វិទ្យាស្ថាន NPIT ពង្រីកកិច្ចសហការជាមួយវិស័យឯកជន ដើម្បីជំរុញលើការអភិវឌ្ឍជំនាញកាន់តែប្រសើរ

វិទ្យាស្ថានជាតិពហុបច្ចេកទេសតេជោសែន ហៅកាត់ NPIT នៃក្រសួងការងារ និងបណ្តុះបណ្តលវិជ្ជាជីវៈ បានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយក្រុមហ៊ុន ទន្សាយ សឹលូសិន (Tunsai Solutions Co., Ltd.) ដើម្បីពង្រឹងកិច្ចសហប្រតិបត្តិការលើការអភិវឌ្ឍជំនាញ ការចុះអនុវត្តការងារជាក់ស្តែង និងការត្រៀមលក្ខណៈសម្រាប់អាជីពការងាររបស់និស្សិតឱ្យកាន់តែមានប្រសិទ្ធិភាព។

លោក ច្រឹង ណាវី នាយកវិទ្យាស្ថានជាតិពហុបច្ចេកទេសតេជោ សែន នៅក្រោយចប់កម្មវិធីកាលពីព្រឹកថ្ងៃទី១ ខែមេសា ឆ្នាំ២០២៦នេះ បានមានប្រសាសន៍ប្រាប់ព័ត៌មាន ប៊ីធីវី ឱ្យដឹងថា គោលបំណងនៃការចុះ MoU នេះ គឺដើម្បីពង្រីកកិច្ចសហការជាមួយគ្នាលើការផ្ដល់ឱកាសចុះកម្មសិក្សា និងការស្រាវជ្រាវ ការពិចារណាផ្ដល់ឱកាសការងារសម្រាប់និស្សិត និងសិក្ខាកាមដែលមានសមត្ថភាពមានលក្ខណៈសម្បត្តិគ្រប់គ្រាន់សម្រាប់ឱកាសកម្មសិក្សា និងការងារ។ បន្ថែមពីនេះ ដើម្បីជួយពង្រឹងការផ្សារភ្ជាប់គ្នា រវាងការបណ្តុះបណ្តាលនិងការងារ ក៏ដូចជាផ្តល់ឱ្យនិស្សិតនូវការយល់ដឹងកាន់តែច្បាស់អំពីតម្រូវការជាក់ស្តែងនៅកន្លែងធ្វើការ។

លោកនាយក បានបញ្ជាក់បន្ថែមថា ភាពជាដៃគូនេះ ឆ្លុះបញ្ចាំងពីសារៈសំខាន់នៃកិច្ចសហប្រតិបត្តិការកាន់តែជិតស្និទ្ធ រវាងគ្រឹះស្ថាន TVET និងវិស័យឧស្សាហកម្ម ក្នុងការកសាងជំនាញអនុវត្តជាក់ស្តែង និងការត្រៀមខ្លួនសម្រាប់កន្លែងធ្វើការ។ សម្រាប់ក្រុមហ៊ុន ទន្សាយ គឺជាផ្នែកមួយនៃកិច្ចខិតខំប្រឹងប្រែងឱ្យកាន់តែទូលំទូលាយក្នុងការពង្រឹងស្តង់ដារ អភិវឌ្ឍធនធានមនុស្ស និងកសាងទំនុកចិត្តតាមរយៈគុណភាពសេវាកម្ម វិន័យ និងការអនុវត្តការងារ ក្នុងវិស័យសម្អាត និងថែទាំអចលនទ្រព្យនៅក្នុងប្រទេសកម្ពុជា។

បើតាម លោក សោម សុខដារ៉ារីគីអូ ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន ទន្សាយ បានលើកឡើងឱ្យដឹងថា ភាពជាដៃគូនេះ នឹងចាប់ផ្តើមជាមួយនឹងកម្មវិធីសាកល្បងដែលមានរចនាសម្ព័ន្ធច្បាស់លាស់ រាប់ចាប់តាំងពីការសម្រាំងបេក្ខជន ការបណ្តុះបណ្តាលការងារជាក់ស្តែង និងការវាយតម្លៃ។ គោលដៅរបស់ក្រុមហ៊ុន គឺធ្វើឱ្យកិច្ចសហប្រតិបត្តិការនេះមានភាពសាមញ្ញ និងមានប្រសិទ្ធភាព ដោយផ្តល់ឱកាសអាជីពសម្រាប់កម្លាំងពលកម្មបច្ចេកទេសដែលមានជំនាញមកពីវិស័យ TVET។ ជាពិសេសផ្តោតសំខាន់ទៅលើការកសាងស្តង់ដារសេវាកម្មឱ្យកាន់តែរឹងមាំ និងកម្លាំងពលកម្មដែលមានសមត្ថភាពខ្ពស់។

សូមបញ្ជាក់ថា ក្រុមហ៊ុន ទន្សាយ សឹលូសិន គឺជាក្រុមហ៊ុនផ្តល់សេវាកម្មសម្អាត និងថែទាំអចលនទ្រព្យដែលមានមូលដ្ឋាននៅភ្នំពេញ ហើយបេសកកម្មរបស់ក្រុមហ៊ុន គឺការផ្តល់នូវដំណោះស្រាយប្រកបដោយទំនុកចិត្ត៕អត្ថបទ៖ ឈិត បូរ៉ាវី