ក្រសួងការងារ និងសាកលវិទ្យាល័យកូរ៉េ ពិភាក្សារកឱកាសបង្កើតកិច្ចសហប្រតិបត្តិការក្នុងវិស័យ TVET

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បាន​ទទួល​ជួប​សម្ដែង​ការ​គួរ​សម និងពិភាក្សាការងារជាមួយ លោក គីវ៉ុន ចាង (Kiwon Jang) សាកលវិ​ទ្យាធិការ​នៃ​សាកល​វិទ្យាល័យ Jungwon នៅប្រទេសកូរ៉េខាងត្បូង ដើម្បីផ្លាស់ប្តូរ​យោបល់​លើ​លទ្ធភាព​នៃ​ឱកាស​បង្កើត​កិច្ចសហប្រតិបត្តិការទ្វេភាគី ជាពិសេសលើការលើកកម្ពស់ការអភិវឌ្ឍជំនាញ និង​សមត្ថ​ភាពធនធានមនុស្សតាមរយៈវិស័យអប់រំបណ្តុះបណ្តាលជំនាញបច្ចេកទេស និងវិជ្ជាជីវៈ (TVET)។

ក្នុងឱកាសនោះ ឯកឧត្តមរដ្ឋមន្រ្តី បានលើកឡើងពីសារៈសំខាន់នៃកម្មវិធី ធីវ៉េត នៅក្នុង​ការ​អភិវឌ្ឍ​​ធន​ធានមនុស្ស និងប្រទេសជាតិ ជាពិសេសនៅក្នុងដំណាក់កាលដំបូង។ នៅដំណាក់​កាល​ដំបូង​នៃបដិវត្តឧស្សាហកម្មពឹងផ្អែកលើ ធីវ៉េត ដែលត្រូវការពេលបណ្តុះបណ្តាលរយៈពេលខ្លី ដើម្បី​អាចទទួលបានការងារធ្វើភ្លាមៗសម្រាប់ប្រជាពលរដ្ឋ។

ឯកឧត្តម មានប្រសាសន៍បន្តថា ប្រព័ន្ធ ធីវ៉េត កម្ពុជា មានចាប់ពីកម្រិតវិញ្ញាបនបត្រវិជ្ជាជីវៈ រហូត​ដល់​សញ្ញា​បត្របច្ចេកទេស និងវិស្វកម្មអនុវត្ត ហើយនៅក្នុងអាណត្តិនេះ កម្ពុជាកំពុងផ្តល់​អាទិភាព​ច្រើន​លើកម្រិតវិញ្ញាបនបត្រ ជាជាងថ្នាក់បរិញ្ញាបត្រ ពីព្រោះកម្ពុជាចង់ប្រើប្រាស់កម្មវិធី ធីវ៉េត ជាមធ្យោបាយសម្រាប់ភ្ជាប់គ្រួសារក្រីក្រ ទៅកាន់ទីផ្សារការងារ ដោយផ្តល់ជំនាញសមស្រប ដែល​អាចជួយឲ្យពួកគាត់ទទួលបានការងារក្នុងប្រព័ន្ធផ្លូវការ ដែលអាចផ្តល់អត្ថប្រយោជន៍ច្រើន លើស​ពី​ប្រាក់ឈ្នួល។ លើសពីនេះ រាជរដ្ឋាភិបាលកម្ពុជា កំពុងវិនិយោគ​យ៉ាង​ខ្លាំង​លើ​ការ​អភិវឌ្ឍ​ជំនាញ និងបណ្តុះបណ្តាលវិជ្ជាជីវៈ តាមរយៈម្មវិធី ធីវ៉េត នេះដែរ ដែល​ផ្តល់​ជំនាញ​ដោយ​ឥត​គិត​ថ្លៃ និងបត់បែនដល់យុវជន ព្រមទាំងកម្លាំងពលកម្មស្របតាមតម្រូវការ និង​ការ​ផ្លាស់​ប្តូរ​ឧស្សា​ហកម្ម​ទីផ្សារ​ការងារ។

ជាការឆ្លើយតប លោក គីវ៉ុន ចាង បានលើកឡើងថា លោកមានបទពិសោធជាច្រើននៅក្នុងវិស័យ ធីវ៉េត តាមរយៈការងារផ្នែកអប់រំនៅក្នុងប្រទេសកូរ៉េ នៅអង្គការអន្តរជាតិ និងនៅបរទេសផងដែរ។ ហេតុ​នេះ លោកមានការយល់ដឹងយ៉ាងច្បាស់ពីភាពចាំបាច់នៃ ធីវ៉េត ក្នុងដំណើរ​ការ​អភិវឌ្ឍ​ប្រទេស​ ហើយលោកក៏ចាប់អារម្មណ៍យ៉ាងខ្លាំងលើតួនាទីរបស់ក្រសួងការងារ និង​បណ្តុះ​បណ្តាល​វិជ្ជា​ជីវៈ ​ជាពិសេសទាក់ទងនឹងវិស័យ ធីវ៉េត នេះ។

ក្នុងឱកាសនោះ ភាគីទាំងពីរសង្ឃឹមថា នឹងបង្កើតកិច្ចសហប្រតិបត្តិការដ៏ល្អមួយនាពេលអនាគត ដើម្បី​រួមគ្នាលើកកម្ពស់កម្មវិធី ធីវ៉េត ជាលក្ខណៈទ្វេភាគីរវាងប្រទេសកូរ៉េ និងកម្ពុជា៕ អត្ថបទ៖ ឈិត បូរ៉ាវី