អង្គការយូណេស្កូកំពុងរៀបចំមូលនិធិសង្រ្គោះបន្ទាន់សម្រាប់ជួយជួសជុលប្រាសាទព្រះវិហារ

អង្គការយូណេស្កូ កំពុងរៀបចំមូលនិធិសង្គ្រាះបន្ទាន់ផ្តល់មកប្រទេសកម្ពុជា ដើម្បីជួសជុលប្រាសាទព្រវិហារ ដែលរងផលប៉ះពាល់ដោយសារសង្រ្គាមឈ្លានពានពីប្រទេសថៃ។ នេះបើតាមការឱ្យដឹងពីអគ្គនាយកអាជ្ញាធរជាតិព្រះវិហារ។

ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ បានថ្លែងថា កាលពីចុងខែមីនា ឆ្នាំ២០២៦ អង្គការយូណេស្កូ បានបញ្ជូនអ្នកជំនាញមកវាយតម្លៃពីផលប៉ះពាល់នៃប្រាសាទព្រះវិហារ បន្ទាប់ពីប្រទេសកម្ពុជា បានដាក់លិខិតទៅអង្គយូណេស្កូ តាំងពីផ្ទុះសង្គ្រាមលើកទី១ ដោយសារការឈ្លានពានរបស់ភាគីថៃ។ ប្រសាសន៍ដូច្នេះនេះ បានធ្វើឡើងក្នុងវេទិកាសារព័ត៌មាន ដែលរៀបចំដោយក្លិបអ្នកការសែតកម្ពុជា លើប្រធានបទ «ការខូចខាតប្រាសាទព្រះវិហារ សម្បត្តិបេតិកភណ្ឌពិភពលោក» នៅទីស្ដីការក្រសួងវប្បធម៌ និងវិចិត្រសិល្បៈ។

ឯកឧត្តម គង់ ពុទ្ធិការ បានបញ្ជាក់ថា បច្ចុប្បន្ន អង្គការយូណេស្កូ កំពុងកៀរគររៀបចំមូលនិធិសង្គ្រាះបន្ទាន់ផ្តល់ដល់កម្ពុជា ដើម្បីជួសជុលប្រាសាទព្រះវិហារ ដែលរងការខូចខាតដោយសារថៃទម្លាក់គ្រាប់បែកលើ។ ដោយឡែក ចំពោះសំណងដែលភាគីថៃនឹងផ្តល់មកប្រទេកម្ពុជា ត្រូវប្រើរយៈពេលយូរ និងផ្អែកលើភស្តុតាងដែលត្រូវការប្រើប្រាស់អ្នកជំនាញច្បាប់។

គួរបញ្ជាក់ដែរថា សង្គ្រាមឈ្លានរបស់ប្រទេសថៃមកលើប្រទេសកម្ពុជា លើកទី១ ចាប់ពីថ្ងៃទី២៤-២៨ខែកក្កដា ឆ្នាំ២០២ បានធ្វើឱ្យប្រាង្គប្រាសាទព្រះវិហារខូចខាត ១៤២កន្លែង និងសង្រ្គាមលើកទី២ ចាប់ពីថ្ងៃទី៧-២៧ខែធ្នូ ឆ្នាំ២០២៥ បានធ្វើឱ្យប្រាង្គប្រាសាទព្រះវិហារខូចខាតចំនួន ៤២០ កន្លែងផ្សេងទៀត៕

អត្ថបទ៖ ទូច សោភ័ណ