កម្ពុជា និងចិន នឹងបើកកិច្ចប្រជុំរដ្ឋមន្ត្រីការបរទេស និងរដ្ឋមន្ត្រីការពារជាតិ នៅថ្ងៃស្អែក

កម្ពុជា នឹងជាម្ចាស់ផ្ទះកិច្ចប្រជុំ ស្តីពីយន្តការកិច្ចសន្ទនាយុទ្ធសាស្ត្រ ២+២ រវាងរដ្ឋមន្ត្រីការបរទេស និង​រដ្ឋមន្ត្រីការពារជាតិកម្ពុជានិងចិន ដែលនឹងប្រព្រឹត្តទៅនៅថ្ងៃទី២២ ខែមេសា ឆ្នាំ២០២៦។ កិច្ច​ប្រជុំនេះ គឺដើម្បីពង្រឹងទៅលើដៃគូរយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ដែល​បាន​ឯកភាព​គ្នាកន្លងមក ក៏ដូចជាការលើកកម្ពស់ជំនឿទុកចិត្តផ្នែកនយោបាយ និងពង្រឹង​កិច្ច​សហ​ប្រតិបត្តិការ​រវាងប្រទេសទាំងពីរបន្ថែមទៀត។

ឯកឧត្តម វ៉ាង យី រដ្ឋមន្ត្រីក្រសួងការបរទេស និងឯកឧត្តម តុង ជុន រដ្ឋមន្ត្រីក្រសួងការពារជាតិ នៃ​សាធារណ​រដ្ឋ​ប្រជាមានិតចិន នឹងអញ្ជើញ​មក​បំពេញ​ទស្សន​កិច្ច​ការងារ​នៅ​ព្រះរា​ជា​ណា​ចក្រ​កម្ពុជា​ ដើម្បីអញ្ជើញចូលរួមកិច្ចប្រជុំស្តីពីយន្តការកិច្ចសន្ទនាយុទ្ធសាស្ត្រ ២+២ គឺរដ្ឋមន្ត្រី​ការ​បរទេស ​និងរដ្ឋមន្ត្រីការពារជាតិ រវាងកម្ពុជា និងចិន នៅថ្ងៃទី២២ ខែមេសា ឆ្នាំ២០២៦។

ឯកឧត្តម ចាន់ រតនា អ្នកនាំពាក្យក្រសួងការបរទេសកម្ពុជាបានមានប្រសាសន៍ប្រាប់BTVថា កិច្ច​ប្រជុំ​នេះ ​គឺតាមការឯកភាពគ្នារវាងថ្នាក់ដឹកនាំកាលឯកឧត្តម ស៊ី ជីងពីង ប្រធានាធិបតីចិន មក​ទស្សន​កិច្ច​ផ្លូវនៅកម្ពុជា កាលពីខែមេសា ឆ្នាំ២០២៥ ដោយបានឯកភាពគ្នាបង្កើតយន្តការ ២+២ គឺ​កិច្ច​ប្រជុំរវាងរដ្ឋមន្ត្រីការពារជាតិ និងរដ្ឋមន្ត្រីការបរទេសរបស់កម្ពុជា ជាមួយរដ្ឋមន្ត្រីការបរទេស និង​រដ្ឋ​មន្ត្រីការពារជាតិចិន។ នេះ គឺជាការចាប់ផ្តើមប្រជុំដំបូងដែលកម្ពុជាទទួលធ្វើជាម្ចាស់ផ្ទះ។ កិច្ច​ប្រជុំ​នេះ គឺដើម្បីពង្រឹង​ទៅ​លើ​ដៃគូ​យុទ្ធសាស្ត្រ​គ្រប់​ជ្រុង​ជ្រោយ​រវាង​ប្រទេស​ទាំង​ពីរ​ដែល​បាន​ឯក​ភាព​គ្នាកន្លងមក ក៏ដូចជាការលើកកម្ពស់ជំនឿទុកចិត្តផ្នែកនយោបាយ និងពង្រឹង​កិច្ច​សហ​ប្រតិបត្តិ​ការ​រវាងប្រទេសទាំងពីរបន្ថែមទៀត។ ជាពិសេសផ្តោតទៅលើបញ្ហានយោបាយ ស​ហ​ប្រតិបត្តិ​ការ​ផ្នែកការពារជាតិ និងសន្តិសុខជាដើម។

សូមជម្រាបថា ក្នុងអំឡុងពេលបំពេញទស្សនកិច្ចផ្លូវការនៅកម្ពុជា ឯកឧត្តម វ៉ាង យី រដ្ឋមន្ត្រី​ក្រសួង​ការ​បរទេសចិន និងឯកឧត្តម តុង ជុន រដ្ឋមន្ត្រីក្រសួងការពារជាតិចិន ក៏នឹងមាន​ជំនួប​ដាច់​ដោយ​ឡែក​ពីគ្នាជាមួយសម្តេចតេជោ ហ៊ុន សែន , និងសម្តែងការសម្តេចធិបតី ហ៊ុន ម៉ាណែត និង​ជំនួប​ទ្វេភាគីជាមួយឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និង​សហប្រតិបត្តិការអន្តរជាតិ ផងដែរ៕ អត្ថបទ៖ វង្ស សុភាព