ការីទេសចរណ៍ក្នុងស្រុកចាប់ផ្តើមផ្សព្វផ្សាយលក់បញ្ចុះតម្លៃកញ្ចប់ទេសចរណ៍ ក្នុង​រដូវ​ទេសចរណ៍​បៃតង

នៅប្រទេសកម្ពុជា ចាប់ពីខែឧសភា ដល់ខែតុលា ត្រូវបានចាត់ទុកជារដូវទេសចរណ៍បៃតង ពុំ​សូវ​មាន​ទេសចរអន្តរជាតិមកលេងទេ ដែលក្នុងអំឡុងពេលនេះ បណ្តាការីទេសចរណ៍ក្នុងស្រុក បាន​នាំ​គ្នាល​ក់​កញ្ចប់ទេសចរណ៍បញ្ចុះតម្លៃ និងបន្ថែមចំនួនថ្ងៃដំណើរកម្សាន្ត ដើម្បីទាក់​ទាញ​ទេសចរ​ក្នុង​ស្រុក​ជំនួសវិញ។

បណ្តាក្រុមហ៊ុនការីទេសចរណ៍ក្នុងស្រុកបានប្រាប់BTV នៅថ្ងៃទី៣០ ខែមេសា នេះថា នៅ​ក្នុង​អំឡុង​រដូវកាលបៃតង បណ្តាអាជីវកម្មទេសចរណ៍ រួមមាន៖ សណ្ឋាគារ ភោជនីយដ្ឋាន ម្ចាស់​រមណីយ​ដ្ឋានទេសចរណ៍ ក្រុមហ៊ុនដឹកជញ្ជូន និងម្ចាស់ចម្ការដំណាំផ្លែឈើ បានបញ្ចុះ​តម្លៃ​សេវា​កម្ម​ខ្លួន​ប្រមាណ​ពី១០ ទៅ៣០% ឲ្យមកបណ្តាក្រុមហ៊ុនការីទេសចរណ៍ បានធ្វើឲ្យក្រុម​ហ៊ុន​ការី​ទេសចរណ៍​ជាដៃគូនានានោះ ខ្លះបានរៀបចំកញ្ចប់ទេសចរណ៍លក់បញ្ចុះតម្លៃ ហើយ​ការី​ទេសចរ​ណ៍​ខ្លះទៀ​ត មិនបានបញ្ចុះតម្លៃ តែគេបានបន្ថែមចំនួនយប់ថ្ងៃធ្វើដំណើរកម្សាន្ត និងមានការ​ផ្តល់​តម្លៃ​បន្ថែម​នានាទៀតជាច្រើន សំដៅជំរុញឲ្យពលរដ្ឋខ្មែរចេញដើរកម្សាន្ត ស្គាល់ជាតិ ស្គាល់ទឹកដី មើល​ទេសភាពបៃតងស្រស់ត្រកាល និងស្គាល់ការអភិវឌ្ឍ និងការរីកចម្រើនរបស់ប្រទេសជាតិ។

ឯកឧត្តម មហំាម៉ាត់ យូណេះ អនុរដ្ឋលេខាធិការក្រសួងទេសចរណ៍ បានឲ្យដឹងថា នៅក្នុង​ដំណើរ​កម្សា​ន្តក្នុងរដូវកាលទេសចរណ៍បៃតងនេះ ជាទូទៅគឺមានក្រុមហ៊ុនទេសចរណ៍ បាន​សហការ​គ្នា​បញ្ចុះតម្លៃសេវាកម្មរបស់ខ្លួនច្រើន ហើយដើម្បីដឹងនូវរាល់ព័ត៌មានអំពីការបញ្ចុះតម្លៃ និងព័ត៌មានដើរកម្សាន្ត នៅតាមគោលដៅទេសចរណ៍នៅតាមខេត្តរាជធានីនានា គឺ​ក្រសួង​ទេសចរណ៍ ក៏បានបង្កើត QR code ទេសចរណ៍បៃតង មានបិទតាមឡាន រថយន្តក្រុង រថយន្ត​ទេសចរណ៍ និងតាមមូលដ្ឋានអាជីវកម្មទេសចរណ៍នានាច្រើនផងដែរ។

ឯកឧត្កម បន្តថា សម្រាប់ការអំពាវនាវឲ្យមូលដ្ឋានអាជីវកម្មទេសចរណ៍បញ្ចុះតម្លៃសេវាកម្មខ្លួន បំពេញ​ទាក់ទាញទេសចរក្នុងស្រុកចេញដើរកម្សាន្ត ដើម្បីឲ្យភ្ញៀវ​ទេសចរ​ជាតិ​នានា​ទទួល​បាន​ឱកាស​សប្បាយ​រីករាយ យល់ដឹង ស្គាល់ពីសក្តានុពលទេសចរណ៍ ៦គួរ រួមមាន៖ ១. គួរភ្លក្ស សំដៅឲ្យភ្ញៀវទេសចរជាតិស្គាល់ម្ហូបអាហារប្រចាំតំបន់ ២. គួរស្នាក់នៅ ដើម្បី​ស្គាល់​ពី​បន្ទប់​ស្នាក់​នៅ​ស្អាត​ពីផ្ទះស្នាក់រហូតសណ្ឋាគារលំដាប់ផ្កាយប្រាំ ៣. គួរទស្សនា តំបន់មាន​សក្តានុពល​ទេសចរណ៍​ ៤. គួរសាកល្បង ទទួលយកបទពិសោធន៍ អនុស្សាវរីយ៍ថ្មីសម្រាប់ជីវិត ៥. គួរ​ចង់​ឃើញ ​កន្លែងកម្សាន្តដែលមានស្រាប់ ឬកន្សែងកម្សាន្តថ្មីៗ និងទី៦. គួរទិញ សម្រាប់​ផលិត​ផល​ពិសេស​ប្រចាំ​តំបន់ គាំទ្រផលិតផលក្នុងស្រុកជាដើម៕ អត្ថបទ៖ ស៊ុម សុខជា