ប្រធានក្រុមការងារចុះមូលដ្ឋានខេត្តកែប លើកទឹកចិត្តកសិករឱ្យពង្រីក​ការចិញ្ចឹមសត្វ​ដើម្បី​លើក​កម្ពស់​ជីវភាព

កែប៖ ឯកឧត្តមឧបនាយករដ្ឋមន្ត្រី សាយ សំអាល់ ប្រធានក្រុមការងាររាជរដ្ឋាភិបាល​ចុះមូលដ្ឋាន​ខេត្តកែប​បានលើកទឹកចិត្តដល់ប្រជាកសិករនៅខេត្តកែប ឲ្យខិតខំ​បន្ត​ពង្រីក​មុខរបរ​ចិញ្ចឹម​សត្វ​របស់​ខ្លួនបន្ថែមទៀត ដើម្បីផ្គត់ផ្គង់តម្រូវការប្រើប្រាស់នៅក្នុងស្រុក និងដើម្បី​លើក​កម្ពស់​ជីវភាព​គ្រួសារ ឲ្យកាន់តែប្រសើរ។

នាថ្ងៃទី២៩ ខែមីនា ឆ្នាំ២០២៦ ឯកឧត្តមឧបនាយករដ្ឋមន្ត្រី សាយ សំអាល់ ប្រធានក្រុម​ការងារ​ថ្នាក់ជាតិចុះមូលដ្ឋានខេត្តកែប បានចុះពិនិត្យស្ថានភាពជាក់ស្តែង នៅទីតាំង​កសិករ​ចិញ្ចឹម​មាន់​យក​កូន ​ស្ថិតនៅក្រុងកែប ខេត្តកែប ដែលមានមេពូជ ប្រមាណ១៨០ក្បាល ហើយគ្រោង​បន្ថែម​អោយ​បាន​គ្រប់​៣០០មេពូជ នៅដើមខែក្រោយ។ បន្ទាប់មកបន្តទៅពិនិត្យ និងសួរសុខទុក្ខ កសិករ​ចិញ្ចឹមក្រួចនៅស្រុកដំណាក់ចង្អើរ ដែលកំពុងចិញ្ចឹមសត្វក្រួចយកសាច់ ជិត១​ពាន់​ក្បាល​ទៀត​។

បន្ទាប់ពីបានពិនិត្យ សួរនាំ កសិករ និងមន្ត្រីជំនាញ អាជ្ញាធរមូលដ្ឋាន ឯកឧត្តម​ឧប​នាយក​រដ្ឋ​មន្រ្តី សាយ សំអាល់ បានជំរុញឱ្យកសិកបន្តខិតខំប្រឹងប្រែងពង្រីកការចិញ្ចឹមសត្វ ឲ្យបាន​ច្រើន​ដើម្បី​ធានា​សុវត្ថិភាព និងសន្តិសុខស្បៀងអាហារ ម្យ៉ាងទីផ្សារ​កំពុង​មានត​ម្រូវ​ការ​ច្រើន​ក្នុង​បរិបទ​បច្ចុប្បន្ន។ ការនាំគ្នាចិញ្ចឹមសត្វមិនត្រូវតែបានចូលរួមលើកកម្ពស់ និង​ធានា​ដល់​សន្តិសុខ​ស្បៀង​អាហារ​ក្នុង​ស្រុកទេ ថែមទាំងជំរុញដល់វិស័យទេសចរណ៍ និងសេដ្ឋកិច្ចគ្រួសារ និងមូលដ្ឋាន​ផង​ដែរ​។

ទន្ទឹមនឹងនោះ ឯកឧត្តមក៏បានណែនាំឲ្យអាជ្ញាធរ មន្ត្រីជំនាញឲ្យជួយពង្រីកគំរូចិញ្ចឹមនេះ ទៅ​ដល់​សាលា​រៀន ដោយភ្ជាប់ជាមួយកម្មវិធីបំណិនជីវិតជូនសិស្សានុសិស្ស ដើម្បីឱ្យយុវជន​ទទួល​បាន​ទាំង​ចំណេះដឹង និងជំនាញអនុវត្តជាក់ស្តែង ដែលអាចយកទៅប្រើប្រាស់ក្នុងជីវិតប្រចាំថ្ងៃ និង​អនាគត​បាន​៕ អន សារីម