អ្នកនាំពាក្យ ៖ ទណ្ឌិតជាក្មេងទំនើង ពុំមែនបញ្ជូនទៅជួរមុខផ្ទាល់នោះទេ គឺបញ្ជូនទៅទីតាំងថ្មីដើម្បីធ្វើពលកម្មយកលទ្ធផល គាំទ្រដល់កម្លាំងជួរមុខប៉ុណ្ណោះ

ភ្នំពេញ ៖ លោកឃៀង សុណាឌីន អ្នកនាំពាក្យ នៃអគ្គនាយកដ្ឋានពន្ធនាគារក្រសួងមហាផ្ទៃ កាលពីយប់ថ្ងៃទី២២ ខែឧសភា ឆ្នាំ២០២៦ បានចេញសារបញ្ជាក់អំពីការបញ្ជូនខ្លួនទណ្ឌិតជាក្មេងទំនើង៧៩០នាក់ ទៅមណ្ឌលអប់រំកែប្រែថ្មីចំនួន០២ ជូនសាធារណៈជន ជៀសវៀងការភ័ន្តច្រលំអំពីការបញ្ជូនពួកគេទៅជួរមុខផ្ទាល់ ។

អ្នកនាំពាក្យអគ្គនាយកដ្ឋានពន្ធនាគាររូបនេះ បញ្ជាក់នៅលើបណ្តាញទំនាក់ទំនងសង្គមផ្ទាល់ខ្លួនរបស់លោកថា ៖ “ ខ្ញុំបានកត់សម្គាល់ឃើញថា មានរូបភាពយល់ពុំទាន់ច្បាស់ថាក្មេងៗជាទណ្ឌិតទាំងនោះ នឹងត្រូវបញ្ជូនទៅជួយជួរមុខផ្ទាល់ តែជាក់ស្តែងមិនដូចការយល់ឃើញនេះឡើយ គឺទណ្ឌិតដែលកំពុងពេញវ័យពេញកម្លាំងទាំងនោះ ត្រូវប្រមូលផ្តុំយកទៅអនុវត្តទោសបន្តនៅមណ្ឌលអប់រំកែប្រែទី៤នៅខេត្តពោធិ៍សាត់ និងនៅពន្ធនាគារខេត្តឧត្តរមានជ័យ “ ។

លោកបន្តថា “ បន្ថែមពីលើកម្មវិធីអប់រំបណ្តុះបណ្តាលទូទៅដូចពន្ធនាគារទូទាំងប្រទេស អង្គភាពទាំង២នេះនឹងបង្កើនសកម្មភាពបណ្តុះបណ្តាល និងអនុវត្តជាក់ស្តែងក្នុងទីតាំងបរិវេណពន្ធនាគារ លើជំនាញកសិកម្មរួមមានការដាំដុះបន្លែបង្ការ ការចិញ្ចឹមសត្វ និងការងារសំណង់ ហើយភោគផល និងសមិទ្ធផលដែលទទួលបានពីការអនុវត្តនេះនឹងយកទៅជួយគាំទ្រដល់ជួរមុខ ដូចគ្នានឹងសកម្មភាពដែលបងប្អូនប្រជាពលរដ្ឋខ្មែរក្នុងនៅក្រៅប្រទេសក្នុងនាមសមរភូមិក្រោយ បាននិងកំពុងជួយទៅដល់សមរភូមិមុខ ។ ទណ្ឌិតទាំងនោះក៏ជាកោសិកាសង្គមដែរ គ្រាន់តែជាកោសិកាដែលកំពុងទទួលការដុសខាត់និងជួសជុលឡើងវិញ ដើម្បីជាប្រយោជន៏ដល់សង្គមជាតិ “ ។

គួររំលឹកថា ៖ អនុវត្តតាម អនុសាសន៍ដ៏ខ្ពង់ខ្ពស់របស់ ប្រមុខរាជរដ្ឋាភិបាលកម្ពុជា និងថ្នាក់ដឹកនាំក្រសួងមហាផ្ទៃ អគ្គនាយកដ្ឋានពន្ធនាគារ បានចាត់ចែងផ្ទេរទណ្ឌិតជាក្មេងទំនើង ភេទប្រុស សរុប៧៩០នាក់ ពីបណ្តាមណ្ឌលអប់រំកែប្រែ និងពន្ធនាគារតាមបណ្តារាជធានី-ខេត្ត ទៅអនុវត្តទោសបន្តនៅមណ្ឌលអប់រំកែបប្រែ និងពន្ធនាគារគោលដៅ ចំនួន០២ គឺមណ្ឌលអប់រំកែប្រែទី៤ (ខេត្តពោធិ៍សាត់) ចំនួន៦៥១នាក់ និងពន្ធនាគារខេត្តឧត្តរមានជ័យ ចំនួន១៣៩នាក់ ៕ លីហេង