ក្រសួងមុខងារសាធារណៈ៖ពេលខាងមុខ ក្រសួង ស្ថាប័ននីមួយៗនឹងមានថ្នាលឌីជីថលរួមមួយដើម្បីដំណើរការចរន្តឯកសារឱ្យមានភាពលឿនរហ័ស មានប្រសិទ្ធភាពខ្ពស់

ក្រសួងមុខងារសាធារណៈ បានបញ្ជាក់ឱ្យដឹងថា ក្នុងពេលខាងមុខ ក្រសួង ស្ថាប័ននីមួយៗ នឹងមានថ្នាលឌីជីថលរួមមួយ ដើម្បីដំណើរការចរន្តឯកសារឱ្យមានភាពលឿនរហ័ស មានប្រសិទ្ធភាពខ្ពស់ ហើយកាត់បន្ថយរបាំងរដ្ឋបាល។

ការបញ្ជាក់បែនេះ ធ្វើឡើងក្រោយក្នុងកិច្ចប្រជុំ ពិភាក្សាលើការរៀបចំថ្នាលឌីជីថល សម្រាប់ការគ្រប់គ្រង និងការបញ្ជូនឯកសារ និងនិយាមនីតិវិធីប្រតិបត្តិសម្រាប់ការគ្រប់គ្រង ប្រគល់ និងទទួលឯកសាររបស់ក្រសួង ស្ថាប័ន នៅថ្ងៃទី២៣ ខែមីនា ឆ្នាំ២០២៦ ក្រោមអធិបតី ឯកត្តម យក់ ប៊ុនណា រដ្ឋលេខាធិការប្រចាំការ ក្រសួងមុខងារសាធារណៈ ជាមួយនឹងតំណាងក្រសួង ស្ថាប័នពាក់ព័ន្ធនានា។

ក្រសួងមុខងារសាធារណៈ បានឱ្យដឹងថា ផ្នែកមួយនៃការកែទម្រង់រដ្ឋបាលសាធារណៈ គឺជាគំនិតផ្តួចផ្តើមចងក្រងជាបណ្តាញអគ្គលេខាធិការដ្ឋាន។ តាមរយៈបណ្តាញនេះ អគ្គលេខាធិការដ្ឋាននៃក្រសួង ស្ថាប័ននីមួយៗបានសហការ ជួបពិភាក្សាគ្នាជាបន្តបន្ទាប់ក្នុងការ បង្កើតថ្នាលបច្ចេកវិទ្យាឌីជីថលមួយដើម្បីជួយសម្រួលដល់ការងាររដ្ឋបាល និងការប្រតិបត្តិការងារប្រចាំថ្ងៃរបស់ក្រសួង ស្ថាប័ន ក្នុងការគ្រប់គ្រង បញ្ជូន ប្រគល់ និងទទួលឯកសាររវាងគ្នា ទៅវិញទៅមក ឱ្យមានភាពលឿនរហ័ស សុវត្ថិភាព និងមានប្រសិទ្ធភាពខ្ពស់។

ក្រសួងមុខងារសាធារណៈបានបញ្ជាក់ថា សារៈសំខាន់ចម្បងនៃការអនុវត្តប្រព័ន្ធថ្នាលឌីជីថលនេះ ជាការកាត់បន្ថយការប្រើប្រាស់ឯកសារក្រដាស កាត់បន្ថយពេលវេលា និងបង្កើនប្រសិទ្ធភាពការងាររដ្ឋបាលឱ្យកាន់តែលឿន និងទាន់ពេលវេលា។

បើតាម ក្រសួងមុខងារសាធារណៈ តាមរយៈកិច្ចប្រជុំជាបន្តបន្ទាប់កន្លងមក និងក្នុងពេលនេះ បណ្តាញអគ្គលេខាធិការដ្ឋានបានពិភាក្សាគ្នាយ៉ាងស្និតស្នាល ធ្វើយ៉ាងណាឱ្យការអនុវត្តថ្នាលឌីជីថលនេះមានភាពសាមញ្ញ ងាយស្រួលប្រើប្រាស់ និងអាចអនុវត្តបានជាក់ស្តែងនៅគ្រប់ក្រសួង ស្ថាប័ន៕