អនុប្រធានក្រុមការងាររាជរដ្ឋាភិបាលចុះមូលដ្ឋានអញ្ជេីញសំណេះសំណាល និងបំពាក់គ្រឿងឥស្សរិយយសជូនមន្រ្តីរាជការចំនួន១៤៨ រូប នៃរដ្ឋបាលស្រុកកណ្ដាលស្ទឹង ខេត្តកណ្ដាល

(កណ្ដាល)៖ នៅព្រឹកថ្ងៃសៅរ៍ ទី៤ ខែមេសា ឆ្នាំ២០២៦ ឯកឧត្តមលោកអ្នកឧកញ៉ា បណ្ឌិត ទ្រី ភាព អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកកណ្ដាលស្ទឹង តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ កិត្តិសង្គហបណ្ឌិត ហ៊ីង ប៊ុនហៀង បានអញ្ជើញសំណេះសំណាល និងបំពាក់់គ្រឿងបំពាក់គ្រឿងឥស្សរិយយសជូនមន្រ្តីរាជការ និងមន្ត្រីជាប់កិច្ចសន្យានៃរដ្ឋបាលស្រុកកណ្ដាលស្ទឹង ខេត្តកណ្ដាល ដែលមានសមាសភាពអ្នកអញ្ជើញចូលរួមប្រមាណ ៣០០នាក់។

ថ្លែងក្នុងពិធីនេះដែរ លោកអ្នកឧកញ៉ា បណ្ឌិត ទ្រី ភាព បានមានប្រសាសន៍លើកទឹកចិត្តដល់មន្រ្តីរាជការនៃរដ្ឋបាលស្រុកកណ្ដាលស្ទឹងទាំងអស់ ដែលបានខិតខំបំពេញការងារយ៉ាងយកចិត្តទុកដាក់ក្នុងការបម្រើសេវាសាធារណៈជូនដល់ប្រជាពលរដ្ឋក្នុងមូលដ្ឋាន។ លោកអ្នកឧកញ៉ា បណ្ឌិត ក៏បានបន្ថែមទៀតថា ការទទួលបានគ្រឿងឥស្សរិយយសនេះគឺជាការបង្ហាញយ៉ាងច្បាស់ពីការយកចិត្តទុកដាក់របស់ថ្នាក់ដឹកនាំចំពោះបងប្អូនមន្ត្រីរាជក្នុងមូលដ្ឋាន។

លោកអ្នកឧកញ៉ាបណ្ឌិត បានស្នើសុំឱ្យមន្ត្រីរាជការខិតខំឱ្យអស់ពីសមត្ថភាពក្នុងការបំពេញការងារបន្ថែម ពោលគឺត្រូវប្រាកដថា ប្រជាពលរដ្ឋក្នុងមូលដ្ឋានបានទទួលសេវាសាធារណៈគ្រប់ៗគ្នា និងស្មើភាពគ្នា។ ក្នុងឱកាសនេះ លោកអ្នកឧកញ៉ា បណ្ឌិត ទ្រី ភាព បាននាំយកអំណោយជាថវិកាមួយចំនួនជូនដល់គណបក្សស្រុក គណបក្សឃុំទាំង ១៨ កងកម្លាំងទាំង ៣ អង្គភាព ប្រជាការពារ និងសមាសភាពអញ្ជើញចូលលរួមទាំងអស់ផងដែរ។ សូមជម្រាបជូនផងដែរថា កម្មវិធីនេះចំណាយថវិកាអស់ប្រមាណ ១៥០ លានរៀល៕