អតីតសកម្មជនគណបក្សប្រឆាំងចំនួន ៥១នាក់ ចូលរួមជីវភាពនយោបាយជាមួយគណបក្សប្រជាជនកម្ពុជា

ស្របពេលដែលប្រជាពលរដ្ឋកាន់តែមានទំនុកចិត្តលើការដឹកនាំរបស់រាជរដ្ឋាភិបាលកម្ពុជា លោក រស់ ចំណាន ទីប្រឹក្សាសម្តេចតេជោ ហ៊ុន សែន ប្រធានគណបក្សប្រជាជនកម្ពុជា រួមដំណើរដោយ លោក សឿង ចក់ និងក្រុមការងារ នាថ្ងៃទី០៧ ខែឧសភា ឆ្នាំ២០២៦ បានអញ្ជើញចុះជួបសំណេះសំណាល និងទទួលស្វាគមន៍យ៉ាងកក់ក្តៅចំពោះបងប្អូនអតីតសកម្មជនរបស់គណបក្សភ្លើងទៀនចំនួន ៥១នាក់ ដែលបានសម្រេចចិត្តស្ម័គ្រចិត្តចូលរួមរស់ក្នុងជីវភាពនយោបាយជាមួយគណបក្សប្រជាជនកម្ពុជា។

ពិធីជួបសំណេះសំណាល និងទទួលស្វាគមន៍នេះ ត្រូវបានរៀបចំឡើងនៅក្នុងឃុំស្វាយប្រទាល និងឃុំតាលន់ ស្រុកស្អាង ខេត្តកណ្តាល ក្រោមបរិយាកាសស្និទ្ធស្នាល និងរីករាយជាគ្រួសារខ្មែរតែមួយ។នៅក្នុងឱកាសដ៏មានអត្ថន័យនោះ លោក រស់ ចំណាន បានពាំនាំនូវប្រសាសន៍ផ្តាំផ្ញើសួរសុខទុក្ខ សេចក្តីនឹករលឹក និងការគិតគូរយ៉ាងជ្រាលជ្រៅបំផុតពីសំណាក់៖

សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា សម្តេចធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃកម្ពុជា។

ឯកឧត្តម គួច ចំរើន ប្រធានគណៈកម្មាធិការគណបក្សប្រជាជនកម្ពុជាខេត្តកណ្តាល និងជាអភិបាលខេត្តកណ្តាល

ថ្នាក់ដឹកនាំទាំងអស់ជានិច្ចកាលតែងតែយកចិត្តទុកដាក់ចំពោះសុខទុក្ខ និងជីវភាពរស់នៅរបស់បងប្អូនប្រជាពលរដ្ឋនៅគ្រប់ទីកន្លែង ដោយមិនមានការរើសអើងនិន្នាការនយោបាយឡើយ។

លោក រស់ ចំណាន មានប្រសាស៍បន្តទៀតថា«គណបក្សប្រជាជនកម្ពុជា គឺជាបក្សនយោបាយដែលមានភាពចាស់ទុំ មានរចនាសម្ព័ន្ធរឹងមាំ និងមានគោលនយោបាយច្បាស់លាស់ក្នុងការបម្រើជាតិ និងប្រជាជន។ ការចូលរួមរបស់បងប្អូននៅថ្ងៃនេះ គឺជាកម្លាំងសាមគ្គីបន្ថែមទៀតក្នុងការរួមគ្នារក្សាសុខសន្តិភាព និងអភិវឌ្ឍន៍ប្រទេសជាតិរបស់យើងឱ្យកាន់តែរីកចម្រើន»។

ក្រៅពីពិធីទទួលស្វាគមន៍សមាជិកថ្មី នៅក្នុងឱកាសចុះបេសកកម្មនោះដែរ លោក រស់ ចំណាន និងក្រុមការងារ ក៏បានបន្តដំណើរចុះសួរសុខទុក្ខដោយផ្ទាល់ដល់ខ្នងផ្ទះ និងបាននាំយកអំណោយមនុស្សធម៌ដ៏ថ្លៃថ្លារបស់សម្តេចតេជោ ហ៊ុន សែន ឧបត្ថម្ភជូនដល់គ្រួសារដែលមានជីវភាពខ្វះខាតជួបការលំបាកចំនួន ៥ គ្រួសារ នៅក្នុងមូលដ្ឋាន។

ការចុះចែកអំណោយនេះ គឺដើម្បីជួយសម្រាលទុក្ខលំបាកមួយផ្នែករបស់បងប្អូន និងស្តែងឱ្យឃើញពីការយកចិត្តទុកដាក់ខ្ពស់ពីសម្តេចតេជោ ហ៊ុន សែន និងការរស់នៅរបស់ប្រជាពលរដ្ឋ ដោយមិនទុកឱ្យពលរដ្ឋណាម្នាក់ស្លាប់ដោយអត់បាយដោយគ្មានការដឹងឮពីអាជ្ញាធរ និងគណបក្សនោះឡើយ។

តំណាងអតីតសកម្មជនគណបក្សភ្លើងទៀនដែលបានស្ម័គ្រចិត្តចូលរួមជីវភាពនយោបាយ បានសម្តែងនូវភាពរីករាយ និងក្តីរំភើបឥតឧបមា ដែលត្រូវបានលោក រស់ ចំណាន និងក្រុមការងារ របស់គណបក្សប្រជាជនកម្ពុជាផ្តល់កិត្តិយស និងទទួលស្វាគមន៍យ៉ាងកក់ក្តៅបំផុត។ បងប្អូនបានលើកឡើងថា មូលហេតុដែលពួកគាត់សម្រេចចិត្តដើរចេញពីបក្សចាស់ គឺដោយសារតែអស់ជំនឿលើការដឹកនាំ និងសម្លឹងឃើញយ៉ាងច្បាស់ថា មានតែគណបក្សប្រជាជនកម្ពុជាតែមួយគត់ ដែលជាបង្អែកដ៏រឹងមាំ អាចរក្សាសន្តិភាព និងនាំមកនូវការអភិវឌ្ឍន៍ពិតប្រាកដជូនជាតិមាតុភូមិ។

បងប្អូនអតីតសកម្មជនទាំងអស់បានប្តេជ្ញាចិត្តយ៉ាងមុតមាំថា នឹងគោរពតាមលក្ខន្តិកៈរបស់គណបក្ស បោះឆ្នោតគាំទ្រគណបក្សប្រជាជនកម្ពុជា និងខិតខំប្រឹងប្រែងអស់ពីកម្លាំងកាយចិត្ត ដើម្បីចូលរួមចំណែកក្នុងសកម្មភាពការងារនយោបាយនៅមូលដ្ឋាន ស្របតាមការណែនាំរបស់គណបក្សឱ្យទទួលបានជោគជ័យនៅថ្ងៃបោះឆ្នោតខាងមុខ៕