អភិបាលខេត្តកណ្តាល ចុះពិនិត្យទីតាំងការដ្ឋានសាងសង់ និងកែលម្អច្រាំងស្ទឹងព្រែកត្នោត

នៅព្រឹកថ្ងៃទី០២ ខែមេសា ឆ្នាំ២០២៦ ឯកឧត្តម គួច ចំរើន អភិបាល នៃ​គណៈ​អភិបាល​ខេត្ត​កណ្តាល ​ព្រមទាំងមន្ទីរជំនាញពាក់ព័ន្ធ និងអាជ្ញាធរក្រុងតាខ្មៅ ចុះពិនិត្យទីតាំងការដ្ឋានសាងសង់ និង​កែ​លម្អច្រាំងស្ទឹងព្រែកត្នោតប៉ែកខាងត្បូងស្ទឹង ក្នុងសង្កាត់តាខ្មៅ ក្រុងតាខ្មៅ ខេត្តកណ្ដាល។

ក្នុងឱកាសចុះត្រួតពិនិត្យនោះ ឯកឧត្តម គួច ចំរើន បានធ្វើការណែនាំ និងផ្តាំ​ផ្ញើ​ដល់​ក្រុម​ការងារ​សាង​សង់​ត្រូវយកចិត្តទុកដាក់ ខ្ពស់ ក្នុងការសាងសង់ច្រាំងស្ទឹង ដោយអនុវត្តឲ្យបានត្រឹមត្រូវ តាម​បទ​ដ្ឋាន​បច្ចេកទេស សំដៅធានាបាននូវសុវត្ថិភាព និងមានគុណភាពរឹងមាំល្អ ព្រមទាំង​សាង​សង់​ឲ្យ​សម្រេច​រួច​រាល់ជាស្ថាពរតាមផែនការដែលបានគ្រោងទុក។

គួរបញ្ជាក់ដែរថា តាមមន្ត្រីជំនាញបច្ចេកទេសបានឲ្យដឹងថា គម្រោង​ស្ថាបនា​កែលម្អ​ច្រាំង​ស្ទឹង​ព្រែក​ត្នោត​ប៉ែកខាងត្បូងស្ទឹង ក្នុងក្រុងតាខ្មៅ ខេត្តកណ្តាល កំពុងសាង​សង់​ដោយ​យក​ចិត្ត​ទុក​ដាក់ ​និងមិនមានអ្វីរំខានឡើយ និងបញ្ចប់​ការ​សាង​សង់​តាម​កាល​វិភាគ​ដែល​បាន​គ្រោង​ទុក​នា​ពេល​ខាង​មុខនេះ៕