មន្រ្ដីជាន់ខ្ពស់ក្រសួងវប្បធម៌ ដឹកនាំគណៈប្រតិភូចូលរួមពិធីបើកពិព័រណ៍ស្នាមញញឹមអង្គរ នៅទីក្រុងប៉េងកាំង ប្រទេសចិន

នៅថ្ងៃទី២០ ខែមេសា ឆ្នាំ២០២៦ ឯកឧត្ដម សោម សុគន្ធ រដ្ឋលេខាធិការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានអញ្ជើញដឹកនាំគណ:ប្រតិភូក្រសួងចូលរួមសម្ភោធពិធីបើកពិព័រណ៍ ស្នាមញញឹមអង្គរ នៅសាលពិព័រណ៍ Digital Arts Center (CPU ) នាទីក្រុងប៉េងកាំង សាធារណរដ្ឋប្រជាមានិតចិន។ ពិព័រណ៍ស្នាមញញឹមអង្គរ រៀបចំដោយ ក្រុមហ៊ុន X-Capital Cambodia សហការជាមួយសមាគមជំរុញកិច្ចសហប្រតិបត្តិការមិត្តភាពកម្ពុជា និងក្រុមហ៊ុនបច្ចេកវិទ្យាបញ្ញាសប្បនិម្មិត 4U Technology របស់ចិន ក្រោមការគាំទ្រដោយក្រសួងវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា។

ការរៀបចំពិព័រណ៍នេះ គឺផ្អែកលើកំណត់ត្រារបស់ លោក ជីវ តាក្វាន់ ស្តីពីប្រពៃណីអ្នកស្រុកចេនឡា នាសតវត្សទី១៣ ក្នុងគោលបំណងផ្សព្វផ្សាយពីសិល្បៈ វប្បធម៌ ប្រពៃណី របៀបរបបរស់នៅរបស់ប្រជាជន ពិសេសភាពអស្ចារ្យនៃតំបន់បេតិកភណ្ឌអង្គរ ដោយប្រើប្រាស់បច្ចេកវិទ្យាឌីជីថល ដើម្បីបង្កើនការយល់ដឹងដល់ប្រជាជនចិន និងរួមចំណែកក្នុងការទាក់ទាញភ្ញៀវទេសចរណ៍ជនជាតិអោយមកទស្សនាកម្ពុជាអោយកាន់តែមានចំនួនច្រើនឡើង។