និន្នាការប្រើប្រាស់យានយន្តអគ្គិសនីនៅកម្ពុជាកើនខ្ពស់ជាលំដាប់ ខណៈគិតត្រឹមខែមីនានេះ បាន​ចុះ​បញ្ជីសរុបកើនដល់ជាង ១ម៉ឺន៦ពាន់គ្រឿង

ភ្នំពេញ៖ និន្នាការប្រើប្រាស់យានយន្តអគ្គិសនីនៅកម្ពុជា កំពុងមានការកើនឡើងជាលំដាប់ ដោយ​ក្នុង​ត្រីមាស​ទី១ ឆ្នាំ២០២៦នេះ មានយានយន្តអគ្គិសនីចុះបញ្ជីជាមួយក្រសួងសាធារណការ និង​ដឹក​ជញ្ជូន​ មានចំនួន ៣,២៤៣គ្រឿង ដែលចំនួន​នេះ​បាន​នាំ​ឱ្យ​យាន​យន្ត​អគ្គិសនី​ចុះ​បញ្ជី​សរុប​កើន​ដល់ ១៦, ២១០គ្រឿង បើគិតមកត្រឹមខែមីនានេះ។ ក្នុងនោះ ការ​ចុះ​បញ្ជី​រថយន្ត​អគ្គិសនី​មា​ន​ចំនួនច្រើនជាងគេបំផុត។

ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានប្រាប់ BTV នៅព្រឹកថ្ងៃទី ២២មេសានេះថា នៅខែមករា ឆ្នាំ២០២៦ មានយានយន្ត​អគ្គិសនី​ចុះ​បញ្ជី​នៅ​ក្រសួង​សាធារណ​ការ ​និងដឹកជញ្ជូនចំនួន ៤៨៨គ្រឿង(រថយន្ត ៤០៩គ្រឿង) និង ខែកុម្ភៈ ឆ្នាំ២០២៦ មាន​យាន​យន្ត​អគ្គិសនី​ចុះបញ្ជី ​១,០៧៨ គ្រឿង(រថយន្ត ៨៨៩គ្រឿង)។ ដោយឡែក នៅខែមីនានេះ មាន​យាន​យន្ត​អគ្គិសនីចុះបញ្ជីច្រើនជាងគេរហូតដល់ ១, ៦៧៦គ្រឿង (ក្នុងនោះរថយន្ត ១, ២៩៣ គ្រឿង) ដែលតួលេខនេះកើនឡើងជាលំដាប់ ហើយឯកឧត្តម រំពឹងថា នៅខែមេសានេះ ការ​ចុះ​បញ្ជី​យាន​យន្តអគ្គិសនីនឹងបន្តកើនឡើងបន្ថែមទៀត។

ឯកឧត្តម បន្តទៀតថា សម្រាប់​ប្រទេស​កម្ពុជា​ការ​ចុះ​បញ្ជី​យាន​យន្ត​អគ្គិសនី​គឺ​ចាប់​ផ្តើម​ដំបូង​ក្នុង​ឆ្នាំ​២​០១៨ ដែលកាលនោះមានរថយន្តអគ្គិសនីតែមួយគ្រឿងប៉ុណ្ណោះ ដែលបាន​ចុះ​បញ្ជី​នៅ​ក្រសួង​សាធារណការ និងដឹកជញ្ជូន ប៉ុន្តែចាប់ពីពេលនោះមក ការចុះបញ្ជី​យាន​យន្ត​អគ្គិសនី​ គឺ​មាន​កំណើន​ជា​រៀង​រាល់​ឆ្នាំ។ ការកើនឡើងនេះគឺ ស្របទៅនឹងការកើនឡើង នៃ​និន្នាការ​ការ​ប្រើ​ប្រាស់​យាន​យន្ត​អគ្គិសនីនៅលើទូទាំងពិភពលោក។

បើយោងតាមទិន្នន័យចុះបញ្ជីក្រសួងសាធារណការ និងដឹកជញ្ជូន គិតត្រឹមខែមីនា ឆ្នាំ​២០២៦​នេះ ស្ថិតិ​ចុះបញ្ជីយានយន្តអគ្គិសនីចុះបញ្ជីសរុបចំនួន ១៦, ២១០គ្រឿង ក្នុងនោះ ទោចក្រ​យាន​យន្ត​ចុះ​បញ្ជីមានចំនួន ៣, ៨៣២គ្រឿង, ត្រីចក្រយានយន្ត ៧២២គ្រឿង និងរថយន្តមានចំនួន ១១, ៦៥៦គ្រឿង៕ អត្ថបទ៖ ធូ វិរៈ