយោជន៍នៃទឹកទន្លេមេគង្គ ដែលជួយទៅដល់ប្រជាជនដែលរស់នៅតាមដងទន្លេមេគង្គ ដោយពួកគាត់អាស្រ័យផលទៅលើទឹកទន្លេ អាស្រ័យផលទៅលើការដាំដំណាំ បន្លែបង្ការផ្សេងៗទៀត មានន័យថាទឹកទន្លេ និងជិវិតរស់នៅរបស់មនុស្ស មិនអាចកាត់ផ្តាច់ពីគ្នាបាននោះទេ) និងទី២.ល្ខោនមហោរី ។

លោក ឈាង ឆដាភ័ក្ត្រ បានបញ្ជាក់ទៀតថា គ្រប់ទម្រង់សិល្បៈវប្បធម៌ និងសកម្មភាពសិល្បៈដែលមន្រី្តបានខិតខំសម្តែងនាពេលកន្លងមកនេះ សង្កេតឃើញថា សិល្បៈ មានការផ្សាភ្ជាប់ជាមួយជីវិតមនុស្សយ៉ាងខ្លាំង។ របាំសហសម័យ យើងបានលើកអំពីព្រឹតិ្តការណ៍វប្បធម៌ និងផ្សាភ្ជាប់ជាមួយព្រឹតិ្តការណ៍ជាតិនាពេលថ្មីៗនេះ ក្នុងនោះយើងលើកអំពីវីរៈភាព និងគុណបំណាច់របស់វីរកងទ័ព ដែកពួកគាត់បានព្យាយាម តស៊ូ លៈបង់អាយុជីវិត លៈបង់សាច់ស្រស់ ឈាមស្រស់ ដើម្បីបុព្វហេតុការពារជាតិ ការពារមាតុភូមិរបស់យើង។ ហើយចំនុចពិសេសខាងលើនេះ គឺពិតជាមានសារសំខាន់មែនទែន យើងដឹងហើយថាទម្រង់សិល្បៈរបស់ជាតិនីមួយៗ មាននិរន្តរភាព និងភាពរីកចម្រើន គឺអាស្រ័យទៅលើយុវជន ដោយសារពួកគាត់ គឺជាកម្លាំងដ៏សំខាន់ ក្នុងការគាំទ្រវប្បធម៌ និងសិល្បៈបុរាណរបស់ជាតិយើង៕

អត្ថបទ រដ្ឋា