នគរសង្ក្រាន្ត៖ «ភូមិវប្បធម៌» ត្រៀមរួចរាល់សម្រាប់បង្ហាញពីវប្បធម៌ ប្រពៃណីខ្មែរក្នុងឱកាសចូលឆ្នាំខ្មែរប្រពៃណីជាតិ

ភ្នំពេញ៖ «ភូមិវប្បធម៌» » ដែលមានទីតាំងក្រោយផ្សាររាត្រី រាជធានីភ្នំពេញ បានត្រៀមរួចរាល់ហើយ សម្រាប់បើកជាសាធារណៈបង្ហាញពីវប្បធម៌ ប្រពៃណីខ្មែរ ក្នុងឱកាសចូលឆ្នាំខ្មែរប្រពៃណីជាតិចាប់ពីថ្ងៃទី១៤ ខែមេសា ឆ្នាំ ២០២៦តទៅ។ព្រឹត្តិការណ៍នគរសង្ក្រាន្ត គឺរៀបចំឡើងដោយសហភាពសហព័ន្ធយុវជនកម្ពុជា។

នៅព្រឹកថ្ងៃទី១៣ ខែមេសានេះ ប្រជាពលរដ្ឋដែលបានចូលមកបើការតុបតែងលម្អនៅ «ភូមិវប្បធម៌» បានកោតសរសើរថា ការរៀបចំព្រឹត្តិការណ៍ «នគរសង្ក្រាន្ត» នៅឆ្នាំនេះ មានការតុបតែងបានស្អាត និងមានច្រើនទីតាំងសម្រាប់ប្រជាពលរដ្ឋមកដើរលេងកម្សាន្ត។

ដោយឡែក ប្រជាពលរដ្ឋមួយក្រុម ចូតស្លឹកចេក ដើម្បីត្រៀមសម្រាប់វេចនំអន្សមខ្មែរ នៅថ្ងៃស្អែក ដើម្បីផ្ញើជូនទៅវិរកងទ័ព និងជនភៀសសឹកនៅព្រំដែនកម្ពុជា-ថៃ ខណៈ ក្រុមល្ខោនបុរាណពោលស្រី មកពីភូមិទួលក្របៅ ឃុំគគីរ ស្រុកកៀនស្វាយ ខេត្តកណ្តាល ដែលបានមកហាត់សមនៅព្រឹកនេះ ក៏បានត្រៀមខ្លួនរួចរាល់ហើយសម្រាប់ការសម្តែងទម្រង់ល្ខោនបុរាណ នៅថ្ងៃចូលឆ្នាំថ្មីប្រពៃណីជាតិ នៅទីតាំង «ភូមិវប្បធម៌»។

ព្រឹត្តិការណ៍នគរសង្ក្រាន្ត ជាព្រឹត្តិការណ៍ដែលរៀបចំឡើងដោយសហភាពសហព័ន្ធយុវជនកម្ពុជា ដែលរៀបចំឡើង មានរយៈពេល ៦ថ្ងៃ ចាប់ពីថ្ងៃទី ១៤ ដល់ ថ្ងៃទី ១៩ ខែមេសា៕អត្ថបទ៖ ធូ វិរៈ