ក្រសួងកសិកម្មជំរុញលើកទឹកចិត្តឱ្យប្រជាកសិករប្រើប្រាស់ថាមពលសូឡា ក្នុងបរិបទតម្លែប្រេងឥន្ធនៈឡើងថ្លៃ

មន្រ្តីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ បានជំរុញលើកទឹកចិត្តឱ្យប្រជាកសិករងាកមកប្រើប្រាស់ថាមពលសូឡាសម្រាប់បូបទឹកស្រោចស្រពដំណាំ ក្នុងអំឡុងពេលតម្លៃនិងការផ្គត់ផ្គង់ប្រេងឥន្ធនៈជាសកលមិនមានស្ថិរភាព ដោយសារ សង្គ្រាមនៅមជ្ឈឹមបូព៌ា។ ជាពិសេស ក្រសួងកសិកម្មកំពុងជំរុញការប្រើប្រាស់ថាមពលសូឡានៅក្នុងសហគមន៍កសិកម្មទំនើប។

សព្វថ្ងៃនេះ បច្ចេកវិទ្យាថាមពលព្រះអាទិត្យកំពុងរីកចម្រើនជាមួយនឹងតម្រូវការជាបន្តបន្ទាប់ពីវិស័យផ្សេងៗ ជាពិសេស វិស័យកសិកម្មនៅកម្ពុជា។ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានប្រាប់ BTV ថា ការប្រែក្លាយពីការប្រើប្រាស់ម៉ាស៊ីនបូមទឹកដើរដោយប្រេងម៉ាស៊ូត ទៅប្រើប្រាស់ថាមពលសូឡាគឺជាគោលនយោបាយទូទៅក្រសួងកសិកម្ម រុក្ខាប្រមាញ់ និងនេសាទ ដែលក្រសួងតែងតែជំរុញលើកទឹកចិត្តដល់ប្រជាកសិករជាប្រចាំ។ ក្នុងបរិបទនេះ ក្រសួងកសិកម្ម កំពុងពន្លឿនក្នុងការផ្លាស់ប្តូរទៅប្រើប្រាស់ថាមពលសូឡា ដើម្បីបូមទឹកស្រោចស្រពដំណាំ ជាពិសេស ក្នុងចំណោមសហគមន៍កសិកម្មទំនើប។

បច្ចុប្បន្ន ការប្រើប្រាស់ថាមពលសូឡា ក្នុងវិស័យកសិកម្មនៅកម្ពុជា នៅតែមានកម្រិតទាប ដែលប្រជាកសិករប្រើប្រាស់ជាចម្បងសម្រាប់បូមទឹកស្រោចស្រពដំណាំ។ ទោះបីយ៉ាងណា ការប្រើប្រាស់ថាមពលសូឡា កំពុងកើនឡើងបន្តិចម្តង់ៗ ដោយសារ កត្តាតម្លៃប្រេង និងឧស្ម័នកើនឡើង ហើយបច្ចេកវិទ្យាសូឡាកាន់តែមានតម្លៃសមរម្យ ស្របពេលមានគម្រោងគាំទ្រពីរាជរដ្ឋាភិបាល និងដៃគូអភិវឌ្ឍន៍នានា៕

អត្ថបទ៖ ធូ វិរៈ