សាខាកាកបាទក្រហមកម្ពុជាខេត្តបាត់ដំបង ចូលរួមរំលែកទុក្ខគ្រួសារសពប្រជាពលរដ្ឋ៥នាក់ដែលស្លាប់ដោយគ្រោះថ្នាក់ចរាចរណ៍នៅស្រុកមោងឬស្សី

នៅព្រឹកថ្ងៃទី១ខែមេសា ឆ្នាំ២០២៦​ ឯកឧត្តម​ សុខ លូ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបងបានចាត់ ឯកឧត្តម ផេង សិទ្ធី អនុប្រធានអចិន្រ្តៃយ៍គណ:កម្មាធិការសាខា​ និងសហការីចូលរួមរំលែកមរណទុក្ខដ៏ក្រៀមក្រំបំផុតជាមួយក្រុមគ្រួសារសពប្រជាពលរដ្ឋចំនួន៥នាក់ដែលស្លាប់ដោយគ្រោះថ្នាក់ចរាចរណ៍កាលពីយប់ថ្ងៃទី២៧ខែមីនាឆ្នាំ២០២៦​ ក្នុង​អំឡុង​ពេលកំពុងធ្វើដំណើរត្រឡប់មកពីមើលការប្រគុំតន្រ្តីលុះមកដល់ចំណុះបង្គោលគីឡូលេខ២៤៦-២៤៧ត្រូវបានរថយន្តបុកពីក្រោយបណ្តាលឱ្យបាត់បង់អាយុជីវិតភ្លាមៗចំនួន៥នាក់និងរបួសធ្ងន់ធ្ងរកុមារ១នាក់ស្ថិតនៅភូមិកកោះឃុំកកោះស្រុកមោងឬស្សីខេត្តបាត់ដំបង ។

ក្នុងសមានទុក្ខដ៏ក្រៀមក្រំនេះឯកឧត្តម ផេង សិទ្ធី បានពាំនាំនូវការរំលែកទុក្ខដ៏ក្រៀមក្រំ​​ពីសំណាក់​ ឯកឧត្តម សុខ លូ ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ជាមួយក្រុមគ្រួសារសព និងសូម ឧទ្ទិសបួង សួងដល់ដួងវិញ្ញាណក្ខន្ធ​សព​ បានចាប់កំណើត​ក្នុង​សុគតិភពកុំបីឃ្លៀងឃ្លាតឡើយ។​

ជាមួយគ្នានេះ​ឯកឧត្តម ក៏បានលើកទឹកចិត្តដល់ក្រុមគ្រួសារសព ឱ្យមានភាពរឹងមាំបន្តប្រកបរបរចិញ្ចឹមជីវិត​ និងទំនុកបម្រុងក្រុមគ្រួសារ ដើម្បីអនាគតភ្លឺស្វាង​ និងថែទាំសុខភាព និងពង្រឹងស្មារតីកម្លាំងកាយចិត្តឲ្យបានល្អ ព្រោះត្រូវទទួល បន្ទុក មេីលថែនិងផ្តល់ភាពកក់ក្តៅជាក្តីសង្ឃឹមតទៅមុខទៀត ។

សូមជម្រាបថា​ ពាក់ព័ន្ធ​ករណី​គ្រោះថ្នាក់​ចរាចរណ៍​នេះ​ កាលពី​ថ្ងៃទី​៣១​ ខែមីនា​ ឆ្នាំ២០២៦​ អ្នកនាំពាក្យ​នៃ​ស្នងការដ្ឋាន​នគរបាល​ខេត្តបាត់ដំបងចេញ​សេចក្ដី​ប្រកាស​ព័ត៌មាន​ដោយសន្និដ្ឋានថា ឈ្មោះ ស៊ីវ ជ័យសិដ្ឋ ពិតជាបានបើកបររថយន្តបង្កគ្រោះថ្នាក់បណ្តាលឱ្យស្លាប់ និងរបួសសរុបជនរងគ្រោះស្លាប់ចំនួន៥នាក់ប្រុសចំនួន២នាក់ស្រីចំនួន០៣នាក់ ដែលក្នុងនោះស្រីម្នាក់មាន គភ៌ចំនួន៣ខែផង (តាមប្រភពពីក្រុមគ្រួសារសព) និងរងរបួសធ្ងន់ចំនួន១នាក់ប្រុស ជនរងគ្រោះទាំងអស់ រស់នៅភូមិកកោះឃុំកកោះ ស្រុកមោងឫស្សីខេត្តបាត់ដំបង។ គិតត្រឹមម៉ោង១០៖៣០នាទីព្រឹកថ្ងៃទី១​ខែមេសា​ឆ្នាំ​២០២៦នេះ ជនបង្កបើករថយន្ដបុកមនុស្សស្លាប់៦នាក់ នៅខេត្តបាត់ដំបង ដែលជាកូនស្នងការរងនៅខេត្តបន្ទាយមានជ័យ មិនទាន់ឃាត់ខ្លួន និងមកបង្ហាញខ្លួននៅឡើយនោះទេ៕