ព័ត៌មាន

ប្រជានុរាស្រ្តបន្តបួងសួងថ្វាយព្រះពរព្រះមហាក្សត្រឱ្យឆាប់ជាសះស្បើយពីព្រះរោគ

បន្ទាប់ពីទទួលដំណឹងថា ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ទទួលបានការវះកាត់ព្រះរោគដោយជោគជ័យ ពលរដ្ឋខ្មែរមានក្ដីត្រេកអរជាពន់ពេក និងបានបន្តបួងសួងថ្វាយព្រះពរព្រះអង្គឱ្យឆាប់ជាសះស្បើយពីព្រះរោគ ដើម្បីឆាប់បានយាងនិវត្តមកមាតុប្រទេសវិញគង់ជាម្លប់ដល់ប្រជានុរាស្រ្ត។

ប្រជានុរាស្រ្តនៅក្នុងរាជធានីភ្នំពេញ នៅថ្ងៃទី២២ ខែមេសា នេះ បានប្រាប់BTVឲ្យដឹងថា ក្រោយទទួលបានដំណឹងថា ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ទទួលការវះកាត់ព្រះរោគ ដោយជោគជ័យ នៅទីក្រុងប៉េកាំង ប្រទេសចិន គឺមានសេចក្តីសោមនស្ស និងសូមបួងសួងថ្វាយព្រះពរ ព្រះករុណា ទ្រង់ប្រកបដោយព្រះរាជសុខភាពល្អ ព្រះកាយពលមាំមួន និងឆាប់ជាសះស្បើយពីព្រះរោគ ដើម្បីគង់ប្រថាប់ជាម្លប់ដ៏ត្រជាក់ដល់ជាតិ និងប្រជានុរាស្រ្ដខ្មែរជានិរន្ដរ៍តរៀងទៅ។ ប្រជានុរាស្ត្រក៏បានសម្តែងនូវទឹកចិត្តនឹករលឹកជាពន់ពេកដល់ព្រះករុណា ដែលព្រះអង្គជាក្សត្រមានទសពិធរាជធម៌។

បើតាមសេចក្តីប្រកាសព័ត៌មានរបស់ក្រសួងព្រះបរមរាជវាំង បានឱ្យដឹងថា ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត បានទទួលការព្យាបាលព្រះរោគ ដោយវះកាត់ពីក្រុមវេជ្ជបណ្ឌិតចំណានៗ នៅមន្ទីពេទ្យប៉េកាំង នៃសាធារណរដ្ឋប្រជាមានិតចិន កាលពីថ្ងៃទី២០ ខែមេសា ឆ្នាំ២០២៦ ហើយព្រះអង្គបានយាងចាកចេញពីបន្ទប់វះកាត់រួចរាល់នៅថ្ងៃដដែល។ ព្រះអង្គគង់ប្រថាប់មួយរយៈពេលទៀតនៅទីនោះ ក្រោយវះកាត់ ដើម្បីពិនិត្យតាមដាន និងថែរក្សាព្រះរាជសុខភាពបន្តនៅក្នុងមន្ទីពេទ្យប៉េកាំង៕ អត្ថបទ៖ ទូច សោភ័ណ