មន្ត្រី CMAC ធ្វើការបំផ្ទុះគ្រាប់បែកចង្កោមប្រភេទ M85 និងកូនរបស់វា ៥៦គ្រាប់ ដែលបន្សល់ពីសង្គ្រាមឈ្លានពានថៃ នាពេលកន្លងមក

មន្ត្រីនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានធ្វើការបំផ្ទុះគ្រាប់បែកចង្កោមប្រភេទ M85 និងមានកូនវាចំនួន ៥៦គ្រាប់ ដែលមិនទាន់ផ្ទុះ នៅភូមិស្រអែមខាងត្បូង ឃុំកន្ទួត ស្រុកជាំក្សាន្ត ខេត្តព្រះវិហារ នាថ្ងៃទី៧ ខែឧសភា ឆ្នាំ២០២៦។

យោងតាមមន្ត្រី CMAC នៅទីតាំងនោះបានឱ្យដឹងថា គ្រាប់កាំភ្លើងបានបាញ់ចេញពីប្រទេសថៃ ក្នុងអំឡុងសង្គ្រាមឈ្លានពានលើបូរណភាពទឹកដីកម្ពុជា និងបានធ្លាក់ចូលវាលស្រែ និងចម្ការស្វាយចន្ទីរបស់ប្រជាពលរដ្ឋ ដែលមានចម្ងាយប្រមាណ ២៥គីឡូម៉ែត្រពីព្រំដែនប្រទេសទាំងពីរ។

គ្រាប់បែកចង្កោម (Cluster Munitions) គឺជាអាវុធហាមឃាត់ និងដ៏គ្រោះថ្នាក់បំផុតដែលផ្ទុកកូនគ្រាប់តូចៗជាច្រើននៅក្នុងគ្រាប់តែមួយ ហើយជះឥទ្ធិពលលើផ្ទៃដីធំទូលាយ។ គ្រោះថ្នាក់ចម្បងគឺនៅពេលកូនគ្រាប់មិនផ្ទុះភ្លាមៗ (កូនគ្រាប់មិនទាន់ផ្ទុះ) វាបន្សល់ទុកជាសំណល់ជាតិផ្ទុះយូរអង្វែង ដែលអាចផ្ទុះសម្លាប់ ឬធ្វើឱ្យពិការភាពដល់ប្រជាជនស៊ីវិល ជាពិសេសគឺកុមារដែលមិនស្គាល់ និងគិតថាជារបស់លេង។