កសិករស្រុកទឹកឈូថាលម៉ើងាយស្រួលដាំនិងថែទាំផ្លែច្រើនរសជាតិឆ្ងាញ់១ដើមអាចលក់បាន១ពាន់ដុល្លារ

កសិករស្រុកទឹកឈូបានបញ្ជាក់ថា លោកដាំលម៉ើបានជាង២០០ដើម មូលហេតុនៃការដាំដោយសារលម៉ើងាយស្រួលដាំ និងថែទាំ តម្លៃខ្ពស់ និងទីផ្សារមានតម្រូវការច្រើន និងមិនទាន់មានអ្នកដា។លម៉ើអាយុ២ឆ្នាំចាប់ផ្តើមផ្លែ ជាមធ្យមប្រហែល១០០គីឡូក្រាមក្នុងមួយដើម តម្លៃចាប់ពី៨-២០ដុល្លា ក្នុង១គីឡូ។ ហើយបើមានអ្នកចង់ដាំ កសិកររូបនោះថានឹងជួយប្រាប់បច្ចេកទេសផ្សេងៗដោយមិនគិតថ្លៃ។

កសិកររស់នៅឃុំកូនសត្វ ស្រុកទឹកឈូ ខេត្តកំពត លោក លឹម ភារុណ បានប្រាប់ឲ្យដឹងថា ដំបូងលោកដាំលម៉ើ៥ដើមសាកល្បង បន្ទាប់មកក៏ពង្រីករហូតមកដល់បានជាង២០០ដើម នៅលើផ្ទៃដីមួយហិតតាកន្លះ ។ កាលពីមិនទាន់មានបច្ចេកទេស លម៉ើលោកអាយុ៣ទើបមានផ្លែ ប៉ុន្តែក្រោយសិក្សាស្រាវជ្រាវបច្ចេកទេសបន្ថែម ល្ម៉ើអាយុត្រឹមតែ២ឆ្នាំ ចាប់ផ្តើមផ្លែហើយ។ លោកដាំលម៉ើដោយសារ វាងាយស្រួលដាំ និងថែទាំ ក្នុងស្រុកមិនទាន់មានអ្នកដាំ តម្លៃខ្ពស់ និងទីផ្សារមានតម្រូវការច្រើន។ ជាទូទៅលម៉ើចាប់ផ្តើមប្រមូលផលនៅខែកក្កដា រហូតដល់ខែកញ្ញា ហើយភាគច្រើនគាត់លក់តាមអនឡាញ លក់ឲ្យភ្ញៀវទេសចរមកលេងតំបន់រណីយដ្ឋានទំនប់ប្រទាក់ក្រឡា បើផ្លែទុំចាល់ច្រើន លោកលក់ដុំទៅផ្សារសាមគ្គីទីរួមខេត្តកំពត ។

កសិកររូបនោះបានបន្តថា ទោះការដាំ និងថែទាំលម៉ើមិនពិបាកក៏ពិតមែន តែកសិករដែលចង់ដាំ ត្រូវតែមកសួរនាំ ឬសិក្សាបច្ចេកទេសជាមុនសិន ដើម្បីធានាថា អាចដាំលម៉ើដុះ មានសុខភាពល្អ ផ្តល់ទិន្នផលច្រើន និងមានរសជាតិផ្អែមឆ្ងាញ់។ ហើយលោករីករាយក្នុងការចែករំលែកបទពិសោធន៍ទាំងអស់ដោយមិនគិតថ្លៃ។

បើតាមការបញ្ជាក់ លម៉ើងត្រូវការទឹកច្រើន និងជីធម្មជាតិ ដើម្បីជួយបង្កើនរសជាតិ ហើយការដាំពូជកូនលម៉ើដោយប្រើជាលិកា ល្អជាងដាំគ្រាប់ពូជ ទាំងលើសុខភាព និងការលូតលាស់ដើម គុណភាពផ្លែ និងអាយុកាល៕ អត្ថបទ ៖សារីម