ព័ត៌មាន

ឧបនាយករដ្ឋមន្ត្រី សាយ សំអាល់ ថ្លែងក្នុងវេទិកាពិភពលោកលើកទី១៣ ស្តីពីទីក្រុងនៅ Azerbaijanថា «សម្តេចតេជោ គឺជាបិតានៃសន្តិភាពរបស់កម្ពុជា»

ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានរំលឹកឡើងវិញថា សម្តេចតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្ន ជាប្រធានព្រឹទ្ធសភាកម្ពុជា បានខិតខំផ្សះផ្សា និងនាំយកបក្សពួកប្រដាប់អាវុធផ្សេងៗគ្នាឱ្យមករួមរស់ជាមួយគ្នា។ ពិតប្រាកដណាស់ សម្តេចតេជោ គឺជាបិតានៃសន្តិភាពរបស់កម្ពុជាយើង។ តាមរយៈសន្តិភាព ស្ថិរភាពនយោបាយ និងកំណើនសេដ្ឋកិច្ចប្រកបដោយចីរភាព ក្នុងរយៈពេលពីរទសវត្សរ៍ចុងក្រោយនេះ ដែលបាននិងកំពុងដឹកនាំកម្ពុជាឈានទៅរកសង្គម ដែលមានជីវភាពកម្រិតមធ្យម។

ឯកឧត្តម ឧបនាយករដ្ឋមន្ត្រី សាយ សំអាល់ បានថ្លែងដូចនេះ នៅក្នុងវេទិកាពិភពលោកលើកទី១៣ ស្តីពី«ទីក្រុង» សហការរៀបចំដោយកម្មវិធីអង្គការសហប្រជាជាតិទទួលបន្ទុកលំនៅឋានមនុស្សជាតិ (UN Habitat) និងរដ្ឋាភិបាលសាធារណរដ្ឋ Azerbaijan នៅទីក្រុង បាគូ (Baku) នៅថ្ងៃទី១៨ ខែឧសភា ឆ្នាំ ២០២៦។

ឯកឧត្តមឧបនាយករដ្ឋមន្ត្រី សាយ សំអាល់ បានថ្លែងទៀតថា អតីតកាលដ៏រុងរឿង និងចំណុចកំពូលនៃអារ្យធម៌របស់យើងគឺស្ថិតនៅក្នុងសម័យអង្គរ ប៉ុន្តែជម្លោះផ្ទៃក្នុង និងសង្រ្គាមរ៉ាំរ៉ៃ ជាបន្តបន្ទាប់ក្នុងរយៈពេល ៥០០ឆ្នាំចុងក្រោយនេះ បានធ្វើឱ្យកម្ពុជាក្លាយជាប្រទេសមួយដែលងាយរងគ្រោះបំផុត។ បន្ទាប់ពីទទួលបានឯករាជ្យពីប្រទេសបារាំង កម្ពុជាធ្លាប់ជាប្រទេសដ៏ក្មេងខ្ចី និង មានជីវភាពរស់រវើក។ ទោះបីយ៉ាងណា ក្នុងយុគសម័យមាសនេះ មិនបានស្ថិតស្ថេរយូរអង្វែងឡើយ។ ទីក្រុងនានានៅទូទាំងប្រទេសកម្ពុជា ត្រូវបានបំផ្លិចបំផ្លាញ ដោយសារសង្រ្គាមវៀតណាម ក្នុងទសវត្សរ៍ឆ្នាំ ៦០ និង ៧០ ទីក្រុងរបស់យើងត្រូវបានជម្លៀសឱ្យនៅទំនេរទទេរស្អាតដោយរបបខ្មែរក្រហម។ នៅទសវត្សរ៍ឆ្នាំ៨០ កម្ពុជាបានក្លាយជាសមរភូមិនៃសង្រ្គាមត្រជាក់ និងជាប្រទេសមួយដែលខ្ទេចខ្ទាំ។

ឯកឧត្តមឧបនាយករដ្ឋមន្ត្រីបន្តថា អតីតនាយករដ្ឋមន្រ្តីរបស់យើង សម្តេចតេជោ ហ៊ុន សែន បានខិតខំផ្សះផ្សា និងនាំយកបក្សពួកប្រដាប់អាវុធផ្សេងៗគ្នាឱ្យមករួមរស់ជាមួយគ្នា។ សម្តេចតេជោ បានដាស់ស្មារតីជាតិឡើងវិញដល់ប្រជាជនរបស់យើង តាមរយៈគំនិតផ្តួចផ្តើមនៃការបង្រួបបង្រួមជាតិ និងការផ្សះផ្សារបស់សម្តេចតេជោ បាននាំមកនូវក្តីសង្ឃឹមជាថ្មីសម្រាប់កម្ពុជា។ ពិតប្រាកដណាស់ សម្តេចតេជោ គឺជាបិតានៃសន្តិភាពរបស់កម្ពុជាយើង។ តាមរយៈសន្តិភាព ស្ថិរភាពនយោបាយ និងកំណើនសេដ្ឋកិច្ចប្រកបដោយចីរភាព ក្នុងរយៈពេលពីរទសវត្សរ៍ចុងក្រោយនេះ ដែលបាន និងកំពុងដឹកនាំកម្ពុជាឈានទៅរកសង្គម ដែលមានជីវភាពកម្រិតមធ្យម។ នេះជាឱកាសសម្រាប់យើងក្នុងការកសាងកម្ពុជាជាថ្មីមួយ៕ អត្ថបទ៖ ធូ វិរៈ