ព្រះសង្ឃ និងប្រជាពលរដ្ឋ ថ្វាយព្រះពរព្រះមហាក្សត្រ ឆាប់ជាសះស្បើយពីព្រះរោគ

ព្រះសង្ឃ និងប្រជាពលរដ្ឋ បានថ្វាយព្រះពរ ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា ឆាប់ជាសះស្បើយពីព្រះរោគ និង​មាន​ព្រះរា​ជ​សុខ​ភាព​ល្អបរិបូរ យាងមក គង់ប្រថាប់ ជាម្លប់ដ៏ត្រជាក់របស់ជាតិ និងប្រជានុរាស្រ្ដខ្មែរ។

ព្រះគ្រូ ប៊ិន អ៊ីម ចៅអធិការវត្តប្រជុំវង្ស និង ប្រជាពលរដ្ឋ រស់នៅរាជធានីភ្នំពេញ បាន​សម្ដែង​នូវ​ព្រះទ័យ ​និងក្ដីព្រួយបារម្ភ បន្ទាប់ពីទទួលព័ត៌មាន ថា ព្រះមហាក្សត្រ ទ្រង់ប្រឈួន ដែ​ល​ព្រះ​រោគ​នោះ​តម្រូវ​​ឲ្យ​ព្រះអង្គ ទទួលការព្យាបាលដោយវះកាត់ តាមវេជ្ជបញ្ជានៅក្នុងមន្ទីរពេទ្យ នារដ្ឋ​ធានី​ប៉េកាំង ​នៃសាធារណៈរដ្ឋប្រជាមានិតចិន និងបន្តគង់ប្រថាប់នៅទីនោះមួយរយៈ ដើម្បី​ពិនិត្យ​តាម​ដាន ​និងព្យាបាលព្រះរោគ ចាប់ពីថ្ងៃទី១៨ ខែមេសា ឆ្នាំ២០២៦។

ព្រះសង្ឃ និង ប្រជាពលរដ្ឋ បានបូងសួង ថ្វាយព្រះពរ ព្រះមហាក្សត្រ សូមព្រះករុណា ទ្រង់​ប្រកប​ដោយ ព្រះសុខភាពល្អ បរិបូរណ៍ ព្រះកាយពលំ មាំមួន និងឆាប់ជាសះស្បើយ ពី​ព្រោះ​រោគ​ទាំង​ឡាយ ​ដើម្បីគង់ប្រថាប់ ជាម្លប់ដ៏ត្រជាក់ ដល់ជាតិ និងប្រជានុរាស្រ្ដខ្មែរជានិរន្ដរ៍តរៀងទៅ។

សូមជម្រាបជូនថា ព្រះរោគ ព្រះករុណា ព្រះមហាក្សត្រ បានធ្វើការវះកាត់ ដោយជោគជ័យហើយ នៅ​ព្រឹក​ថ្ងៃទី២០ ខែមេសា ឆ្នាំ២០២៦នេះ។ នេះបើតាមការ បញ្ជាក់របស់​សម្ដេច​អគ្គ​មហា​សេនា​បតី​តេជោ ​ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា ដែលបាន​អញ្ជើញ​ដង្ហែ​ព្រះ​មហា​ក្សត្រ​យាង​ចូល​បន្ទប់វះកាត់ដោយផ្ទាល់ នៅប្រទេសចិន៕ អត្ថបទ៖ លៀ ស៊ីណា