ការផ្គត់ផ្គង់សាច់របស់ប្រទេសកម្ពុជានៅតែមានស្ថេរភាព ទោះបីជាមានការបិទព្រំដែនក៏ដោយ

ភ្នំពេញ៖ ការផ្គត់ផ្គង់សាច់របស់ប្រទេសកម្ពុជានៅតែមានស្ថេរភាព ទោះបីជា មានការបិទព្រំដែនក៏ដោយ ខណៈ​វិស័យចិញ្ចឹមសត្វនៅកម្ពុជា​បានពង្រីកការផលិត​ ដើម្បីបំពេញតម្រូវការក្នុងស្រុក ជាពិសេស​សាច់ជ្រូកអាចមានសមត្ថភាពផ្គត់ផ្គង់លើសតម្រូវការ និងអាចនាំចេញថែមទៀតនាពេលអនាគត។

ក្នុងរយៈពេល ៥ឆ្នាំចុងក្រោយនេះ​ វិស័យកសិកម្មនៅតែរក្សាបាននូវកំណើនវិជ្ជាមានក្នុងរង្វង់ ១,០៨% ខណៈ​កំណើននៃតម្លៃបន្ថែមសរុបឡើងដល់ ៣៣ ១៤៩ពាន់លានរៀល ស្មើនឹង ៥,៩៣% បើធៀបនឹងឆ្នាំ២០២៤។

លោក ម៉ូវ ឃាង ម្ចាស់សត្តឃាត ដែលមានទីតាំងស្ថិតនៅក្រុងតាខ្មៅ ខេត្តកណ្តាល បានប្រាប់ BTV ថា សត្តឃាតរបស់លោកមានសម្ថភាពសត្តឃាត ៥០ក្បាលក្នុងមួយ​ម៉ោង ដើម្បីផ្គត់ផ្គង់ទៅទីផ្សារក្នុងស្រុកដែលភាគច្រើនការផ្គត់ផ្គង់ទៅឱ្យអតិថិជនយកទៅលក់បន្តនៅតាមបណ្តាផ្សារ​នានា​រាជធានីភ្នំពេញ។

លោកបញ្ជាក់ថា ប​ច្ចុប្បន្ន ការផ្គត់ផ្គង់សាច់ជ្រូកនៅលើទីផ្សារមានគ្រប់គ្រាន់តាមតម្រូវការ ប៉ុន្តែ​តម្រូវការសាច់ជ្រូក ថយល្បឿន​បន្តិចនៅរដូវវស្សា ដោយសារមិនមែនជារដូវបុណ្យទាន និងអាពាហ៍ពិពាហ៍ ដែលតែងតែមានតម្រូវការសាច់ខ្ពស់​ ខណៈ​តម្លៃសាច់ជ្រូករស់គឺនៅថេរ ពោលគឺមិនមានសញ្ញាឡើងថ្លៃទៀតទេ។​

លោក ស្រ៊ុន ពៅ ប្រធាន​សមាគមអ្នកចិញ្ចឹមសត្វកម្ពុជា បាន​ឱ្យដឹងថា វិស័យចិញ្ចឹមសត្វនៅកម្ពុជា បង្ហាញពីភាពរីកចម្រើនចាប់តាំងពីថៃបិទព្រំដែនជាឯកតោភាគី ដោយសារកសិករខិតខំពង្រីកការចិញ្ចឹម​សត្វ​ ដោយលោកធានាពីការផ្គត់ផ្គង់គ្រប់តម្រូវការទីផ្សារ ហើយអាចឈានទៅការនាំចេញក៏បាន​ថែមទៀត​​នាពេលអនាគត។​

របាយការណ៍ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុង​ឆ្នាំ​២០២៥ កន្លងទៅ កម្ពុជា​មាន​ផលិតកម្មសត្វសរុបចំនួន ៦៨,៩៤លានក្បាល ក្នុងនោះ ជ្រូក ចំនួន ៤,៦៥លានក្បាល កើនឡើង ១៤,៥៥% ធៀបនឹង​ឆ្នាំ២០២៤។ របាយការណ៍ដដែល បន្តថា ការវិនិយោគឯកជនលើកសិដ្ឋានចិញ្ចឹមសត្វ រោងចក្រផលិតចំណីសត្វ និងសត្តឃាតដ្ឋានទំនើប បានចូលរួមបង្កើនផលិតកម្មសត្វ និងលើកកម្ពស់អនាម័យ និងសុវត្ថិភាពដល់អ្នកបរិភោគ ហើយ ការអនុវត្តវិធានការច្បាប់​ និងវិធានការច្ចេកទេសចិញ្ចឹមសមស្រប ជាពិសេស ការត្រួតពិនិត្យអនាម័យសត្វ និងផលិតផលមានដើមកំណើតពីសត្វ ត្រូវបានលើកកម្ពស់ជាបន្តបន្ទាប់៕ អត្ថបទ៖ ធូ វិរៈ