ទំនិញចម្រុះ៣០០ មុខ ត្រូវបានតាំងបង្ហាញក្នុងពិព័រណ៍ផលិតផលខ្មែរដ៏ធំ នៅកោះពេជ្រ នៅព្រឹកនេះ

ភ្នំពេញ៖ ផលិតផលក្នុងស្រុកចម្រុះប្រមាណ ៣០០មុខ ត្រូវបានដាក់តាំងបង្ហាញនៅក្នុងពិព័រណ៍ផលិតផលខ្មែរលើកទី៣ ក្រោមប្រធានបទ «រួមគ្នាផលិត រួមគ្នាប្រើប្រាស់ផលិតផលជាតិ» រៀបចំដោយសម័្ពន្ធសមាគមសហគ្រាសធុនតូច និងមធ្យមកម្ពុជា(FASMEC) ក្រោមអធិបតីភាព ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី តំណាងដ៏ខ្ពង់ខ្ពស់សម្តេចធិបតី ហ៊ុន ម៉ាណែត នាយករដ្ឋមន្រ្តី។

ព្រឹតត្តិការណ៍នេះ រៀបចំនៅមជ្ឈមណ្ឌលសាលសន្និបាត និងពិព័រណ៍កោះពេជ្រ មានរយៈពេល ៤ ថ្ងៃ ចាប់ពីថ្ងៃទី ៩ ដល់ថ្ងៃទី ១២ ខែមេសា ឆ្នាំ២០២៦។ សហគ្រិន ដែលចូលរួមតាំងពិព័រណ៍ បានប្រាប់ BTV ថា ផលិតផលខ្មែរទាំងអស់នេះគឺសាកសមសម្រាប់ប្រជាពលរដ្ឋទិញយកទៅសែនទទួលទេវតាឆ្នាំថ្មី ក្នុងឱកាសចូលឆ្នាំខ្មែរប្រពៃណីជាតិខាងមុខនេះ។ ជាមួយគ្នា សហគ្រិស បានអំពាវនាវដល់ប្រជាពលរដ្ឋអញ្ញើញឱ្យបានច្រើនកុះករក្នុងព្រឹត្តិការតាំងពិព័រណ៍ផលិតផលក្នុងស្រុក នៅកោះពេជ្រក្នុងរយៈពេល៤ថ្ងៃកន្លងមកនេះ។

សហគ្រិន លើកឡើងថា ៖« ក្នុងឱកាសពិធីបុណ្យចូលឆ្នាំខ្មែរប្រពៃណីជាតិ ខាងមុខ សូមឱ្យបងប្អូនប្រជាពលរដ្ឋគាំទ្រផលិតផលខ្មែរ យកទៅសែនទេវតាឆ្នាំថ្មី, យកទៅប្រគេនព្រះសង្ឃ, និងទិញជូនចាស់ៗ ជាដើម។ ចំពោះតម្លៃវិញ យើងមិនឡើងថ្លៃនោះទេគឺលក់ក្នុងតម្លៃសមរម្យជូន។ យើងសូមអំពាវនាវដល់ប្រជាពលរដ្ឋបន្តគាំទ្រផលិតផលខ្មែរថែមទៀត ដើម្បីសហគ្រាសមានកម្លាំងចិត្តក្នុងការផលិត និងដើម្បីសេដ្ឋកិច្ចជាតិរបស់យើង»។

ឧកញ៉ា តែ តាំងប៉ ប្រធានសម័្ពន្ធសមាគមសហគ្រាសធុនតូច និងមធ្យមកម្ពុជា (FASMEC) បានប្រាប់ BTV ថា ព្រឹត្តិការណ៍តាំងពិព័រណ៍ផលិតផលខ្មែរលើកទី៣ នេះ មានផលិតផលប្រមាណ ៣០០មុខ ដែលជាផលិតផលខ្មែរសុទ្ធ ១០០%។ នេះបង្ហាញឱ្យឃើញថា កម្ពុជាមានផលិតផលរបស់ខ្លួនកាន់តែច្រើនឡើងៗនៅលើទីផ្សារ។

ឧកញ៉ាមានប្រសាសន៍ថា៖ «មូលហេតុដែលយើងរៀបចំពិព័រណ៍មុនពិធីបុណ្យចូលឆ្នាំខ្មែរ យើងចង់ឱ្យប្រជាជនយើងទិញផលិតផលយកទៅចូលឆ្នាំនៅឯស្រុក។បច្ចុប្បន្ននេះ ផលិតផលជាតិយើងទទួលបាន ៣០% នៅទូទាំងប្រទេស អីចឹង ក្រោយពីយើងធ្វើពហិកា មិនប្រើប្រាស់របស់ថៃ គឺកំណើនមានការកើនឡើងច្រើនណាស់។ សូមឱ្យបងប្អូនប្រជាពលរដ្ឋខ្មែរទាំងអស់ ចូលរួមថ្ងៃនេះ ទាំងអស់គ្នា ដើម្បីជួយជៀវផលិតផលខ្មែរយកទៅខេត្តក្នុងឱកាសបុណ្យចូលឆ្នាំខ្មែរប្រពៃណីជាតិ»។

ក្នុងពិព័រណ៍នេះ មានស្តង់ចូលរួមជាង ៣០០ ដែលផលិតផលចម្រុះមុខ ដូចជា ផលិតផលចំណីអាហារ, គ្រឿងទេស, គ្រឿងអលង្ការ ប្រាក់ស្ពាន, ក្រម៉ា, និងភេសជ្ជៈ ជាដើម។ សហគ្រិនរំពឹងថា នឹងមានប្រជាពលរដ្ឋកាន់តែច្រើនជាងមុនមកគាំទ្រផលិតផលខ្មែរនៅក្នុងព្រឹត្តិការណ៍នេះ បន្ទាប់ពីការរៀបចំពិព័រណ៍លើកទី១ និងទី២ ទទួលបានជោគជ័យដែលមានសន្ទុះគាំទ្រយ៉ាងខ្លាំងពីប្រជាពលរដ្ឋ។ អត្ថបទ៖ ធូ វិរៈ