សហភាពកសិកម្មមួយ កំពុងជួយកសិករឲ្យមានទីផ្សារកសិផលល្អ ទោះមានវិបត្តិជម្លោះព្រំដែនជាមួយប្រទេសជិតខាង

ភ្នំពេញ៖ សហភាពសហគមន៍កសិកម្មដំណាំកម្ពុជា គឺជាដៃគូមួយរបស់ក្រសួងកសិកម្ម រុក្ខាប្រមាញ់ និងនេសាទ ដែលបានជួយរកទីផ្សារឲ្យកសិករទាំងក្នុងស្រុក និងក្រៅស្រុក ខណៈអំឡុងនៃជម្លោះព្រំដែនរវាងកងទ័ពកម្ពុជា និងកងទ័ពថៃ កសិផលក៏ទទួលបានតម្លៃសមរម្យ ហើយក៏មិនមានចាល់ចោលនោះដែរ ។

នៅក្នុងមហាសន្និបាតប្រចាំ ឆ្នាំ២០២៥ របស់សហភាពសហគមន៍កសិកម្មដំណាំកម្ពុជា នៅថ្ងៃទី១០ ខែមេសា ឆ្នាំ២០២៦ លោក ជូ មករា ប្រធានសហភាពសហគមន៍កសិកម្មដំណាំកម្ពុជា បានឲ្យដឹងថា ក្នុងរយៈពេល៥ឆ្នាំមកនេះ មានកិច្ចការមួយចំនួន ដែលសហភាពបានជួយដល់សមាជិក មានដូចជាការការបច្ចេកទេសការដាំដុះ ការណាត់ជួបរវាងកសិក និងអ្នកទិញ និងការរកទីផ្សារជាដើម ។

លោកបន្តថា មួយវិញទៀត កាលពីចាប់ផ្ដើមដំបូង សហភាពសហគមន៍កសិកម្មដំណាំកម្ពុជា គឺគ្រាន់តែជួយប្រមូលផ្ដុំបន្លែសុវត្ថិភាព ដែលដាំក្នុងរោងសំណាញ់ ដើម្បីផ្គត់ផ្គង់ទីផ្សារ ប៉ុន្តែក្រោយមកសហភាពក៏បានជួយដល់សមាជិក ដែលមានដំណាំកសិកម្មផ្សេងៗ មានពោតក្រហម និងដំឡូងមី ជាមួយនឹងការរកទីផ្សារឲ្យពួកគេ ក៏ដូចជារកដៃគូ ក្នុងការផ្ដល់ទុនកម្ចី ក្នុងអត្រាការប្រាក់ទាប ដើម្បីឲ្យការផលិតកាន់តែមាននិរន្តរភាព ។

ក្នុងសន្និបាតនេះ តំណាងកសិករមកពីសហគមន៍ ដែលជាសមាជិកសហភាពសហគមន៍កសិកម្មដំណាំកម្ពុជា បានបង្ហាញក្តីរីករាយ ដែលកសិផលរបស់ពួកគាត់ មានទីផ្សារល្អ បើទោះបីជាអំឡុងពេលនៃការផ្ទុះប្រដាប់អាវុធរវាងកងទ័ពកម្ពុជា និងកងទ័ពថៃ ដែលលទ្ធផលល្អនេះ ធ្វើឲ្យកសិករទាំងអស់នោះ បានជំរុញដល់កសិករផ្សេងៗ គួរតែនាំគ្នាចង់ក្រងបង្កើតជាសហគមន៍ និងចូលរួមក្នុងសហភាពសហគមន៍កសិកម្មដំណាំកម្ពុជា ដើម្បីមានឱកាល និងទទួលផលច្រើន ពីការចូលរួមនេះ ។

គួរបញ្ជាក់ថា ក្នុងមហាសន្និបាតនេះ សហភាពសហគមន៍កសិកម្មដំណាំកម្ពុជា ក៏មានការបោះឆ្នោតជ្រើសរស់ថ្នាក់ដឹកនាំសហភាព សម្រាប់អាណត្តិថ្មី ជាមួយនឹងការចុះកិច្ចព្រមព្រៀងជាមួយដៃគូបន្ថែម ទាំងវិស័យធនាគារ និងក្រុមហ៊ុនដៃគូជាដើម ៕

អត្ថបទ បាន សុខរិទ្ធិ