ទីភ្នាក់ងារអភិវឌ្ឍន៍បារាំង-AFD ផ្តល់ហិរញ្ញប្បទានជាង ២១ លានអឺរ៉ូលើគម្រោង​ផ្គត់ផ្គង់​ទឹកស្អាត​បាក់ខែង​ជំហានទី៣

រដ្ឋាករទឹកស្វយ័តក្រុងភ្នំពេញ និងក្រុមហ៊ុន SAINT-GOBAIN PAM CANALISATION ចុះ​ហត្ថ​លេខា​ផ្គត់​ផ្គង់បំពង់ដែក និងសម្ភារៈ តភ្ជាប់ដែក សម្រាប់គម្រោង​ផ្គត់​ផ្គង់​ទឹក​ស្អាត​បាក់​ខែង​ជំហាន​ទី៣ ​មានទឹកប្រាក់សរុបជាង ២១ លានអឺរ៉ូ ក្រោមការ​ផ្តល់​ហិរញ្ញប្បទាន​ពី​ទីភ្នាក់​ងារ​អភិវឌ្ឍន៍​បារាំង​ (AFD)។

ឯកឧត្តម អ៊ិន សាកាន អគ្គនាយករដ្ឋាករទឹកស្វយ័តក្រុងភ្នំពេញ លើកឡើង​ក្នុង​កម្ម​វិធី​ចុះ​ហត្ថ​លេខា​លើ​កិច្ចសន្យា ផ្គត់ផ្គង់បំពង់ ដែក និងសម្ភារៈតភ្ជាប់ដែក រវាងរដ្ឋាករទឹកស្វយ័តក្រុងភ្នំពេញ និងក្រុមហ៊ុន SAINT-GOBAIN PAM CANALISATION ស្ថិតក្រោមក្រប ខណ្ឌនៃ​គម្រោង​ផ្គត់​ផ្គង់​ទឹក​ស្អាត​បាក់​ខែង​ជំហានទី៣ នៅថ្ងៃទី២៥ ខែមីនា ឆ្នាំ២០២៦ នេះថា ការអភិវឌ្ឍយ៉ាងឆាប់​រហ័ស​នៃ​ហេដ្ឋា​រចនាសម្ព័ន្ធរបស់រាជធានីភ្នំពេញ ការកើនឡើងនៃការវិនិយោគ និងការកើនឡើង​នៃ​ចំនួន​ប្រជាជន ក្នុងនោះចំពោះវិស័យទឹកស្អាតក៏ត្រូវបង្កើន ជាបន្តបន្ទាប់ផងដែរ ដើម្បីឆ្លើយ​តប​ទៅ​​តាម​តម្រូវការទាំងនោះ។

ឯកឧត្តម បន្តថា ជាការឆ្លើយតប, រដ្ឋាករទឹកស្វយ័តក្រុងភ្នំពេញ បានប្តេជ្ញាចិត្តយ៉ាងមុតមាំ ក្នុង​ការ​បង្កើន​សមត្ថភាពរបស់ខ្លួន ក្នុង ការផ្តល់ការផ្គត់ផ្គង់ទឹកដែលអាចទុកចិត្តបាន និងគ្រប់​គ្រាន់​សម្រាប់​ប្រជាពលរដ្ឋទាំងអស់ ក្នុងនោះការផ្គត់ផ្គង់ទឹកបាក់ខែងដំណាក់កាល ទី៣ គឺជាការ​បន្ត​ដ៏​សំខាន់​ពី​ដំណាក់កាលទី១ និងទី២ នឹងបង្កើនសមត្ថភាពបន្ថែមទៀត ក្នុងការផ្តល់​សេវា​ទឹក​ប្រកប​ដោយ​ចីរភាព ជាពិសេសដល់អតិថិជននៅតំបន់ជាយក្រុង នៅក្នុងវិសាល​ភាព​សេវា​កម្ម​របស់​រដ្ឋាករ​ទឹក​ស្វយ័តក្រុងភ្នំពេញ។ ជាក់ស្តែងការចុះហត្ថលេខា លើកិច្ចសន្យា ផ្គត់ផ្គង់បំពង់ដែក និង​សម្ភារៈ​តភ្ជាប់ដែក រវាងរដ្ឋាករទឹកស្វយ័តក្រុងភ្នំពេញ និងក្រុមហ៊ុន SAINT-GOBAIN PAM CANALISATION ដែលមានតម្លៃសរុបជាង ២១ លានអឺរ៉ូ គឺជាកញ្ចប់​លទ្ធកម្ម​ដ៏សំ​ខាន់​នៅ​ក្នុង​គម្រោង​ ដែលទទួលបានហិរញ្ញប្បទាន តាមរយៈប្រាក់កម្ចីសម្បទានពីទីភ្នាក់ងារអភិវឌ្ឍន៍បារាំង (AFD) សម្រាប់គម្រោងផ្គត់ផ្គង់ទឹកបាក់ខែងដំណាក់កាលទី៣។

ឯកឧត្តម អ៊ិន សាកាន បានថ្លែងអំណរគុណយ៉ាងជ្រាលជ្រៅបំផុត ចំពោះក្រសួងសេដ្ឋកិច្ច និង​ហិរញ្ញ​វត្ថុ (MEF) តាមរយៈការ សម្របសម្រួល និងចំពោះរដ្ឋាភិបាលបារាំង និងទីភ្នាក់​ងារ​អភិវឌ្ឍន៍​បារាំង (AFD) សម្រាប់ការផ្តល់ហិរញ្ញប្បទានដ៏សំខាន់ ដែលធ្វើឱ្យ គម្រោងផ្គត់​ផ្គង់​ទឹក​បាក់​ខែង​ដំណាក់កាលទី៣ក្លាយជាការពិត និងបានថ្លែងអំណរគុណយ៉ាងស្មោះស្ម័គ្រ ចំពោះ​ក្រុម​ប្រឹក្សា​ភិបាលដែលណែនាំ និងការគាំទ្រជាបន្តបន្ទាប់ ព្រមទាំងថ្លែង​អំណរ​គុណ​ដល់​គណៈ​កម្មាធិការ​ពិនិត្យ​លទ្ធកម្ម (PRC) នៅលើការងារឧស្សាហ៍ ព្យាយាម តម្លាភាព និងការប្តេជ្ញា​ចិត្ត​ក្នុង​ការ​វាយ​តម្លៃកញ្ចប់នេះ, តាមរយៈកិច្ចខិតខំប្រឹងប្រែង សហការ និងភាពជាដៃគូដ៏រឹងមាំ ដែល​កំពុង ខិតជិតដល់គោលដៅនៃការផ្តល់ទឹកស្អាត ១០០ ភាគរយ ដល់​មនុស្ស​គ្រប់​គ្នា​នៅ​ឆ្នាំ​២០៣០​ នៅក្នុងតំបន់សេវាកម្មរបស់ រដ្ឋាករទឹក ស្វយ័តក្រុងភ្នំពេញ៕ អត្ថបទ៖ សុន រ៉ាឌី