រដ្ឋបាលស្រុកស្វាយទាប និងខេត្តតៃនិញ បន្តរួមគ្នាថែរក្សា សន្តិសុខ និងធ្វើការអភិវឌ្ឍន៍តាមព្រំដែន

រដ្ឋបាលឃុំ ព្រំដែនចំនួន៣ នៃខេត្តតៃនិញ (វៀតណាម) និងរដ្ឋបាលស្រុកស្វាយទាប ខេត្តស្វាយរៀង(កម្ពុជា) បានប្ដេជ្ញាបន្តថែរក្សាការពារសន្តិសុខសណ្ថាប់ធ្នាប់ព្រំដែនឲ្យមានសន្តិសុខល្អ និងធ្វើការអភិវឌ្ឍន៍លើគ្រប់វិស័យ ដើម្បីឆ្លើយតបទៅនឹងកិច្ចសហប្រតិបត្តិការកម្ពុជា វៀតណាម ក្នុងកិច្ចការរក្សាស្ថេរភាពសន្តិសុខនៅក្នុងតំបន់ ។

ការលើកឡើងរបស់មន្ត្រីរដ្ឋបាលឃុំ ព្រំដែនវៀតណាម និងរដ្ឋបាលស្រុកស្វាយទាប បែបនេះបានធ្វើឡើងក្នុងឱកាស រដ្ឋបាលស្រុកស្វាយទាប ប្រារព្ធពិធីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋសក័ ព.ស ២៥៧០ គ.ស ២០២៦ នៅសាលាស្រុកស្វាយទាប ថ្ងៃទី ៤ ខែមេសា ឆ្នាំ ២០២៦ ដោយមានការអញ្ជើញចូលរួមពីមន្ត្រីរដ្ឋបាលឃុំ ព្រំដែនវៀតណាម រួមមានឃុំ និញ ដៀន ឃុំឡុង ធីង និងឃុំឡុង ជី ខេត្តតៃនិញ និងមន្ត្រីរាជការក្នុងរដ្ឋបាលស្រុក លោក លោកស្រី មេឃុំ និងតំណាងក្រុមហ៊ុនវិនិយោគលើវិស័យកសិកម្មក្នុងស្រុកផងដែរ ។

លោក ជា ហ៊ាន អភិបាលស្រុកស្វាយទាប បានមានចំណាប់អារម្មណ៏សំណេះសំណាលដោយសំដែង អបអរសាទរចំពោះរដ្ឋបាលឃុំទាំង៣ របស់វៀតណាម ដែលបានបន្តអនុវត្តគោលការ ថែរក្សាការពារសន្តិសុខ និងធ្វើការអភិវឌ្ឍន៏លើគ្រប់វិសយ័ តាមខ្សែបន្ទាត់ព្រំដែន បន្ទាប់ពី វៀតណាម បានអនុវត្តគោលនយោបាយរួមបញ្ចូលខេត្តចំនួន២នៅសល់តែខេត្ត១ហើយគ្មានរដ្ឋបាលស្រុកនៅសល់ត្រឹមរដ្ឋបាលឃុំ។

លោកអភិបាលស្រុកក៏បានបញ្ជាក់ថាកន្លងមកស្រុកស្វាយទាប មានប្រពៃណីសាមគ្គីភាពឧបត្ថម្ភរវាងស្រុក និងស្រុករវាងឃុំនិងឃុំ លើវិសយសង្គមកិច្ច ទេសចរ និងកសិកម្មបង្កឲ្យស្រុកនិងភូមិរបស់ពលរដ្ឋកម្ពុជានៅតាមខ្សែព្រំដែន ធ្វើការផ្លាស់ប្ដូរទំនិញ និងកសិផលប្រកបដោយសុខដុមរម្យនារួមសាមគ្គីនិងមិត្តភាពល្អ។

សូមបញ្ជាក់ថាស្រុកស្វាយទាប ជាស្រុកមួយដែលរដ្ឋបាលខេត្តស្វាយរៀង ចាត់បញ្ចូលក្នុងប៉ូលកសិកម្ម ដែលក្នុង១ឆ្នាំទៅ១ឆ្នាំ កសិករបាននាំអពៅស្ករទៅលក់ដោះដូរ នៅរោងចក្រផលិតអំពៅស្ករ រាប់ម៉ឺនតោន ដើម្បីប្រមូលថវិកាយកមកធ្វើការអភិវឌ្ឍន៍មូលដ្ឋានក្នុងស្រុក។