អ្នកជំនាញសត្វព្រៃ៖ ព្រៃអង្គរ ជាកន្លែងសត្វព្រៃរស់នៅច្រើន និងមានសុវត្ថិភាពបំផុត

អ្នកជំនាញការពារសត្វព្រៃបានលើកឡើងថា ព្រៃអង្គរ ជាកន្លែងសត្វព្រៃរស់នៅច្រើន និង​មាន​សុវត្ថិភាព​បំផុត​នៅ​ទូទាំងប្រទេស ខណៈដែលអាជ្ញាធរជាតិអប្សរាការពារយ៉ាងរឹងមាំ ក្រៅ​ពី​ប្រាសាទ​បុរាណ។

លោក Nick Marx ទីប្រឹក្សាផ្នែកជីវចម្រុះ បានលើកឡើងថា នេះជាភាព​ជោគជ័យ​ដ៏​ធំធេង​មួយ​ដែល​ត្រូវ ​គឺចាប់តាំងពីឆ្នាំ២០១៣ មក សត្វព្រៃដែលបានព្រលែងបានកកើតយ៉ាងខ្លាំង ជា​ពិសេស​សត្វ​ទោច​ម្កុដ ដែលបង្កើតកូនបានរហូតដល់ ១១ក្បាល ក្នុងព្រៃអង្គរ។ លោកបាន​សង្កត់​ធ្ងន់​ថា​ “ព្រៃអង្គរគឺជាកន្លែងលេខមួយ នៃការការពារសត្វព្រៃ និងព្រៃឈើ ក៏សំខាន់​មិន​ចាញ់​ការ​ថែ​រក្សា​ប្រាសាទ​បុរាណឡើយ ដែលក្នុងនោះមាន៩៥​ភាគ​រយ​ជា​សត្វល្អិត។ អ្នក​ជំនាញ​ការ​ពារ​សត្វ​ព្រៃ​ជា​ជន​បរទេសបានបន្ដថា ការពារសត្វព្រៃបានរឹងមាំ បានធ្វើឱ្យទាក់​ទាញ​អ្នក​ទេសចរ។ ជា​មួយ​គ្នា​នេះ​ លោក Stephane De Greef អ្នកជំនាញខាងសត្វល្អិតតូចៗមួយរូបទៀត ដែល​ជា​ជន​បរទេស ​បានលើកឡើងដែរថាសត្វល្អិតតូចៗមានសារៈសំខាន់បំផុត ដែលវាបាន​ជួយ​ជា​ចំណី​សត្វ​ផ្សេង​ៗ​ទៀត ហើយបើសិនមិនមានសត្វល្អិតក៏មិនមានព្រៃឈើដែរ។ចំពោះពិភពលោក បើ​គ្មាន​សត្វ​ល្អិត ​ជីវិតនៅលើលោកក៏មិនអាចបន្តបានដែរ។ សត្វល្អិតជាអ្នកជួយលម្អងផ្កា និង​ជា​ចំណី​អា​ហារក្នុងខ្សែចង្វាក់អាហារធម្មជាតិ។ លោកលើកទឹកចិត្តឱ្យយើងគ្រប់គ្នាឈប់ភ័យខ្លាច ឬ​សម្លាប់សត្វល្អិត តែត្រូវរៀនរស់នៅជាមួយពួកវា និងការពារពួកវាដើម្បីភាពគង់វង្សនៃធម្មជាតិ។

របាយការណ៍ នាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា បាន​បញ្ជាក់​ថា វត្តមាន សត្វព្រៃសំខាន់ៗ ដែលកំពុងរស់នៅក្នុងព្រៃធម្មជាតិអង្គរ រួមមាន សត្វ​ទោ​ច​មង្កុដ ភេខ្លួនរលោង ឈ្លូស ស្វា ឆ្មារដាវ សំពោចក្រអូប និងសត្វស្លាបស្អាតៗដូចជា ក្ងោក កេង​កង​តូច​ កេងកងធំ និងសត្វភូវាំង និងសត្វល្អិតតូចៗ។ លើសពីនេះ ក៏មានអាថកំបាំង​នៃ​ពិភព​សត្វ​ល្អិត ​ដែលមាន រូបភាពប្លែកៗនៃស្រមោច កណ្ដៀរ ចង្រិត កណ្ដូប មេអំបៅ និងពីងពាង ដែល​ជា​អ្នក​ថែ​រក្សា​តុល្យភាពបរិស្ថាននៅក្នុងតំបន់អង្គរ ខណៈដែលរមណីយដ្ឋានអង្គរ មិនមែន​មាន​តែ​ប្រាសាទ​ទេ តែមានទាំងធម្មជាតិ និងជីវិតសត្វព្រៃ៕