រថយន្តក្រុងរដ្ឋ ៦០០គ្រឿងត្រៀមជាស្រេច សម្រាប់ដឹកពលរដ្ឋទៅស្រុកកំណើត​ក្នុងឱកាសបុណ្យ​ចូលឆ្នាំថ្មី

រថយន្តក្រុងសាធារណៈ៦០០គ្រឿង របស់រាជរដ្ឋាភិបាល តាមរយៈរដ្ឋបាលរាជធានីភ្នំពេញ បាន​ត្រៀម​លក្ខណៈជាស្រេច សម្រាប់​ការ​ដឹកជ​ញ្ជូន​បង​ប្អូន​ប្រជា​ពលរដ្ឋ​ជិះ​ធ្វើ​ដំណើរ​ទៅ​លេង​ស្រុក​កំណើត​ដោយ​ឥតគិតថ្លៃ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ។

លោក កែវ ចាន់ណារិទ្ធ អភិបាលរដ្ឋករស្វយ័តដឹកជញ្ចូនសាធារណៈរថយន្តក្រុង City Bus បាន​ឲ្យ​ដឹងថា​ ក្រុមមន្ត្រីរបស់លោកបានត្រៀមជាស្រេចទាំងទីតាំង ទាំងរថយន្ត និងអ្នកបើកបរ សម្រាប់​ទទួលដឹកជញ្ជូនពលរដ្ឋ ដោយក្នុងនោះដែររថយន្តក្រុងទាំង៦០០គ្រឿង បានចូល​ដល់​តាម​ចំណត​ទាំង០៦ទីតាំងអស់រួចរាល់ហើយ ។

លោកអភិបាលបន្ថែមថា បងប្អូនពលរដ្ឋអាចអញ្ជើញទៅទទួលយកសេវាដឹកជញ្ចូន ដោយ​មិន​មាន​ការ​ទិញលក់សំបុត្រអ្វីនោះឡើយ ពោលគ្រាន់តែបងប្អូនចូលទៅតាមរោងដែលមានការរៀបចំ ហើយ​ឈរតម្រង់ជួរនៅក្នុងគោលដៅខេត្តដែលចង់ធ្វើដំណើរទៅ នោះក្រុម​ការងារ​នឹង​សម្រួល​ការ​ធ្វើ​ដំណើរ​ជូនបងប្អូនបានដោយងាយស្រួលបំផុតហើយ ។

ប្រជាពលរដ្ឋ សម្តែងក្តីសាទរ និងរីករាយ ចំពោះការគិតគូររបស់រាជរដ្ឋាភិបាលនិងចាត់ទុកថា ការ​គិត​គូរ​នេះ​គឺជាអំណោយ និងទឹកចិត្តដ៏ប្រពៃថ្លៃថ្លាបំផុតដែលរដ្ឋាភិបាល តាំង​ពី​អាណត្តិ​សម្តេច​តេជោ ​បន្តមកដល់សម្តេចធិបតី គឺតែងតែនៅជិតជាមួយសុខទុក្ខរបស់ពលរដ្ឋនៅទូទាំងប្រទេស ។

សូមបញ្ជាក់ថា រដ្ឋបាលរាជធានីភ្នំពេញ បានរៀបចំរថយន្តក្រុងសាធារណៈចំនួន៦០០គ្រឿង បម្រើ​ដល់​ការដឹកជញ្ចូនឥតគិតថ្លៃនៅទូទាំងប្រទេស ក្នុងរយៈពេល០៦ថ្ងៃ គិតចាប់ពីថ្ងៃទី១២ ដល់​ថ្ងៃទី១៧ ខែមេសា ឆ្នាំ២០២៦ ។

រថយន្ត​ទាំង៦០០គ្រឿង បែកចែកចេញជា២ផ្នែក ដោយ១០០គ្រឿង ប្រើប្រាស់​សម្រាប់​ដឹក​ជញ្ចូន​បង​ប្អូន​ប្រជាពលរដ្ឋជាប្រក្រតីភាពក្នុងរាជធានីភ្នំពេញ និងសេវារថយន្ត​ក្រុង​សាធារណៈ​ទៅ​កាន់​អាកាស​យាន​ដ្ឋានអន្តរជាតិតេជោ។ នៅសល់៥០០គ្រឿងទៀត គឺប្រើប្រាស់សម្រាប់​ការដឹ​ក​ជញ្ជូន​បង​ប្អូន​ប្រជាពលរដ្ឋទៅតាមបណ្តាខេត្តទូទាំងប្រទេស ពោលគឺទាំងទៅ និងធ្វើដំណើរ​ត្រឡប់​មក​វិញ​៕ អត្ថបទ ៖ លីហេង