អាជ្ញាធរ និងកងកម្លាំងភ្នំពេញបន្តប្រជុំដាក់ផែនការបង្ក្រាប online scams ខណៈបានបញ្ជូនមនុស្ស ១៤០នាក់ទៅតុលាការ

អាជ្ញាធរ និងកងកម្លាំងមានសមត្ថកិច្ចរាជធានីភ្នំពេញបន្តប្រជុំដាក់ផែនការបង្ក្រាប online scams ខណៈបានកសាងសំណុំរឿងបញ្ជូនមនុស្ស ១៤០នាក់ទៅតុលាការ ដែលមាន ២២ករណី។

ឯកឧត្ដម ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ បានណែនាំឱ្យគណៈបញ្ជាការឯកភាពខណ្ឌទាំង១៤ ប្រើប្រាស់ជំនាញរបស់ខ្លួននៅតាមខណ្ឌឱ្យអស់លទ្ធភាព ពិសេសសហការជាមួយប្រជាពលរដ្ឋ សំដៅធ្វើយ៉ាងណាបោសសម្អាតបទល្មើសឆបោកតាមប្រព័ន្ធបច្ចេកវិទ្យាឱ្យអស់ពីមូលដ្ឋានររាជធានីភ្នំពេញ។

ការណែនាំបែបនេះរបស់ ឯកឧត្ដម ឃួង ស្រេង បានធ្វើឡើងក្នុងកិច្ចប្រជុំស្តីពីវឌ្ឍនភាពការងារបង្ក្រាបការឆបោកតាមប្រព័ន្ធបច្ចេកវិទ្យា នារសៀលថ្ងៃទី៧ ខែមេសា ឆ្នាំ២០២៦ នៅសាលារាជធានីភ្នំពេញ។

ឯកឧត្ដម ឃួង ស្រេង មានប្រសាសន៍ថា កិច្ចប្រជុំនេះ ធ្វើឡើងដើម្បីដកស្រង់បទពិសោធន៍ រកចំណុចខ្លាំង ចំណុចខ្សោយ ដែលអាជ្ញាធរ និងកងកម្លាំងបាននឹងកំពុងអនុវត្ត សំដៅធ្វើយ៉ាងណាឱ្យរាជធានីភ្នំពេញគ្មានបទល្មើសឆបោកតាមប្រព័ន្ធបច្ចេកវិទ្យា នៅក្នុងមូលដ្ឋានបន្តទៀត។ បទល្មើសឆបោកតាមប្រព័ន្ធបច្ចេកវិទ្យា មិនមែនអនុវត្តត្រឹមខែមេសានេះទេ គឺត្រូវធ្វើរហូតនិងជាប្រចាំ ដោយជឿជាក់ថា ១ខែ ឬ២ខែទៀត បទល្មើសឆបោកតាមប្រព័ន្ធបច្ចេកវិទ្យា អាចនឹងអស់ពីរាជធានីភ្នំពេញ។

ឯកឧត្ដម ឃួង ស្រេង បានបន្តទៀតថា ខណ្ឌទាំង១៤ត្រូវដាក់ផែនការឱ្យបានច្បាស់លាស់ ដោយសហការជាមួយស្នងការនគរបាលរាជធានីភ្នំពេញ ពិសេសធ្វើយ៉ាងណាឱ្យប្រជាពលរដ្ឋបានចូលរួមសហការជាមួយកងម្លាំង និងអាជ្ញាធរ ព្រោះគ្មានកម្លាំងអ្វីខ្លាំងជាងកម្លាំងប្រជាពលរដ្ឋចូលរួមនោះទេក្នុងការស៊ើបអង្កេតរកទីតាំងOnline Scams។ តាមបទបញ្ជាលេខ០១ កុំថាឡើយពាក់ព័ន្ធជាមួយបទល្មើសឆបោកតាមប្រព័ន្ធបច្ចេកវិទ្យា សូម្បីតែមិនអនុវត្តតាមបទបញ្ជាលេខ០១នេះ ក៏ខុសដែរ ដូច្នេះអាជ្ញាធរ និងកងកម្លាំងត្រូវប្រើប្រាស់ឱ្យអស់មធ្យោបាយ ទាំងការផាកពិន័យ និងការដាក់ទោសទណ្ឌទៅលើម្ចាស់ទីតាំងជាដើម ដើម្បីឈានទៅបោសសម្អាត បទល្មើសឆបោកតាមប្រព័ន្ធបច្ចេកវិទ្យាឱ្យអស់ពីរាជធានីភ្នំពេញ។

ឧត្តមសេនីយ៍ ជួន ណារិន អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានបញ្ជាក់ឱ្យដឹងថា បទល្មើសឆបោកតាមប្រព័ន្ធបច្ចេកវិទ្យា គឺបានបង្ក្រាបជាបន្តបន្ទាប់ ដោយគិតពីថ្ងៃទី៣ ខែកុម្ភៈ មកដល់ថ្ងៃទី៧ ខែមេសា ឆ្នាំ២០២៦ បានឃាត់ខ្លួនជនសង្ស័យពាក់ព័ន្ធនិងបទល្មើសឆបោកតាមប្រព័ន្ធបច្ចេកវិទ្យាបានចំនួន ១១៦៥នាក់ ក្នុងនោះបានបញ្ជូនទៅតុលាការចំនួន ២២ករណី ស្មើនិង ១៤០នាក់ មានខ្មែរចំនួន ៥៩នាក់ ដើម្បីដាក់ទោសទៅតាមច្បាប់៕

អត្ថបទ ៖ ប្រាក់ វ៉ាន់ដា