ព្រឹកនេះ គណៈកម្មការជំរឿនមន្រ្តី បានបន្តបេសកកម្មចុះជំរឿនមន្ត្រីជាក់ស្តែង ដល់ក្រសួងទេសចរណ៍

ក្រសួងទេសចរណ៍ ជាក្រសួងទី១២ ដែលគណៈកម្មការជំរឿនមន្រ្តី បានចុះពិនិត្យផ្ទៀងផ្ទាត់រចនាសម្ព័ន្ធ និងវត្តមានមន្រ្តីកំពុងបំពេញការងារ នៅតាមអង្គភាពចំណុះទីស្តីការក្រសួងជាក់ស្ដែង។ ក្នុងដំណើរការជំរឿននេះ មានការអញ្ជើញចូលរួមធ្វើជីវមាត្រដោយផ្ទាល់ពី ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ព្រមទាំងថ្នាក់ដឹកនាំ និងមន្ត្រីគ្រប់ជាន់ថ្នាក់ ដែលកំពុងបំពេញការងារ នៅតាមអង្គភាពចំណុះក្រសួងទេសចរណ៍។

ការធ្វើជំរឿនមន្ត្រីជាក់ស្តែងនៅក្រសួងទេសចរណ៍នាពេលនេះ គណៈកម្មការជំរឿន បានចុះពិនិត្យផ្ទៀងផ្ទាត់វត្តមានមន្ត្រី ដែលកំពុងបំពេញការងារជាក់ស្តែងដោយផ្ទាល់បែបនេះ គឺដើម្បីការធានាមិនឱ្យប៉ះពាល់ដល់ដំណើរការ ការងារប្រចាំថ្ងៃរបស់មន្ត្រី និងមិនឱ្យប៉ះពាល់ដល់ដំណើរការនៃការផ្តល់សេវាសធារណៈរបស់អង្គភាព ដែលជាគោលដៅនៃការធ្វើជំរឿននេះផងដែរ។

សូមជម្រាបថា ការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធរបស់អង្គភាពចំណុះទីស្តីការក្រសួងទេសចរណ៍ ប្រព្រឹត្តទៅរយៈពេល ២ថ្ងៃពេញ ពោលគឺថ្ងៃទី២៥ និងទី២៦ ខែមិថុនា ឆ្នាំ២០២៦ នៅអគារនៃទីស្តីការក្រសួង។ ការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែង ធ្វើឡើងដើម្បីទទួលបានទិន្នន័យច្បាស់លាស់ ឯកភាពគ្នា និងប្រើប្រាស់បានរួមគ្នា៕