អាជ្ញាធរកំពុងខិតខំអភិវឌ្ឍខេត្តប៉ៃលិនឱ្យទៅជាតំបន់សេដ្ឋកិច្ចនិងទេសចរណ៍ដ៏មានសក្តានុពល

ប៉ៃលិន៖ ការកសាងហេដ្ឋារចនាសម្ព័ន្ធនានាដើម្បីលើកសម្រស់ខេត្តប៉ៃលិន កំពុងត្រូវបានធ្វើឡើង ដើម្បីធ្វើឱ្យខេត្តនេះក្លាយជាតំបន់សេដ្ឋកិច្ច និងទេសចរណ៍ដ៏មានសក្កានុពល ដែលជាយុទ្ធសាស្ត្រយូរអង្វែង ដើម្បីបម្រើឱ្យប្រយោជន៍ប្រជាជន និងលើកកម្ពស់មុខមាត់ជាតិ។

ក្នុងពេលចុះពិនិត្យវឌ្ឍនភាពនៃការរៀបចំកែលម្អហេដ្ឋារចនាសម្ព័ន្ធ និងការលើកកម្ពស់សោភ័ណភាព នៅតំបន់ច្រកទ្វារព្រំដែនអន្តរជាតិព្រំ ក្នុងស្រុកសាលាក្រៅ ខេត្តប៉ៃលិន ឯកឧត្តម អ៊ី ឈាន ទេសរដ្ឋមន្ត្រីទទួលបន្ទុកបេសកកម្មពិសេស បានមានប្រសាសន៍ថា ការកសាងហេដ្ឋារចនាសម្ព័ន្ធ នៅតំបន់ព្រំដែន គឺជាយុទ្ធសាស្ត្រយូរអង្វែង ដើម្បីបម្រើឱ្យប្រយោជន៍សាធារណៈ សម្រាប់ជាតិ និងប្រជាជន ជាពិសេសគឺការបង្កលក្ខណៈងាយស្រួល ដល់ការប្រកបរបរចិញ្ចឹមជីវិតរបស់ប្រជាពលរដ្ឋនៅតំបន់នោះ។

ឯកឧត្តម បានបញ្ជាក់ថា ការរៀបចំសណ្តាប់ធ្នាប់សាធារណៈ ការស្ថាបនាផ្លូវ ការដាំដើមឈើលម្អ និងការរៀបចំបរិស្ថានជុំវិញមាត់ច្រកទ្វារ មិនត្រឹមតែដើម្បីសម្រួលដល់ការធ្វើដំណើរ និងការដឹកជញ្ជូនទំនិញប៉ុណ្ណោះទេ ប៉ុន្តែគឺជាការបង្ហាញពីមុខមាត់របស់ជាតិ នៅមាត់ច្រកទ្វារអន្តរជាតិ ដែលតភ្ជាប់ជាមួយប្រទេសជិតខាង។ ជាមួយនឹងការរៀបចំឱ្យមានសោភ័ណភាពស្រស់បំព្រងនៅច្រកទ្វារព្រំដែនអន្តរជាតិព្រំ គឺជាមេដែកយ៉ាងសំខាន់ក្នុងការទាក់ទាញភ្ញៀវទេសចរជាតិ និងអន្តរជាតិ នៅពេលដែលតំបន់ព្រំដែនមានភាពស្អាត មានសណ្តាប់ធ្នាប់ និងមានបរិយាកាសល្អ វានឹងក្លាយជាគោលដៅទេសចរណ៍ដ៏ទាក់ទាញមួយ ដែលធ្វើឱ្យអ្នកដំណើរមិនត្រឹមតែឆ្លងកាត់ ប៉ុន្តែអាចឈប់សម្រាក កម្សាន្ត និងទស្សនាទិដ្ឋភាពនានា៕