អនុប្រធាន សមាគមអតីតយុទ្ធជន ចុះសួរសុខទុក្ខអតីតយុទ្ធជន និងក្រុមគ្រួសារ ក្នុងខេត្តឧត្តរមានជ័យ

នៅរសៀលថ្ងៃទី២៩ ខែមេសា ឆ្នាំ២០២៦ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការ សមាគមអតីតយុទ្ធជន និងនិវត្តជនកម្ពុជា បានអញ្ជើញចុះសួរសុខទុក្ខបងប្អូនអតីតយុទ្ធជនរស់នៅភូមិស្រះទឹកតេជោសែនជ័យ ស្ថិតក្នុងឃុំចុងកាល់ ស្រុកចុងកាល់ ខេត្តឧត្តរមានជ័យ។

ក្នុងពេលឱកាសនេះ ឯកឧត្តម គន់ គីម បានកោតសរសើរដល់ការរៀបចំជីវភាពរស់នៅរបស់បងប្អូនអតីតយុទ្ធជន ដែលបានថែទាំផ្ទះ និងរៀបចំដាំដុះដំណាំជុំវិញផ្ទះរបស់ខ្លួន។

ក្នុងពេលចុះសួរសុខទុក្ខ ឯកឧត្តម គន់ គីម ថ្លែងថា អតីតយុទ្ធជន និងក្រុមគ្រួសារដែលរស់នៅទីនេះថា រាជរដ្ឋាភិបាល តាមរយៈសមាគមអតីតយុទ្ធជន និងនិវត្តជនកម្ពុជា សហការជាមួយក្រសួងពាក់ព័ន្ធ ក្នុងការផ្តល់ដីសម្បទានសង្គមកិច្ចសម្រាប់បងប្អូនអតីតយុទ្ធជនបង្កបង្កើនផល ដើម្បីលើកស្ទួយជីវភាពរស់នៅផងដែរ។

ជាមួយគ្នា ឯកឧត្តម គន់ គីម មានប្រសាសន៍ទៀតថា ចាប់តាំងពីបងប្អូនអតីតយុទ្ធជន និងនិវត្តជន ព្រមទាំងក្រុមគ្រួសារចូលរស់នៅ គឺបានខិតខំថែទាំ និងរៀបចំផ្ទះបានយ៉ាងល្អប្រសើរ ដែលនេះបង្ហាញថាការផ្តល់អំណោយផ្ទះក្នុងមូលដ្ឋាននេះពិតជាមានអត្ថន័យយ៉ាងជ្រាលជ្រៅសម្រាប់អតីតយុទ្ធជន និងនិវត្តជន។

ឯកឧត្តម បន្ថែមថា សមាគមអតីតយុទ្ធជន និងនិវត្តជនកម្ពុជា បានដាក់ចេញជាផែនការចំពោះការធ្វើកសិកម្មដាំដុះដំណាំលើដីឡូត៍ និងដីកសិកម្ម គឺជាផែនការសកម្មភាពគិតគូរអំពីសេដ្ឋកិច្ចមូលដ្ឋានជូនអតីតយុទ្ធជន និងនិវត្តជន ដែលស្របតាមកម្មវិធីនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា សម្រាប់ការអភិវឌ្ឍឆ្នាំ២០២៣-២០២៨ ដែលត្រូវបានចាត់ទុកជាកិច្ចការចម្បងសម្រាប់អនុវត្ត។

ឆ្លៀតក្នុងឱកាសនេះ ឯកឧត្តម គន់ គីម បាននាំយកការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន, សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគម និងលោកជំទាវបណ្ឌិត ពេជ ចន្ទមុន្នី ជូនបងប្អូនអតីតយុទ្ធជន និងក្រុមគ្រួសារទាំងអស់រស់នៅភូមិខាងលើនេះផងដែរ៕