ទិវាពលកម្មអន្តរជាតិ៖ កម្មកររោងចក្រ​អរគុណ​រាជរដ្ឋាភិបាល​បន្ត​លើក​កម្ពស់​សិទ្ធិ​ការ​ងារ​នៅ​កន្លែង​ធ្វើការ

កម្មករនិយោជិតក្នុងវិស័យកាត់ដេរនៅកម្ពុជា បានលើកឡើងថា ប្រទេសកម្ពុជាចាប់​តាំង​ពីកា​រ​ដឹក​នាំដោ​យ​សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្ដី និងជាប្រមុខ​រដ្ឋ​ស្ដី​ទី​នៃ​កម្ពុជា ​រហូតមកបន្តដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីបច្ចុប្បន្ន បាន​លើក​កម្ពស់សិទ្ធិការងារកាន់តែល្អប្រសើរពីមួយឆ្នាំទៅមួយឆ្នាំ ធ្វើឱ្យពួកគាត់​មាន​ភាព​កក់​ក្តៅ​ទទួល​បាន​ការ​ដំឡើងប្រាក់ខែជារៀងរាល់ឆ្នាំ ជាពិដសេសជាពិសេសការ​បង្កើត​ទំនាក់​ទំន​ង​ល្អ​រវាង​កម្មករ​និយោជិត និងភាគីនិយោជក។

លោក ព្រឿង ពណ្ណរាយ ប្រធានក្រុមផ្នែកដេរនៃក្រុមហ៊ុនផលិតកាបូប និងតង់ ស្ថិតនៅផ្លូវ​ជាតិ​លេខ​៣ ​សង្កាត់ក្រំាព្រង ខណ្ឌដង្កោ រាជធានីភ្នំពេញ បានឱ្យព័ត៌មាន ប៊ីធីវី ដឹងនៅព្រឹកថ្ងៃទី៣០ ខែ​មេសានេះថា ជាការកត់សម្គាល់ ក្រោមការដឹកនាំរបស់ប្រមុខរាជរដ្ឋាភិបាលកម្ពុជា រាប់ចាប់​តាំង​ពី​អាណត្តិចាស់រហូតមកដល់អាណត្តិទី៧នេះ តែងតែមាន​ការ​យក​ចិត្ត​ទុក​ដាក់​ និង​គិត​គូរ​ល្អ​ណាស់​មក​កាន់កម្មករ កម្មការិនី ដោយមិនរើសអើងភេទ និងជនមានពិការភាព។ លោកបន្តថា ការ​លើកកម្ពស់សិទ្ធិការងារ ពិតជាបានជួយពលរដ្ឋឱ្យមានការងារធ្វើ មានប្រាក់​ចំណូល​ទៀង​ទាត់​។ បន្ថែមពីនេះទៀត គឺទទួលបានការគាំពារសង្គមបានយ៉ាងល្អ តាមរយៈ​ប័ណ្ណ​បេឡា​ជាតិ​សន្តិសុ​ខ​សង្គម (ប.ស.ស.) នៅពេលមានបញ្ហាសុខភាព ទៅពេទ្យពិនិត្យនិងព្យាបាលដោយឥតគិតថ្លៃ។

កម្មករកម្មការិនីកំពុងបំពេញការងារក្នុងរោងចក្រ ផលិតកាបូប និងតង់នេះដែរ បានលើកឡើងថា ចំពោះការលើកកម្ពស់សិទ្ធិការងារនេះ ពួកគាត់ពិតជាពេញចិត្ត ដោយសារ​តែ​ទទួល​បាន​ការ​ជ្រោម​ជ្រែង ​និងលើកកម្ពស់សិទ្ធិពីក្រសួងការងារ និងបណ្តុះបណ្តាលវិជ្ជាជីវៈ ដែលជាសេនា​ធិការ​របស់​រាជ​រដ្ឋាភិបាល​។ ពួកគាត់ បានអះអាងស្រដៀងគ្នាទៀតថា ការបំពេញការងារសព្វថ្ងៃនេះ គឺទទួល​បាន​សេរី​ភាពពេញលេញ គ្មានការគាបសង្កត់ ឬការរើងអើងណាមួយឡើយ។ ជាពិសេស រាជ​រដ្ឋាភិបាល តែងធ្វើយ៉ាងណាឱ្យប្រជាពលរដ្ឋទទួលបានអត្ថប្រយោជន៍បន្ថែមកាន់ត្រែច្រើន ពី​មួយ​ឆ្នាំ​ទៅ​មួយឆ្នាំ។

លោក សំ សឿន ប្រធានសហភាពពលកម្មជាតិកម្ពុជា បានទទួសស្គាល់ថា វិស័យការងារនៅកម្ពុជាគឺមានភាពល្អប្រសើរច្រើន ក្នុងនោះ ការលើកកម្ពស់សិទ្ធិនេះអាចជួយដល់វិស័យការងារនៅកម្ពុជា ដែលបានបង្ហាញឱ្យឃើញថា កម្មករនិយោជិតមានសិទ្ធិពេញលេញ អាចចូលរួមបានគ្រប់សភាពការ អ្វីដែលសំខាន់ជាងនេះថែមទៀត គឺបងប្អូនកម្មករមានជីវភាពរស់នៅសមរម្យ និងអត្ថប្រយោជន៍ជាច្រើនផ្សេងៗថែមទៀត។ ការលើកកម្ពស់សិទ្ធិការងារ ជួយពលរដ្ឋឱ្យមានការងារធ្វើ មានលុយចាយ ឈឺមានពេទ្យព្យាបាលជំងឺពី ប.ស.ស. ។

សូមបញ្ជាក់ថា ទិវាពលកម្មអន្តរជាតិ ១ ឧសភា ឆ្នាំ២០២៦នេះ ក្រោមប្រធានបទ រួមគ្នាកសាងភាពធន់ដើម្បីការងារសមរម្យ ដែលជាសក្ខីភាពនៃការប្តេជ្ញាចិត្តរបស់រាជរដ្ឋាភិបាលក្នុងការលើកកម្ពស់ការអភិវឌ្ឍទីផ្សារការងារប្រកបដោយភាពធន់ និងចីរភាព, ការកែលម្អលក្ខខណ្ឌការងារ, ការធានាសិទ្ធិការងារ និងសេរីភាពអង្គការវិជ្ជាជីវៈ, ការពង្រឹងប្រព័ន្ធគាំពារសង្គម និងការលើកកម្ពស់កិច្ចសន្ទនាសង្គម ក្នុងគោលដៅបម្រើឧត្តមប្រយោជន៍របស់កម្មករនិយោជិតទាំងក្នុងនិងក្រៅប្រព័ន្ធ សំដៅធ្វើឱ្យមានភាពកាន់តែល្អប្រសើរឡើងនៃទំនាក់ទំនងវិជ្ជាជីវៈនៅកន្លែងការងារធ្វើការ ដោយប្រែក្លាយ សហគ្រាសមួយជាសហគមន៍សុខសាន្តមួយ ក៏ដូចជាការបង្កើនភាពធន់សម្រាប់ការងារសមរម្យនៅកម្ពុជា៕ អត្ថបទ៖ ឈិត បូរ៉ាវី