ក្រសួងមហាផ្ទៃបើកកិច្ចប្រជុំផ្សព្វផ្សាយសេចក្តីណែនាំស្តីពីវិធានការអនុវត្តលើការបើកផ្តល់បៀវត្សនិងប្រាក់ឧបត្ថម្ភគោលនយោបាយជូនមន្ត្រីនគរបាលជាតិកម្ពុជា

ក្រសួងមហាផ្ទៃបានរៀបចំកិច្ចប្រជុំផ្សព្វផ្សាយសេចក្តីណែនាំស្តីពី «វិធានការអនុវត្តលើការបើកផ្តល់បៀវត្ស និងប្រាក់ឧបត្ថម្ភគោលនយោបាយជូនមន្ត្រីនគរបាលជាតិកម្ពុជា» ក្នុងគោលបំណងបង្កើនប្រសិទ្ធភាពការងារកំណែទម្រង់ធនធានមនុស្សឱ្យកាន់តែល្អប្រសើរឡើង មានស្មារតីទទួលខុសត្រូវយកចិត្តទុកដាក់ខ្ពស់ និងលើកកម្ពស់ការផ្គត់ផ្គង់ជីវភាពជូនមន្ត្រីនគរបាលជាតិ ឱ្យបានទាន់ពេលវេលា។

ឯកឧត្តម នាយឧត្តមសេនីយ៍ សាស្ត្រាចារ្យ សេង ផល្លី អគ្គនាយកនៃអគ្គនាយកដ្ឋានធនធានមនុស្ស និងឯកឧត្តម នាយឧត្តមសេនីយ៍ សេង យូអ៊ាន់ អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ បានដឹកនាំកិច្ចប្រជុំផ្សព្វផ្សាយសេចក្តីណែនាំស្តីពី «វិធានការអនុវត្តលើការបើកផ្តល់បៀវត្សនិងប្រាក់ឧបត្ថម្ភគោលនយោបាយជូនមន្ត្រីនគរបាលជាតិកម្ពុជា» នៅរសៀលថ្ងៃទី២៥ ខែឧសភា ឆ្នាំ២០២៦។

កិច្ចប្រជុំនេះ ក្នុងគោលបំណងបង្កើនប្រសិទ្ធភាពការងារកំណែទម្រង់ធនធានមនុស្សឱ្យកាន់តែល្អប្រសើរឡើង មានស្មារតីទទួលខុសត្រូវយកចិត្តទុកដាក់ខ្ពស់ និងលើកកម្ពស់ការផ្គត់ផ្គង់ជីវភាពជូនមន្ត្រីនគរបាលជាតិ ឱ្យបានទាន់ពេលវេលា។

បន្ទាប់ពីកិច្ចចាប់ផ្តើមនៃកិច្ចប្រជុំ លោកឧត្តមសេនីយ៍ទោ តិច សុខា ប្រធាននាយកដ្ឋានផែនការសេដ្ឋកិច្ច និងហិរញ្ញវត្ថុ (ផ្នែកសន្តិសុខសាធារណៈ) បានអាននូវសេចក្តីណែនាំស្តីពីវិធានការអនុវត្តលើការបើកផ្តល់បៀវត្សនិងប្រាក់ឧបត្ថម្ភគោលនយោបាយជូនមន្ត្រីនគរបាលជាតិកម្ពុជា។ បន្ទាប់មកឯកឧត្តម នាយឧត្តម សេនីយ៍ សេង យូអ៊ាន់ ក៏បានធ្វើការពន្យល់បកស្រាយបន្ថែមនូវខ្លឹមសារនិងសេចក្តីណែនាំខាងលើ។

ថ្លែងនៅក្នុងកិច្ចប្រជុំ ឯកឧត្តម នាយឧត្តមសេនីយ៍ សាស្ត្រាចារ្យ សេង ផល្លី បានធ្វើការកត់សម្គាល់និង ស្នើអង្គភាពពាក់ព័ន្ធរៀបចំកិច្ចការងារមួយចំនួនឱ្យបានទាន់ពេលវេលា ដែលក្នុងនោះទាក់ទងនឹងការរៀបចំសំណុំឯកសារស្នើសុំបៀវត្សប្រាក់លម្អៀងមុខតំណែង និងប្រាក់លម្អៀងឋានន្តរសក្តិ និងការរៀបចំសំណុំបែបបទរបស់មន្ត្រីនគរបាលជាតិចូលនិវត្តន៍ ចូលបាត់បង់សមត្ថភាព ការងារ ពលី មរណៈ ពិការ និងលាឈប់ពីការងារ ព្រមទាំងស្នើអង្គភាពដែលមានមន្ត្រីផ្ទេរក្របខ័ណ្ឌនិងបៀវត្សពីក្រសួង ស្ថាប័ននានា មកក្នុងក្របខ័ណ្ឌមន្ត្រីនគរបាលជាតិកម្ពុជា ជួយសម្របសម្រួលពន្លឿនរៀបចំបែបបទរំលឹកបៀវត្សឱ្យបានឆាប់រហ័ស ដើម្បីអគ្គនាយកដ្ឋានធនធានមនុស្ស និងអគ្គនាយកដ្ឋានភស្តុភារនិងហិរញ្ញវត្ថុ អនុវត្តនីតិវិធីបន្ត ចៀសវាង មានភាពយឺតយ៉ាវដោយប្រការណាមួយ៕