តំបន់ផ្លូវថ្មើរជើងកាន់តែបង្ហាញវត្តមានទេសចរអន្តរជាតិច្រើន ខណៈ​បុណ្យ​ចូល​ឆ្នាំ​ថ្មី​ចាប់​ផ្ដើម​នៅ​ថ្ងៃ​ស្អែក

គ្រប់គោលដៅទេសចរណ៍នានានៅរាជធានីភ្នំពេញ គឺបានតុបតែងរួចរាល់មានភាពស្រស់ស្អាត និង​មាន​ភាពទាក់ទាញក្នុងការដើរកម្សាន្ត នៅក្នុងឱកាសថ្ងៃបុណ្យចូលឆ្នាំថ្មី ដែលនឹង​ឈាន​ចូល​មក​ដល់​នៅ​ថ្ងៃ​ស្អែ​កនេះ ហើយសម្រាប់ភ្ញៀវទេសចរអន្តរជាតិ ដែលដើរទស្សនា​តាម​បណ្តោយ​ផ្លូវ​ថ្មើរ​ជើង​ចតុមុខ ថាតំបន់នេះមានភាពទាក់ទាញខ្លាំង ហើយគេនឹងចូលរួមដើរកម្សាន្ត ភ្លក់ម្ហូប​អាហារ ទិញផលិតផលខ្មែរ ចូលរួមរាំ លេងល្បែងប្រជាប្រិយខ្មែរ កម្សាន្ត​សប្បាយ​ជា​មួយ​ពលរដ្ឋ​ខ្មែរ​។

ភ្ញៀវទេសចរអន្តរជាតិ បានថ្លែងប្រាប់BTV នៅថ្ងៃទី១៣ ខែមេសា នេះថា រៀងរាល់ឆ្នាំ ព្រឹត្តិការណ៍​បុណ្យ​ចូល​ឆ្នាំ​ថ្មី ប្រពៃណីខ្មែរឈានមកដល់ម្តងៗ គោលដៅទេសចរណ៍កម្ពុជា គឺមានភាព​សប្បាយ​រីករាយ តាមបែបប្រពៃណី វប្បធម៌ មានភាពទាក់ទាញខ្លាំង ហើយភ្ញៀវ​មាន​គោល​បំណង​ដើរ​កម្សាន្ត​ឱ្យ​បាន​ច្រើនគោលដៅ ដើម្បីចង់ទទួលបទពិសោធន៍ ភាពសប្បាយរីករាយ​ជាមួយ​ពលរដ្ឋ​ខ្មែរ​ក្នុងបុណ្យចូលឆ្នាំ ចង់ដឹងអំពីភាពប្លែកៗគ្នា វប្បធម៌ខ្មែរ ក្នុងនោះគោល​ដៅ​ទេសចរណ៍​ផ្លូវ​ថ្មើរ​ជើង ក៏ជាគោលដៅដែលត្រូវទៅទស្សនា ខណៈគោលដៅនេះ គឺមានការបង្ហាញ​អត្ត​សញ្ញាណ​វប្បធម៌ សិល្បៈ ផលិតផលខ្មែរដ៏សម្បូរបែបនៅពេលល្ងាចឡើង។

សូមបញ្ជាក់ថា នៅក្នុងពិធីអបអរសាទរបុណ្យចូលឆ្នាំថ្មី ប្រពៃណីខ្មែរ ឆ្នាំមមី ឆ្នាំ២០២៦ នឹង​ឈាន​ចូល​មកដល់នៅថ្ងៃស្អែកនេះ សហភាពសហព័ន្ធយុវជនកម្ពុជា បានសហការជាមួយ អាជ្ញាធរ​មូល​ដ្ឋាននៅរាជធានីភ្នំពេញ រៀបចំព្រឹត្តិការណ៍នគរសង្ក្រាន្តរយៈពេល៦ថ្ងៃ ចាប់​ពី​ថ្ងៃ​ទី​១៤ ដល់ថ្ងៃទី១៩ ខែមេសានេះ ដោយមានការ​រៀបចំ​កម្ម​វិធី​បង្ហាញ​ទស្សនីយ​ភាព​តាម​បែប​វប្បធម៌ សិល្បៈ សាសនា ប្រមាណជាង២០ទស្សនីយភាពធំៗ នៅតាមទីតាំងធំៗរួមមាន៖ រមណីយដ្ឋានវប្បធម៌ ប្រវត្តិសាស្ត្រវត្តភ្នំ ភូមិវប្បធម៌នៅជិតផ្សាររាត្រី សួនច្បារវឌ្ឍនៈ អតីត​សួន​ទី​លាន​ធិបតេយ្យ តំបន់ផ្លូវថ្មើរជើងចតុមុខជាដើម ខណៈនៅតំបន់ផ្លូវថ្មើរជើងចតុមុខ ដែលលាត​សន្ធឹង​ចាប់​ពីមុខផ្សាររាត្រី រហូតមកដល់មុខព្រះបរមរាជវាំង គឺមានរៀបចំស្តង់​តាំង​បង្ហាញ​ផលិត​ផល​ខ្មែរ​ជា​ច្រើន អមដោយមានឆាកប្រគំតន្ត្រីតូចធំ ចំនួនបីកន្លែង ដើម្បីបង្កលក្ខណៈ​ឲ្យ​តំបន់​នេះ​មាន​ភាព​សប្បាយរីករាយថែមទៀត៕ អត្ថបទ៖ ស៊ុម សុខជា