ខេត្តឧត្ដរមានជ័យ ប្រកាសចូលកាន់មុខតំណែងអភិបាលរងខេត្ត និងនាយករដ្ឋបាល

ឯកឧត្តម ប៊ុន ហុន រដ្ឋលេខាធិការ ជាតំណាង ឯកឧត្តម អភិសន្តិបណ្ឌិត ស សុខា ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីភាព ក្នុងពិធីប្រកាសចូលកាន់មុខតំណែងអភិបាលរងនៃគណៈអភិបាលខេត្តឧត្តរមានជ័យ និងនាយករដ្ឋបាលសាលាខេត្តថ្មី ដោយលោក ប៉ិច រតនៈ ត្រូវបានប្រកាសចូលកាន់តំណែងជានាយករដ្ឋបាលខេត្ត ខណៈលោក រិទ្ធី ប៉ាក់ ត្រូវបានតែងតាំងជាអភិបាលរងខេត្តឧត្ដរមានជ័យ ជំនួសលោក ផៃ ប៊ុនវណ្ណៈ ដែលត្រូវបម្រើការនៅទីស្ដីការនៃក្រសួងមហាផ្ទៃ។ ក្នុងពិធីនេះក៏មានការចូលរួមពី ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ និងឯកឧត្ដម ស៉ី ប្រាសិទ្ធ ប្រធានក្រុមប្រឹក្សាខេត្ត រួមទាំងប្រធាន អនុប្រធានមន្ទីរ អង្គភាពពាក់ព័ន្ធជាច្រើនរូបនៅថ្ងៃទី១៨ឧសភាឆ្នាំ២០២៦។

លោក រិទ្ធី ប៉ាក់ ដែលទើបនិងចូលកាន់តំណែងជាអភិបាលរងខេត្តឧត្ដរមានជ័យថ្មី បានធ្វើការប្តេជ្ញាចិត្តយ៉ាងមុតមាំថា នឹងគោរពនិងអនុវត្តតាមរដ្ឋធម្មនុញ្ញ ច្បាប់ ព្រះរាជក្រឹត្យ អនុក្រឹត្យ និងសេចក្តីណែនាំនានារបស់រាជរដ្ឋាភិបាលឱ្យបានខ្ជាប់ខ្ជួន, ការពារជាតិ សាសនា ព្រះមហាក្សត្រ, បង្កើនសាមគ្គីភាពផ្ទៃក្នុងឱ្យបានល្អ, និងខិតខំប្រឹងប្រែងអស់ពីកម្លាំងកាយចិត្ត សហការជាមួយថ្នាក់ដឹកនាំខេត្ត គ្រប់លំដាប់ថ្នាក់ ដើម្បីបម្រើសេវាសាធារណៈ ថែរក្សាសន្តិសុខសណ្តាប់ធ្នាប់ និងចូលរួមចំណែកអភិវឌ្ឍន៍ខេត្តឧត្តរមានជ័យឱ្យកាន់តែរីកចម្រើនបន្ថែមទៀត។

ឯកឧត្ដម មាន ចាន់យ៉ាដា បានលើកឡើងថា ការប្រកាសឡើងកាន់តំណែង គឺជាភារកិច្ចចាំបាច់ និងជាតម្រូវការរបស់រាជរដ្ឋាភិបាល ស្របតាមគោលនយោបាយជាតិ ជាពិសេសត្រូវបន្តដឹកនាំឲ្យបានប្រសើរ ជំរុញសាមគ្គីភាពផ្ទៃក្នុង យកចិត្តទុកដាក់ធ្វើការងារ ប្រកបដោយការទទួលខុសត្រូវខ្ពស់ ដើម្បីអភិវឌ្ឍន៍ក្នុងមូលដ្ឋាន។

ឯកឧត្តមសន្តិបណ្ឌិត ប៊ុន ហុន មានប្រសាសន៍ថា អភិបាលរងខេត្ត និងនាយករដ្ឋបាលខេត្ត ដែលទើបចូលកាន់មុខតំណែងថ្មី ត្រូវតែគោរព និងអនុវត្តឱ្យបានយ៉ាងម៉ឺងម៉ាត់តាមឋានានុក្រមដឹកនាំរបស់រាជរដ្ឋាភិបាលកម្ពុជា និងក្រសួងមហាផ្ទៃ ដើម្បីសម្រេចឱ្យបានជោគជ័យនូវគ្រប់កម្មវិធីនយោបាយ និងយុទ្ធសាស្ត្របញ្ចកោណ សំដៅលើកកម្ពស់អភិបាលកិច្ចល្អ និងរួមចំណែកកាត់បន្ថយភាពក្រីក្រជូនប្រជាពលរដ្ឋ។

ឯកឧត្តម រដ្ឋលេខាធិការ បានផ្តល់ការណែនាំនិងផ្តាំផ្ញើបន្ថែមដល់ថ្នាក់ដឹកនាំថ្មីទាំងពីររូប ត្រូវបង្កើនសាមគ្គីភាព ឯកភាពផ្ទៃក្នុងជាមួយថ្នាក់ដឹកនាំគ្រប់លំដាប់ថ្នាក់ ក្នុងជួររដ្ឋបាលខេត្ត ព្រមទាំងបង្កើនទំនាក់ទំនង និងកិច្ចសហការល្អជាមួយបណ្តាមន្ទីរ-អង្គភាពពាក់ព័ន្ធ កងកម្លាំងប្រដាប់អាវុធ អាជ្ញាធរក្រុង-ស្រុក សមាគម និងអង្គការនានា ដើម្បីរួមចំណែកសម្រេចបានជោគជ័យនូវគ្រប់ផែនការការងាររបស់ខេត្ត និងជាពិសេសគឺការបង្កើត និងថែរក្សាជំនឿចិត្តឱ្យបានទ្វេដងពីសំណាក់បងប្អូនប្រជាពលរដ្ឋនៅក្នុងមូលដ្ឋានផងដែរ៕ ដោយ ៖ ឃិនសារិទ្ធ