ព័ត៌មាន
សិស្ស NPIC មានសមត្ថភាពផលិតរ៉ូបូតដឹកជញ្ជូនដើរដោយស្វ័យប្រវត្តិ ដើម្បីប្រើប្រាស់ក្នុងវិស័យរោងចក្រ និងឧស្សាហកម្មនៅកម្ពុជា
(ភ្នំពេញ)៖ យុវជនកម្ពុជាដែលកំពុងសិក្សាជំនាញវិស្វកម្មទូរគមនាគមន៍ នៅវិទ្យាស្ថានជាតិពហុបច្ចេកទេសកម្ពុជា(NPIC) នៃក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញស្នាដៃថ្មីមួយគួរឱ្យចាប់អារម្មណ៍ គឺឧបករណ៍ផលិតរ៉ូបូតដឹកជញ្ជូនដើរដោយស្វ័យប្រវត្តិ ដើម្បីប្រើប្រាស់ក្នុងវិស័យរោងចក្រ និងឧស្សាហកម្មនៅកម្ពុជា។
យុវជន ម៉េង ដេវីត ជាសិស្សកំពុងសិក្សាជំនាញវិស្វកម្មមេកានិក នៅវិទ្យាស្ថាន NPIC បានថ្លែងថា រ៉ូបូតដឹកជញ្ជូនដើរដោយស្វ័យប្រវត្តិនេះ អាចប្រើប្រាស់ក្នុងការដឹកជញ្ជូនសម្ភារៈ ដឹកឯកសារ សម្ភារៈការិយាល័យក្នុងអគារ ឬក្រុមហ៊ុនធំៗ ដឹកម្ហូបអាហារ និងភេសជ្ជៈនៅក្នុងភោជនីយដ្ឋានផងដែរ។
យុវជនរូបនេះបន្តថា រ៉ូបូតដឹកជញ្ជូនដើរដោយស្វ័យប្រវត្តិនេះ ត្រូវបានបំពាក់ប្រព័ន្ធចលនាជារបៀបឌីផេរ៉ង់ស្យែល ដែលមានកង់បើកបរចំនួនពីរ និងកង់ជំនួយចំនួនពីរសម្រាប់រក្សាលំនឹង។ ឧបករណ៍នេះ ក៏បានបំពាក់កុំព្យូទ័រដែលមានខួរក្បាល Jetson Orin Nano ប្រើសម្រាប់ដំណើរការទិន្នន័យ ដើម្បីអាចបញ្ជាឱ្យធ្វើសកម្មភាពបាន។
សម្រាប់ចំណង់ចំណូលចិត្តនៃការបង្កើតឧបករណ៍នេះ យុវជន ដេវីត បានបញ្ជាក់ថា៖«ខ្ញុំមានបំណងចង់សម្រួលការប្រើប្រាស់កម្លាំងពលកម្មនៅក្នុងក្រុមហ៊ុន រោងចក្រ សហគ្រាស និងភោជ្ជនីយដ្ឋាន ព្រោះរ៉ូបូតនេះ អាចដឹកជញ្ជូនសម្ភារៈទៅតម្រូវការ ហើយក៏ចង់បង្ហាញពីសមត្ថភាពកូនខ្មែរយើងក៏អាចធ្វើដូចបរទេសដែរ»។
ចំពោះមិត្តក្រុមម្នាក់ទៀតឈ្មោះ ស្មាន អាប់ឌុលឡាហ្សីក ក៏រៀនជំនាញវិស្វកម្មមេកានិក នៅវិទ្យាស្ថាន NPICដែរ បាននិយាយថា រ៉ូបូតនេះ មានសមត្ថភាពដឹកនាំជញ្ជូនសម្ភារៈដោយស្វ័យប្រវត្តិទៅដល់ទីតាំងដែលបានកំណត់នៅក្នុងប្រព័ន្ធទិន្ន័យរបស់វា។ រ៉ូបូតនេះ ត្រូវបានបំពាក់កាមេរ៉ា RealSense D455f និងសេនស័រ IMU ដើម្បីអាចចាប់ ឬផ្ដល់រូបភាពក្នុងកម្រិតគុណភាពខ្ពស់ ព្រមទាំងអាចគេចចេញវត្ថុនានាដែលនៅខាងមុខវាផងដែរ។
យុវជនរូបនេះបញ្ជាក់ថា៖«រ៉ូបូតនេះ ក៏មានបំពាក់ដោយសេបស័រប្រភេទ SL LIDAR ដែលអាចចាប់សញ្ញានៅជុំវិញខ្លួនរបស់វា ដើម្បីវាស់ចម្ងាយគោលដៅដែលវាត្រូវទៅ ស្វែងរកឧបសគ្គ គេចចេញពីឧបសគ្គ និងជួយបង្កើតប្លង់ផ្សេងៗនៅជុំវិញខ្លួនរបស់វា។ ឧបករណ៍នេះ ពិតជាមានសារៈសំខាន់ខ្លាំងណាស់សម្រាប់ប្រើប្រាស់ក្នុងវិស័យដឹកជញ្ជូន»។
លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានថ្លែងថា ឧបករណ៍នេះពិតជាសំខាន់ខ្លាំងណាស់សម្រាប់ប្រើប្រាស់ក្នុងវិស័យដឹកជញ្ជូន។ បន្ថែមពីនេះ ឧបករណ៍នេះអាចយកទៅប្រើប្រាស់បានទូលំទូលាយនៅតាមរោងចក្រ សហគ្រាស ស្ថាប័នសាធារណៈ ឬទីតាំងផ្សេងៗផងដែរ។
លោកបញ្ជាក់ថា៖«ស្នាដៃនេះ ជាភស្តុតាងបង្ហាញពីសមត្ថភាពរបស់យុវជនកម្ពុជា ក្នុងការបង្កើត និងអភិវឌ្ឍបច្ចេកវិទ្យាដោយខ្លួនឯង ដោយមិនចាំបាច់ពឹងផ្អែកទាំងស្រុងលើបច្ចេកវិទ្យាបរទេស។ ស្នាដៃរបស់សិស្ស NPIC មានច្រើនប្រភេទដែលបានបង្ហាញថា ការបណ្តុះបណ្តាលជំនាញបច្ចេកទេស និងវិជ្ជាជីវៈ កំពុងរួមចំណែកបង្កើតធនធានមនុស្សដែលមានសមត្ថភាពឆ្លើយតបនឹងតម្រូវការបច្ចេកវិទ្យាទំនើប និងការអភិវឌ្ឍឧស្សាហកម្មនៅកម្ពុជា»៕
-
ព័ត៌មាន1 week agoនាយខណ្ឌរដ្ឋបាលជលផលខេត្តកណ្តាល បានព្រមានចាត់វិធានការក្តៅ ដោយគ្មានការលើកលែងចំពោះជនប្រព្រឹត្តបទល្មើសនេសាទដោយខុសច្បាប់
-
ព័ត៌មាន1 week agoរោងចក្រផ្តុំ និងដំឡើងរថយន្តដ៏ធំមួយនៅខេត្តកំពង់ឆ្នាំងនឹងសម្ភោធដាក់អោយដំណេីរការជាផ្លូវការ ស្អែកនេះក្រោមអធិបតីភាពដ៏ខ្ពង់ខ្ពស់សម្តេចធិបតី ហ៊ុន ម៉ាណែត
-
ព័ត៌មាន1 week agoសម្ដេចធិបតី ប្រកាសឆ្មក់ចុះពិនិត្យតាមមណ្ឌលសុខភាពនៅម៉ោង២ទៀបភ្លឺ ដើម្បីប្រាកដថាបើក២៤ម៉ោង
-
ព័ត៌មាន1 week agoសម្ដេចតេជោលើកទឹកចិត្តឱ្យកម្ពុជា និងស៊ីបរកឱកាស និងយន្តការថ្មីៗជំរុញការវិនិយោគ និងពាណិជ្ជកម្មទ្វេភាគីឱ្យកាន់តែរីកចម្រើន
-
ព័ត៌មាន7 days agoមុខជំនាញចំនួន ២ ដែលមានការគាំទ្រពីយុវជន និងលេចធ្លោជាងគេ នៅក្នុងវិទ្យាស្ថានពហុបច្ចេកទេសខេត្ដកោះកុង (PIKK)
-
ព័ត៌មាន4 days agoឧត្តមសេនីយ៍ទោ ប៊ុន សុសិក្ខា៖វត្តុតាងមួយចំនួនធំ ត្រូវបានដកហូតក្នុងប្រតិបត្តិការបង្ក្រាប Online Scams រយៈពេល១ឆ្នាំមកនេះ
-
ព័ត៌មាន6 days agoលោកជំទាវ ហ៊ុន ម៉ាណា អញ្ជើញប្រគេនទេយ្យវត្ថុដល់វត្តចំនួន៨ ,ចែកអំណោយជូនប្រជាពលរដ្ឋចំនួន៥៦៨គ្រួសារ និងចែកកាតាបដល់សិស្សានុសិស្ស៧០០នាក់ នៅឃុំកំពង់ភ្លុក ស្រុកប្រាសាទបាគង ខេត្តសៀមរាប
-
ព័ត៌មាន1 week agoក្រុមហ៊ុន-សហគ្រាសចិនជាង៤០ បង្ហាញពីគម្រោងចង់បោះទុនវិនិយោគនៅខេត្តកំពង់ស្ពឺ