ខេត្តស្វាយរៀង ប្ដេជ្ញាបោសសម្អាត «ស្កេមអនឡាញ» ឱ្យអស់ពីមូលដ្ឋាន ខណៈខេត្តកំពុងកសាងមជ្ឈមណ្ឌលបន្សាបគ្រឿងញៀនធំជាងគេលើផ្ទៃដី៥០ហិកតា

ស្វាយរៀង៖ រដ្ឋបាលខេត្តស្វាយរៀង បានបង្ហាញការប្ដេជ្ញាចិត្តយ៉ាងមុតមាំក្នុងការលុបបំបាត់បទល្មើសឆបោកប្រាស់តាមប្រព័ន្ធបច្ចេកវិទ្យា ឬ «ស្កេមអនឡាញ (Online Scams)» ឱ្យអស់ពីទឹកដីតំបន់ព្រំដែនមួយនេះ ខណៈខេត្តកំពុងតែដំណើរការកសាងមជ្ឈមណ្ឌលបន្សាបគ្រឿងញៀនដ៏ធំជាងគេមួយនៅក្នុងប្រទេសកម្ពុជា ដែលមានផ្ទៃដីរហូតដល់ទៅ ៥០ហិកតា។ ការប្រកាសការប្ដេជ្ញាចិត្ត និងការបង្ហាញវឌ្ឍនភាពការងារដ៏សំខាន់នេះ បានធ្វើឡើងនៅក្នុងកិច្ចប្រជុំពិភាក្សាការងារ នាព្រឹកថ្ងៃទី១១ ខែមិថុនា ឆ្នាំ២០២៦ នេះ រវាងគណៈប្រតិភូគណៈកម្មការនីតិកម្ម និងយុត្តិធម៌ នៃរដ្ឋសភា ឬ ហៅកាត់ថា   គណៈកម្មការទី៦ ដឹកនាំដោយ ឯកឧត្តម អង្គ វង្ស វឌ្ឍានា ប្រធានគណៈកម្មការ ជាមួយនឹងរដ្ឋបាលខេត្តស្វាយរៀង ដែលដឹកនាំដោយ ឯកឧត្តម ម៉ែន វិបុល ប្រធានក្រុមប្រឹក្សាខេត្ត និងឯកឧត្តម ប៉េង ពោធិ៍សា អភិបាលខេត្ត។

បេសកកម្មការងាររបស់គណៈកម្មការទី៦ នៃរដ្ឋសភា នាឱកាសនេះ គឺធ្វើឡើងដើម្បីតាមដាន និងវាយតម្លៃលើប្រសិទ្ធភាពនៃការអនុវត្តច្បាប់ និងវិស័យយុត្តិធម៌នៅថ្នាក់ក្រោមជាតិ ដោយផ្តោតសំខាន់លើច្បាប់ចំនួនពីរ គឺច្បាប់ស្តីពីកាតព្វកិច្ចយោធា និងច្បាប់ស្តីពីស្កេមអនឡាញ ព្រមទាំងតាមដានវឌ្ឍនភាពនៃការអនុវត្ត «យុទ្ធសាស្ត្របញ្ចកោណ ដំណាក់កាលទី១» របស់រាជរដ្ឋាភិបាល នីតិកាលទី៧ ក្នុងគោលដៅពង្រឹងអភិបាលកិច្ច និងនីតិរដ្ឋនៅមូលដ្ឋាន។ ក្រោយពីបានស្តាប់របាយការណ៍វឌ្ឍនភាពការងាររបស់ខេត្តរួចមក ឯកឧត្តម អង្គ វង្ស វឌ្ឍានា បានសម្តែងការកោតសរសើរយ៉ាងខ្លាំងចំពោះរដ្ឋបាលខេត្តស្វាយរៀង ដែលសម្រេចបានលទ្ធផលការងារយ៉ាងលេចធ្លោ ជាពិសេសសកម្មភាពបង្ក្រាបបទល្មើសស្កេមអនឡាញប្រកបដោយប្រសិទ្ធភាពខ្ពស់ នាពេលកន្លងមក។

ដើម្បីពង្រឹងប្រសិទ្ធភាពការងារឱ្យកាន់តែរឹងមាំបន្ថែមទៀត គណៈកម្មការទី៦ រដ្ឋសភា បានផ្តល់នូវអនុសាសន៍ណែនាំគន្លឹះមួយចំនួន ដល់រដ្ឋបាលខេត្ត ដោយក្នុងនោះត្រូវបន្តជំរុញការផ្សព្វផ្សាយ និងបង្កើនការអប់រំដល់ប្រជាពលរដ្ឋ សិស្ស-និស្សិត ឱ្យយល់ដឹងច្បាស់ពីល្បិចកលបោកប្រាស់តាមប្រព័ន្ធអនឡាញ។ ទន្ទឹមនឹងនេះ ត្រូវពង្រឹងការអប់រំច្បាប់ស្តីពីកាតព្វកិច្ចយោធា ដោយពន្យល់ស្រទាប់យុវជនឱ្យយល់ពីតម្លៃនៃការចូលរួមការពារជាតិ និងការបណ្តុះបណ្តាលវិន័យខ្លួនឯង ព្រមទាំងបន្តយុទ្ធនាការបង្ក្រាបក្រុមក្មេងទំនើង បទល្មើសគ្រឿងញៀន និងការទន្ទ្រានធនធានធម្មជាតិ ឱ្យបានកាន់តែម៉ឺងម៉ាត់បំផុត។

ជាការឆ្លើយតប ថ្នាក់ដឹកនាំរដ្ឋបាលខេត្តស្វាយរៀង បានទទួលយកនូវរាល់អនុសាសន៍ណែនាំដ៏មានតម្លៃទាំងអស់នោះទៅអនុវត្តដោយស្មារតីទទួលខុសត្រូវខ្ពស់ និងបានប្ដេជ្ញាចិត្តយ៉ាងមុតមាំក្នុងការស្វែងរក និងបោសសម្អាតបទល្មើសស្កេមអនឡាញ ឱ្យអស់ពីមូលដ្ឋាន ដើម្បីធានាបាននូវសន្តិសុខ ស្ថិរភាព និងភាពសុខសាន្តពេញលេញជូនប្រជាពលរដ្ឋ៕