ពលរដ្ឋប្រកបរបររត់ម៉ូតូកង់បី ចែករំលែកបទពិសោធន៍ពីការរៀនជំនាញ ធីវ៉េត ដើម្បីបង្កើនប្រាក់ចំណូលបន្ថែម

លោក ប៊ុត សារ៉ូ មានស្រុកកំណើតនៅខេត្តព្រៃវែង បច្ចុប្បន្នប្រកបរបររត់ម៉ូតូកង់បី នៅរាជធានីភ្នំពេញ និងជាសិស្សកំពុងទទួលការបណ្តុះបណ្តាលជំនាញបច្ចេកទេស និងវិជ្ជាជីវៈ (ធីវ៉េត) នៅក្នុងវិទ្យាស្ថានបច្ចេកទេសឧស្សាហកម្ម (ITI) បានចែករំលែកបទពិសោធន៍ពីការរៀនជំនាញ និងការរកប្រាក់ចំណូលបន្ថែម ក្រៅពីសេវាកម្មដឹកជញ្ជូនប្រចាំថ្ងៃ។

នៅក្នុងបទសម្ភាសន៍ជាមួយព័ត៌មាន ប៊ីធីវី លោក ប៊ុត សារ៉ូ បាននិយាយឱ្យដឹងថា ក្រោម​គម្រោងប​ណ្តុះបណ្តាលជំនាញបច្ចេកទេស និងវិជ្ជាជីវៈដល់យុវជនមកពីគ្រួសារក្រីក្រ និង​គ្រួសារ​ងាយ​រង​ហានិភ័យចំនួន ១,៥លាននាក់ (TVET 1,5M) ពិតជាល្អខ្លាំងណាស់ និងផ្តល់ប្រយោជន៍ជាច្រើន ដែលធ្វើ​ឱ្យ​រូប​លោក​អាច​រក​ចំណូលបន្ថែម ក្រៅពីមុខរបរប្រចាំថ្ងៃ។

លោកបានរៀបរាប់ដោយទឹកមុខញញឹមទៀតថា គិតមកដល់ពេលនេះ លោកបានរៀនជំនាញផ្នែកបរិក្ខាត្រជាក់ និងគេហដ្ឋាន បានរយៈពេលប្រមាណ៥ខែហើយ ដោយទទួលបានទាំងចំណេះ និងជំនាញពិតប្រាកដពីគ្រូបណ្តុះបណ្តាលដែលមានជំនាញច្បាស់លាស់។ លោកបានឱ្យដឹងទៀតថា រាល់ថ្ងៃនេះ បើទោះបីជាការរៀនក្នុងរយៈពេលខ្លីក៏ពិតមែន ប៉ុន្តែលោកក៏អាចរកប្រាក់ចំណូលបណ្តើរៗ ពីការរៀនជំនាញនេះផងដែរ។

លោកបាននិយាយទៀតថា កម្មវិធីនេះ ពិតជាល្អមែន​ទែន​ដែល​រាជ​រដ្ឋាភិបាល​បាន​គិតគូរដល់ប្រជាពលរដ្ឋគ្រប់វណ្ណៈទាំងអស់ មិនថាតែកម្មករ កម្មការិនី អ្នក​ប្រកប​របរ​សេដ្ឋកិច្ចក្រៅប្រព័ន្ធនានា សូម្បីតែពលរដ្ឋប្រកបរបររត់កង់បី ក៏ទទួលបានការគិតគូរផងដែរ ខណៈ​ការ​រកប្រាក់ចំណូលពីវិស័យដឹកជញ្ជូនសព្វថ្ងៃ មានការថយចុះ ហើយក៏​មិន​ដឹង​ទៅ​រក​ការ​ងារ​អ្វី​ថ្មី​ក្រៅ​ពីការងារដឹកជញ្ជូនមួយនេះ។

ពាក់ព័ន្ធការរៀនចំនាញ ធីវ៉េត ខាងលើនេះ លោក ជិន តារ៉ា នាយកវិទ្យាស្ថានបច្ចេកទេសឧស្សាហកម្ម (ITI) បានមានប្រសាសន៍ឱ្យដឹងថា ដើម្បីបង្កើនការរកប្រាក់ចំណូលបន្ថែម ពលរដ្ឋប្រកបរបររត់ម៉ូតូកង់បី (Pass App) មិន​មែន​ជា​មធ្យោបាយបង្កើតចំណូលតាមរយៈការដឹកជញ្ជូនភ្ញៀវមួយមុខប៉ុណ្ណោះទេ ក្រសួងការងារ បាន​កែ​ច្នៃ Pass App ឲ្យក្លាយទៅជាមធ្យោបាយសម្រាប់ប្រជាពលរដ្ឋដែលប្រកបរបរនេះ ឲ្យ​បង្កើត​​ចំណូលបន្ថែមតាមរយៈការទៅរៀនជំនាញបណ្តុះបណ្តាលជាមួយក្រសួងការងារ។

​​យោងតាមក្រសួងការងារ និងបណ្តុះបណ្តាលវិជ្ជាជីវៈ គិតត្រឹមត្រីមាសទី១ ឆ្នាំ២០២៦ តាមរយៈកម្មវីធីបណ្តុះបណ្តាល​ជំនាញវិជ្ជាជីវៈ និង​បច្ចេ​កទេសដល់​យុវជនមកពី​គ្រួសារ​​ក្រីក្រ និងគ្រួសារងាយរងហានិភ័យ ឬ​ហៅថា កម្មវិធី TVET 1,5M បានទទលការចុះឈ្មោះដើម្បីចំនួនសរុបប្រមាណជាង ២៧ម៉ឺននាក់។ កម្មវិធីបណ្តុះបណ្តាលជំនាញ ដោយឥតគិតថ្លៃនេះ រាជរដ្ឋាភិបាល បានកំណត់យកមុខជំនាញក្នុងវិស័យអាទិភាពចំនួន១០ រួមមាន៖ សំណង់ , អគ្គិសនីនិងថាមពល , បរិក្ខាត្រជាក់និងកម្តៅ ,ទេសចរណ៍ , មេកានិកទូទៅ/មេកានិករថយន្ត , សេវាកម្ម , កសិកម្ម និងកសិ-ឧស្សាហកម្ម , កម្មន្តសាល , អេឡិចត្រូនិច និងធុរកិច្ចនិងព័ត៌មានវិទ្យា៕

អត្ថបទ៖ ឈិត បូរ៉ាវី