រដ្ឋមន្ត្រីក្រសួងទេសចរណ៍ អញ្ជើញចូលរួម ព្រឹត្តិការណ៍លៀសហាល ចំនួន ៥តោន ជាមួយថ្នាក់ដឹកនាំ និងប្រជាពលរដ្ឋខេត្តកំពង់ចាម

កំពង់ចាម ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ លាង វួចឆេង សម្ដេចទេពញាណ ហ៊ុន ណេង នៅថ្ងៃទី ១៥ ខែមេសា ឆ្នាំ២០២៦ បានអញ្ជើញចូលរួមព្រឹត្តិការណ៍លៀសហាល ៥តោន នៃសង្ក្រាន្តថ្ងៃទី២ ជាមួយឯកឧត្តម អ៊ុន ចាន់ដា អភិបាលខេត្តកំពង់ចាម និងថ្នាក់ដឹកនាំខេត្តជាច្រើនទៀត រួមនិងប្រជាពលរដ្ឋយ៉ាងច្រើនកុះករ នៅតាមដងផ្លូវមុខសាលាខេត្តកំពង់ចាម ។

បើតាមមន្ត្រីរដ្ឋបាលខេត្តកំពង់ចាម បានឲ្យដឹងថា រយៈពេលបីថ្ងៃនៃសង្ក្រាន្តកំពង់ចាម នឹងមានកម្មវិធី និងព្រឹត្តិការណ៍ជាច្រើនដែលត្រូវបានចាត់តាំងរៀបចំឡើង បង្កបរិយាកាសកម្សាន្តសប្បាយជូនដល់ប្រជាពលរដ្ឋ និងភ្ញៀវទេសចរណ៍ជាតិ និងអន្តរជាតិ ហើយព្រឹត្តិការណ៍ដ៏គួរឲ្យទាក់ទាញបំផុតមួយ គឺព្រឹត្តិការណ៍លៀសហាល ៥តោន ដែលនឹងរៀបចំនៅថ្ងៃទីពីរនៃសង្ក្រាន្ត ពោលគឺថ្ងៃទី១៥ ខែមេសា ឆ្នាំ២០២៦ ចាប់ពីម៉ោង ១១ ព្រឹកតទៅ ។

ដូច្នេះតាមរយៈកម្មវិធីនិងព្រឹត្តិការណ៍ដែលបានរៀបចំ សង្ឃឹមថា បងប្អូនប្រជាពលរដ្ឋ និងភ្ញៀវទេសចរណ៍អាចទទួលបាននូវរសជាតិ និងបទពិសោធថ្មីៗ នៃសង្ក្រាន្តកំពង់ចាម និងសង្រ្កាន្តតាមបណ្តាស្រុក ហើយបងប្អូនអាចពិនិត្យមើលប្លង់តម្រាយផ្លូវ និងព័ត៌មានអំពីកម្មវិធី និងព្រឹត្តិការណ៍ដែលរៀបចំនៅតាមទីតាំងនីមួយៗ ដើម្បីបងប្អូនអាចរៀបចំកញ្ចប់ដំណើរកម្សាន្តសង្ក្រាន្តតាមបំណងប្រាថ្នារបស់ខ្លួន រៀងៗខ្លួន៕