សម្តេចតេជោ៖ ដីដែលទាហានថៃកំពុងឈ្លានពាន និងកាន់កាប់បច្ចុប្បន្នត្រូវតែយកមកវិញឲ្យខាងតែបាន

នៅចំពោះមុខពលរដ្ឋភៀសសឹក ខេត្តបន្ទាយមានជ័យ នាព្រឹកថ្ងៃទី៩ ខែមិថុនា ឆ្នាំ២០២៦នេះ សម្តេចតេ ជោ ហ៊ុន សែន ប្រមុខរដ្ឋស្តីទីបានប្រកាសថា ទឹកដីខ្មែរដែលទាហានថៃកំពុងឈ្លានពាន និងកាន់កាប់ ដោយខុសច្បាប់នាពេលនេះត្រូវតែទាមទារយកមកវិញឲ្យខាងតែបាន ដោយការទាមទារនេះនឹងធ្វើឡើង ដោយសន្តិវិធី និងទៅតាមច្បាប់អន្តរជាតិ។

ក្នុងឱកាសអញ្ជើញជួបសំណេះសំណាល ជាមួយប្រជាពលរដ្ឋភៀសសឹក នៅមណ្ឌលបណ្តោះអាសន្ន ឃុំស្លក្រាម ខេត្តបន្ទាយមានជ័យ នាព្រឹកថ្ងៃទី៩ ខែមិថុនា ឆ្នាំ២០២៦នេះ សម្តេចតេជោ ហ៊ុន សែន បានបញ្ជាក់យ៉ាងច្បាស់ៗថា កម្ពុជាពុំមែនមានន័យថាគ្មានសមត្ថភាពឬគ្មានអាវុធវាយដណ្តើមយកដីមកវិញនោះទេ ប៉ុន្តែបើយើងវាយមុន ដើម្បីដណ្តើមយកមកវិញនោះ គឺគេនឹងចោទកម្ពុជាថាបំពាននឹងកិច្ចព្រមព្រៀងបទឈប់បាញ់ ដូច្នេះកម្ពុជាត្រូវតែធ្វើការអត់ធ្មត់ដើម្បីចរចាដោយសន្តិវិធី ហើយកម្ពុជាត្រូវតែធ្វើជាប្រទេសគោរពច្បាប់ គោរពកិច្ចព្រមព្រៀងទាំងឡាយ ខណៈថៃមិនគោរពគឺជារឿងរបស់ថៃ ទុកឲ្យថៃទទួលខុសត្រូវចំពោះមុខសហគមន៍អន្តរជាតិខ្លួនឯងទៅ។

សម្តេចតេជោ បានបញ្ជាក់ថា«មិនមែនបងប្អូន(ជនភៀសសឹក)មករស់នៅទីនេះ ហើយយើងមិន ទាមទារដីរបស់យើងត្រឡប់មកវិញទេ ដីរបស់យើងគឺយើងត្រូវទាមទារត្រឡប់មកវិញ ប៉ុន្តែថ្ងៃនេះគឺជាថ្ងៃ ដែលខ្ញុំត្រូវបកស្រាយដោយជំហរ។ នាយករដ្ឋមន្រ្តីបាននិយាយហើយថា ដោយស្រាយដោយសន្តិវិធី មិន ថានាយករដ្ឋមន្រ្តីទេសេចក្តីថ្លៃងការណ៍របស់រាជរដ្ឋាភិបាល សេចក្តីថ្លែងការណ៍របស់ក្រសួងការបរទេស សេចក្តីថ្លែងការណ៍របស់ក្រសួងការពារជាតិសុទ្ធតែបានបញ្ជាក់ថា ការដោះស្រាយដោយសន្តិវិធី។ តើសន្តិវិធីនេះ វាមានន័យយ៉ាងម៉េច?។ ឥឡូវយើងកំពុងតែបាត់បង់ផ្ទះសម្បែង ដីធ្លីមួយចំនួនដែលទាហានថៃកំ ពុងកាន់កាប់។ យើងមិនបានទទួលស្គាល់នូវការប្រើប្រាស់កម្លាំងដើម្បីកាន់កាប់ទេ ហើយចំណុចនេះនៅ លើពិភពលោកអត់មានអ្នកណាប្រើប្រាស់កម្លាំងដើម្បីកំណត់ព្រំដែនទេ….»

នៅក្នុងឱកាសសំណេះសំណាលជាមួយបងប្អូនជនភៀសសឹកឃុំស្លក្រាមនោះដែរ សម្តេចតេជោ ហ៊ុន សែន ប្រមុខរដ្ឋស្តីទី ក៏បានប្រកាសប្រាប់ជនរួមជាតិផងដែរថា កម្ពុជាយើងមិនចង់ធ្វើសង្រ្គាមទេ ប៉ុន្តែកម្ពុជាក៏បានកំពុងត្រៀមខ្លួនផងដែរ ប្រសិនបើមានការធ្វើសង្រ្គាមបន្ថែម។ ត្រង់ចំណុចនេះសម្តេចតេជោ ហ៊ុន សែនបានផ្ញើសារទៅកាន់ជនរួមជាតិផងដែរថា តើយើងត្រូវជ្រើសរើសការដោះស្រាយដោយសន្តិវិធីឬត្រូវប្រើប្រាស់ កងកម្លាំងប្រដាប់អាវុធ? ខណៈការប្រើប្រាស់កម្លាំងនឹងមានការស្លាប់ទាហាន និងពលរដ្ឋទាំងសងខាងនោះ។ សម្តេចតេជោ ក៏បានអំពាវនាវឲ្យបងប្អូនជនភៀសសឹកទាំងអស់មានការអត់ធ្មត់ ចំពោះដំណោះស្រាយរបស់រាជរដ្ឋាភិបាលជាមួយភាគីថៃ បើទោះរយៈពេលវែងឬខ្លី ប៉ុន្តែកម្ពុជាត្រូវតែទាមទារយករបស់កម្ពុជាមកវិញឲ្យខាងតែបាន៕អត្ថបទបាន ចក់