សមត្ថកិច្ចខេត្តមណ្ឌលគិរី បញ្ជូនជនជាតិចិន និងមីយ៉ាន់ម៉ា៨០នាក់ ទៅនាយកដ្ឋានអន្តោប្រវេសន៍ ពាក់ព័ន្ធនឹងបទល្មើសឆបោកតាមប្រព័ន្ធអនឡាញ

មណ្ឌលគិរី៖ អាជ្ញាធរមានសមត្ថកិច្ចបាននិងកំពុងបន្តរឹតបន្តឹងការគ្រប់គ្រងជនបរទេស និងការបង្ក្រាបបទល្មើសបច្ចេកវិទ្យាយ៉ាងម៉ឺងម៉ាត់នៅក្នុងភូមិសាស្ត្រខេត្តមណ្ឌលគិរី។ ជាក់ស្ដែង នៅព្រឹកថ្ងៃទី០៧ ខែមិថុនា ឆ្នាំ២០២៦នេះ ជនបរទេសសរុបចំនួន ៨០នាក់ ដែលមានសញ្ជាតិចិន និងមីយ៉ាន់ម៉ា ត្រូវបានកម្លាំងសមត្ថកិច្ចជំនាញរៀបចំបញ្ជូនបន្តទៅកាន់នាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ ដើម្បីចាត់វិធានការបន្តតាមផ្លូវច្បាប់។

​កិច្ចប្រតិបត្តិការឈានទៅដល់ការបញ្ជូនខ្លួនជនបរទេសទាំង ៨០នាក់នេះ បានធ្វើឡើងបន្ទាប់ពីកម្លាំងសមត្ថកិច្ចបានបើកយុទ្ធនាការចុះត្រួតពិនិត្យ និងអនុវត្តវិធានការរដោដោយផ្ទាល់ ទៅលើទីតាំងស្នាក់នៅ និងទីតាំងអាជីវកម្មមួយចំនួនដែលគួរឱ្យសង្ស័យ នៅក្នុងខេត្តមណ្ឌលគិរី។

​ប្រភពពីមន្ត្រីអនុវត្តច្បាប់បានឱ្យដឹងថា បច្ចុប្បន្នជនបរទេសទាំង ៨០នាក់នេះ កំពុងត្រូវបានបញ្ជូនទៅអង្គភាពជំនាញអន្តោប្រវេសន៍ហើយ ដើម្បីរៀបចំសំណុំរឿង ពិនិត្យឯកសារពាក់ព័ន្ធ និងអនុវត្តនីតិវិធីបន្តបន្ទាប់ស្របតាមច្បាប់ជាធរមាននៃព្រះរាជាណាចក្រកម្ពុជា។

សមត្ថកិច្ចបានបញ្ជាក់បន្ថែមថា ប្រតិបត្តិការក្តៅគគុកនេះ គឺជាផ្នែកមួយនៃផែនការយុទ្ធសាស្ត្រក្នុងការបង្កើនប្រសិទ្ធភាពគ្រប់គ្រងជនបរទេស និងការបើកយុទ្ធនាការទប់ស្កាត់បទល្មើសឆ្លងដែនគ្រប់ប្រភេទ ពិសេសគឺការបង្ក្រាបនិងលុបបំបាត់សកម្មភាពឆបោកតាមប្រព័ន្ធអនឡាញ (Online Scam) ដែលកំពុងស្ថិតក្រោមការយកចិត្តទុកដាក់ និងដៅមុខសញ្ញាយ៉ាងម៉ឺងម៉ាត់ពីរាជរដ្ឋាភិបាល និងស្ថាប័នអនុវត្តច្បាប់ ដើម្បីការពារសន្តិសុខ និងសណ្ដាប់ធ្នាប់សង្គមឱ្យបានល្អប្រសើរ៕